រាជធានីភ្នំពេញ ៖ តាមសេចក្តីរាយការណ៍បឋមបានឲ្យដឹងថា មានករណីគ្រោះថ្នាក់ចរចរណ៍មួយដែលរថយន្តបង្កមួយគ្រឿងបានកិនឪពុក កូន និងក្មួយស្រីបណ្តាលឲ្យស្លាប់នៅកន្លែង លើដងផ្លូវជាតិលេខ៥ ហេតុការណ៍នេះបានកើតឡើងនៅវេលាម៉ោង១១និង១០នាទីថ្ងៃទី២៩ ខែមិថុនា ឆ្នាំ២០១៨ នៅតាមផ្លូវជាតិលេខ៥ សង្កាត់ច្រាំងសម្រះទី១ ខណ្ឌឬស្សីកែវ ។
សេចក្តីរាយការណ៍បន្តថា ជនបង្កមានឈ្មោះ ខូវ ខែម ភេទប្រុស អាយុ២៨ឆ្នាំ ដែលបើកបររថយន្តពណ៌លឿង មានស្លាក PP-២២៦០ ។ ចំណែកជនរងគ្រោះមានឈ្មោះទី១-ឈ្មោះ ម៉ាត់ សារី ភេទប្រុស ជនជាតិអីស្លាម អាយុ៥៦ឆ្នាំ មុខរបរអ្នកលក់ ត្រូវជាឪពុក ។ ទី២- ឈ្មោះ ម៉ាត់ សារីណា ភេទស្រី ជនជាតិអីស្លាម អាយុ២០ឆ្នាំ កម្មកររោងចក្រ ត្រូវជាកូន ។ ទី៣- អេត រ៉ូស៊ីកា ភេទស្រី ជនជាតិអីស្លាម អាយុ៥ឆ្នាំ ជាក្មួយស្រី ។ អ្វីដែលហួសនោះគឺ នារីជាកូនខាងលើអាយុ២០ឆ្នាំ ត្រៀមនឹងភ្ជាប់ពាក្យនៅថ្ងៃអាទិត្យខាងមុខនេះផងដែរ ។
ដំណើររឿងមុនពេលកើតហេតុ គឺឪពុកបានទៅយកកូនស្រីដែលជាកម្មការិនីកាត់ដេរនៅរោងចក្រស្វាយប៉ាក ដោយបានឌុបក្មួយស្រីទៅជាមួយដែរ លុះពេលត្រឡប់មកវិញដល់ចំណុចកើតហេតុដែលជិតដល់ផ្ទះទៅហើយនោះ ក៏មានរថយន្តមួយគ្រឿងបានឈប់នៅក្បែរខាងផ្លូវ ជាតិលេខ៥ ហើយគាត់ក៏បានបើកម៉ូតូគេចពីរថយន្តដែលឈប់នោះក៏ជ្រុលទៅប៉ះរបាំងថ្មឲ្យដួល ស្របពេលមានរថយន្តមួយគ្រឿងបានបើកជែងមកពីក្រោយផងនោះ ក៏បានកិនជនរងគ្រោះទាំងបីនាក់ បណ្តាលឲ្យស្លាប់តែម្តង ។
នៅខណៈពេលសមត្ថកិច្ចឃាត់ខ្លួនជនបង្កខាងលើនាំទៅប៉ុស្តិ៍ក៏មានប្រជាពលរដ្ឋបានចោមរោមប្រុងនាំគ្នាវាយទៅលើជនបង្កដែលជាអ្នកបើកបរ តែបានសមត្ថកិច្ចការពារនាំចូលក្នុងរថយន្តទាន់ កុំអីត្រូវប្រជាពលរដ្ឋជាជនជាតិអ៊ីស្លាមផ្ទុះកំហឹងសម្លាប់មិនខាន ។
បន្ទាប់ពីបង្កឲ្យមានមនុស្សស្លាប់នោះ គឺអ្នកបើកបរបានបើករថយន្តគេចប្រមាណជា១គីឡូម៉ែត្រ ត្រូវបានសមត្ថកិច្ចនគរបាលឃាត់ខ្លួនបាន និងបញ្ជូនទៅកាន់ការិល័យចរចរណ៍ផ្លូវគោកនៃស្នងការនគរបាលរាជធានីភ្នំពេញភ្លាមៗផងដែរ ៕
ចែករំលែកព័តមាននេះ