ខេត្តបាត់ដំបង ៖ ពិធីរំលឹកខួបអនុស្សាវរីយ៍លើកទី៣០ ថ្ងៃបង្កើតយោធភូមិភាគទី៥ ក្រោមអធិបតីភាព សម្តេចពិជ័យសេនា ទៀ បាញ់ ឧបនាយករដ្ឋមន្ត្រី រដ្ឋមន្ត្រីក្រសួងការពារជាតិ…
ខេត្តបាត់ដំបង ៖ ពិធីរំលឹកខួបអនុស្សាវរីយ៍លើកទី៣០ ថ្ងៃបង្កើតយោធភូមិភាគទី៥ ក្រោមអធិបតីភាព សម្តេចពិជ័យសេនា ទៀ បាញ់ ឧបនាយករដ្ឋមន្ត្រី រដ្ឋមន្ត្រីក្រសួងការពារជាតិ តំណាងដ៏ខ្ពង់ខ្ពស់ សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជា នាថ្ងៃទី២៨ ខែមិថុនា ឆ្នាំ២០១៨ នៅទីបញ្ជាការយោធភូមិភាគទី៥ ក្រុង-ខេត្តបាត់ដំបង ដោយមានកម្លាំងព្យុះហយាត្រាចំនួន២៧០០នាក់ គ្រប់មន្ត្រីកងទ័ពមកពីក្រសួងការពារជាតិ អគ្គបញ្ជាការ កងទ័ពជើងគោក តំណាងកងទ័ពថៃ វៀតណាម លោកអភិបាលខេត្តបាត់ដំបង បន្ទាយមានជ័យ ប៉ៃលិន និងពោធិសាត់ នគរបាល អាវុធហត្ថ ដែលសរុបរួមប្រមាណ៤ពាន់នាក់ ។
លោកឧត្តមសេនីយ៍ឯក ប៊ុន សេង មេបញ្ជាការរងកងទ័ពជើងគោកមេបញ្ជាការយោធភូមិភាគទី៥ បានមានមតិស្វាគមន៍ និងអានប្រវត្តសង្ខេបស្តីពីការបង្កើតយោធភូមិភាគទី៥ គឺផ្តើមចេញពីកងកម្លាំង១កងពលធំលេខ១៩៦ ដែលបានឈរជើងនៅខេត្តបាត់ដំបងនេះនៅឆ្នាំ១៩៨១ និងអង្គភាពផ្សេងៗទៀតការពារតាមខ្សែបន្ទាត់ព្រំដែន ដោយមានកិច្ចសហការជាមួយកងទ័ពស្ម័គ្រចិត្តវៀតណាម បន្ទាប់ពីបានរំដោះប្រជាជនចេញពីរបបអាវខ្មៅឆ្នាំ១៩៧៩ ហើយរួមគ្នាទប់ស្កាត់ការវិលត្រឡប់នៃប្រល័យពូជសាសន៍មកវិញផងនោះ ក៏ត្រូវបានពង្រឹងរៀបចំប្រមូលផ្តុំ ពង្រឹងកម្លាំងទ័ពនៅបាត់ដំបងនេះដើយបង្កើតបានជាអង្គភាពយោធភូមិភាគទី៥ នៅថ្ងៃទី២៨ ខែមិថុនា ឆ្នាំ១៩៨៨ ។
ដោយបានគ្រប់គ្រងកម្លាំងទ័ពក្នុងខេត្តចំនួន៤ គឺបាត់ដំបង ពោធិសាត់ ប៉ៃលិន និងបន្ទាយមានជ័យ ហើយបានទប់ស្កាត់រាល់សកម្មភាពបទល្មើស ពង្រឹងកសាងអង្គភាព ដោយមានកិច្ចរួមសហការ គ្រប់អាជ្ញាធរមូលដ្ឋាន និងពង្រឹងសម្ព័ន្ធមេត្រីភាពជាមួយប្រទេសជិតខាងរក្សាសុខសន្តិភាព ជំរុញការអភិវឌ្ឍ បន្តបន្ទាប់ពីពេលធ្វើសមាហរណកម្មបង្រួបបង្រួមជាតិតាមគោលនយោបាយឈ្នះ ឈ្នះទទួលបានសុខសន្តិភាពពិតប្រាកដនៅឆ្នាំ១៩៩៨កន្លងមកនោះ ។
