ប្រទេសថៃ ៖ ពួកអ្នកជួយសង្គ្រោះបាននិយាយឱ្យដឹងកាលពីថ្ងៃទី២៩ ខែមិថុនា ២០១៨នេះថា នៅមានភ័ព្វវាសនាខ្ពស់ដែលកុមារទាំង១២នាក់ និងគ្រូបាល់ទាត់ពួកគេ ជាប់ក្នុងរូងភ្នំដែលមានទឹកជន់លិចហើយនៅរស់រានមានជីវិត។ ពួកគេអាចរត់ទៅកាន់បន្ទប់ណាមួយនៃរូងភ្នំ ក្នុងចំណោមបន្ទប់ជាច្រើនដែលពុំមានទឹកលិច។…
ប្រទេសថៃ ៖ ពួកអ្នកជួយសង្គ្រោះបាននិយាយឱ្យដឹងកាលពីថ្ងៃទី២៩ ខែមិថុនា ២០១៨នេះថា នៅមានភ័ព្វវាសនាខ្ពស់ដែលកុមារទាំង១២នាក់ និងគ្រូបាល់ទាត់ពួកគេ ជាប់ក្នុងរូងភ្នំដែលមានទឹកជន់លិចហើយនៅរស់រានមានជីវិត។ ពួកគេអាចរត់ទៅកាន់បន្ទប់ណាមួយនៃរូងភ្នំ ក្នុងចំណោមបន្ទប់ជាច្រើនដែលពុំមានទឹកលិច។ ម្យ៉ាងទៀតក្មេងៗទាំងនេះសុទ្ធតែមានកាយសម្បទាល្អ និងមាំមួន រួចគ្រូបាល់ទាត់ពួកគេជាអ្នកស្គាល់ច្បាស់រូងភ្នំនេះ ហើយពីមុនធ្លាប់់ស្រាវជ្រាវទីនោះផង។
តាមបណ្ដាស្នាមជើង និងរបស់របរពួកគេត្រូវបានប្រទះឃើញក្នុងផ្នែកមួយនៃរូងភ្នំ ដែលបែបនោះនាំឲ្យពួកអ្នកជួយសង្គ្រោះនៅមានសង្ឃឹម។ ពួកអ្នកជួយសង្ក្រោះជួយទ្រទ្រង់ដោយកងឯកភាពនានា នៃកងទ័ពបានរៀបចំការរុករកក្នុងភ្នំដែលមានរូងនេះក្នុងក្ដីសង្ឃឹមរកឃើញច្រកណាមួយពីខាងលើរូង។ រហូតមកទល់ពេលនេះការរុករកច្រក២ប្រែក្លាយទៅជាឥតបានការ។ ជាមួយការប្រើបច្ចេកវិទ្យាទំនើប ពួកអ្នកជួយសង្គ្រោះរកទីតាំងសមស្របណាមួយដែលអាចខួងច្រកចូលរូងភ្នំនេះបាន។
ក្រោយការបញ្ជូនពួកអ្នកមុជទឹកពូកែៗ របស់ប្រទេស ក្រុមអ្នកមុជទឹកនៃកងម៉ារីនអាមេរិក ព្រមទាំងក្រុមអ្នកមុជទឹកឯកទេសមួយក្រុមរបស់អង់គ្លេស ក៏បានទៅដល់ទីនោះដែរ កាលពីធ្ងៃទី២៨មិថុនា។
នាយករដ្ឋមន្ត្រី និងរដ្ឋមន្ត្រីមហាផ្ទៃថៃ ទៅកាន់ទីនោះដើម្បីពិនិត្យការប្រព្រឹត្តទៅ នៃប្រតិបត្តិការជួយសង្គ្រោះ ដែលតាមដានបំផុតពីបណ្ដាសារព័ត៌មានក្នុងស្រុក និងបរទេស។ ព្រះមហាក្សត្រថៃទ្រង់បួងសួងសូមឲ្យកុមារទាំងនេះ រកឃើញដោយសុខសប្បាយ ហើយម្ចាស់ក្សត្រីថៃមួយអង្គប្រកាសជួយទ្រទ្រង់ខាងហិរញ្ញវត្ថុដល់បណ្ដាអ្នកជួយសង្ក្រោះ។
រូងភ្នំថាមលួង ឬល្អាងលួងនោះមានប្រវែងដល់ទៅ៧គីឡូម៉ែត្រ ហើយកន្លែងជាច្រើននៃរូងភ្នំត្រូវទឹកលាយភក់ជន់លិចមិនអាចឆ្លងកាត់បាន ដើម្បីអាចចូលដល់បន្ទប់ធំៗនៃរូងភ្នំជាកន្លែងពួកគេអាចរត់ទៅ ពួកអ្នកជួយសង្គ្រោះជ្រើសរើសការប្រើម៉ាស៊ីនបូមទឹកចេញពីរូង។
នៅក្បែររូងព្រះសង្ឃ និងប្រជាជនចាប់តាំងពី៦ថ្ងៃមកហើយ បាននាំគ្នាសូត្រធម៌បួងសួង សូមឲ្យអ្នកបាត់ខ្លួនទាំងនាះត្រូវបានរកឃើញដោយសុខសប្បាយ។
ទោះបីយ៉ាងណាក្រោយរយៈពេល៦ថ្ងៃជាប់ក្នុងរូងភ្នំ ភ័ព្វវាសនាអាចរកឃើញពួកគេនៅរស់ពិតជាមានតិចបំផុត។ តែកាលពីឆ្នាំ២០១៤ កន្លងទៅ នៅអាល្លឺម៉ង់បុរសម្នាក់អាចជួយសង្គ្រោះពីរូងភ្នំមួយក្រោយជាប់ក្នុងនោះដល់ទៅ១១ថ្ងៃ។ រួចកាលពី២០១២ នៅប៉េរូ បណ្ដាកម្មកររ៉ែអាចជួយសង្គ្រោះក្រោយរយៈពេល៧ថ្ងៃ ស្ថិតក្នុងដី។ នៅស៊ីលីបណ្ដាកម្មករ៉ែអាចសង្ក្រោះក្រោយជាប់ក្នុងដី១៧ថ្ងៃ។ ហើយម៉ាស៊ីនបូមទឹក៤០គ្រឿងថែមទៀត ត្រូវបានបញ្ជូនពីក្រុងបាងកកនាថ្ងៃទី២៩ មិថុនា ហើយ៕
ចែករំលែកព័តមាននេះ