បន្ទាប់មកក្នុងក្បួនព្យុះហយាត្រា បានបង្ហាញ អំពីគ្រឿងចក្រ សព្វាវុធ ដែលធ្លាប់ធ្វើសកម្មភាពនាសម័យនោះ ព្រមទាំងកងកម្លាំងជំនាន់ក្រោយបានទទួលហ្វឹកហាត់ដើម្បីបន្តវេណ រួមគ្នាថែរក្សាសុខសន្តិភាពបន្តទៅទៀតរួមហើយ សម្តេចពិជ័យសេនា ទៀ បាញ់ ឧបនាយករដ្ឋមន្ត្រី រដ្ឋមន្ត្រីក្រសួងការពារជាតិបានបញ្ជាក់ថា តាមគោលនយោបាយរបស់រាជរដ្ឋាភិបាល ដែលមានសម្តេចតេជោ ហ៊ុន សែនបានដឹកនាំ តស៊ូរំដោះប្រទេសជាតិកន្លងមកនោះគឺមានតែបាតដៃទទេ តាំងពីឆ្នាំ១៩៧៩មក ដោយបានប្រឹងប្រែងដៃម្ខាងទប់ស្កាត់នៃការវិលត្រឡប់ខ្មែរក្រហម ដៃម្ខាងប្រឹងស្តារសេដ្ឋកិច្ចជាតិ ក្នុង និងក្រៅប្រទេសដែលបានហ៊ុំព័ទ្ធប្រទេសកម្ពុជា ដែលគ្មានអ្វីសោះឲ្យវិលត្រឡប់មកមានភាពសម្បូរសប្បាយរហូតបានដូចសព្វថ្ងៃនេះ ។
សម្តេចចាំបានថា ខេត្តបាត់ដំបង ជាកន្លែងបន្សល់អនុស្សាវរីយ៍ច្រើនក្នុងសម័យមានសង្គ្រាម តែពេលនេះប្លែកទាំងអស់ ព្រោះខុសគ្នាកាលមានសង្គ្រាម បាត់ដំបងពេលនោះ ឃើញតែផ្សែងឆេះដោយសារគ្រាប់រំសេវហុយពេញតំបន់ប្រយុទ្ធគ្នាពីជនបទ ដល់ទីក្រុង តែពេល៣០ឆ្នាំកន្លងមកនេះ តាមជនបទសុទ្ធតែចំការ ស្រែដំណាំ និងទីក្រុងអាគារធំៗ ឡាន ម៉ូតូចង្អៀតរកចៀសគ្នាមិនចង់រួច នេះគឺមកពីហេតុអ្វី? គឺកត្តាដឹកនាំថែររក្សាឲ្យបាននូវសុខសន្តិភាព ទើបគ្មានភាពអន្តរាយ ខ្ទេចខ្ទាំក្នុងប្រទេសដូចសម័យមុនៗឡើយ ដូច្នោះយើងបន្តរួមគ្នាថែររក្សាសុខសន្តិភាពឲ្យបានដើម្បីក្តីសុខសប្បាយរបស់យើងទាំងអស់គ្នា ។
សម្តេចបន្ថែមទៀតថា យោធភូមិភាគទី៥ គឺជាចំណែកមួយសំខាន់ក្នុងការធ្វើសមាហរណកម្ម ហើយពេលនេះ ទាំងការគ្រប់គ្រងកម្លាំងទ័ព ទាំងការកសាងពង្រឹងអង្គភាពរឹងមាំលើគ្រប់វិស័យ គឺលេចធ្លោជាងគេក្នុងប្រទេសកម្ពុជា ហើយយើងកំពុងតែរៀបចំបង្កើតជាវិមានឈ្នះ ឈ្នះ នៅក្នុងប្រទេសកម្ពុជាបន្សល់ទុកជាគំរូ ឯកសារសម្រាប់កូនចៅជំនាន់ក្រោយយល់ដឹងប្រវត្តិសាស្ត្រដឹកនាំបន្តវេណបន្តទៅទៀត ។
សម្តេចបានផ្តាំផ្ញើចំណុចសំខាន់ៗ ដោយបានផ្តោតលើការរីកចំរើនបន្តទៀតគឺ ត្រូវពង្រឹងការយល់ដឹងផ្នែកព័ត៌មានវិទ្យាឲ្យបានច្រើនតាមសម័យកាល ដើម្បីចៀសវាងចាញ់បោកការឃោសនា ញុះញង់ លាបពណ៌ បង្កើតអសន្តិសុខ រំខានជីវភាពការរស់រស់របស់បងប្អូនយើង ហើយកុំភ្លេចទៅបោះឆ្នោតនាពេលខាងមុខនេះ ដោយមានការជឿជាក់លើសម្តេចតេជោហ៊ុន សែនគឺ បោះឲ្យលេខ២០ចុងក្រោយគេ ក្នុងចំណោម២០គណបក្ស ដែលជាលេខចុងក្រោយ គឺងាយចាំ ងាយគិត ងាយគូស ទើបមានសុខសន្តិភាពពិតប្រាកដ ៕
ចែករំលែកព័តមាននេះ