មនុស្ស៦នាក់ ពាក់ព័ន្ធក្នុងបទឧក្រិដ្ឋគ្រឿងញៀ.នដ៏ធំនេះ
- ស្ទឹងត្រែង
ខេត្តស្ទឹងត្រែង ៖ សម្តេចក្រឡាហោម ស ខេង ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ កាលពីព្រឹកថ្ងៃទី២៧ មិថុនា បានចេញលិខិតតាងនាមថ្នាក់ដឹកនាំក្រសួងមហាផ្ទៃ…
ខេត្តស្ទឹងត្រែង ៖ សម្តេចក្រឡាហោម ស ខេង ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ កាលពីព្រឹកថ្ងៃទី២៧ មិថុនា បានចេញលិខិតតាងនាមថ្នាក់ដឹកនាំក្រសួងមហាផ្ទៃ និងក្នុងនាមសម្តេចផ្ទាល់សម្តែងនូវការកោតសរសើរដ៏ស្មោះស្ម័គ្រជូនចំពោះនាយរង និងមន្ត្រីប៉ុស្តិ៍នគរបាលច្រកទ្វារព្រំដែនអន្តរជាតិត្រពាំងក្រៀល នៃអគ្គនាយកដ្ឋានអន្តោប្រវេសន៍ ដែលមានស្នាដៃយ៉ាងធំធេង ក្នុងការបង្ក្រាបករណីដឹកជញ្ជូនគ្រឿងញៀនដ៏ធំមួយ ប្រភេទមេតំហ្វេតាមីនគ្រីស្តាល់ (Methamphetamine) ហៅម៉ាទឹកកកចំនួន១២០គីឡូក្រាម កាលពីរសៀលថ្ងៃទី២៦ មិថុនា ឆ្នាំ២០១៨ ដោយបានចាប់ឃាត់ខ្លួនជនសង្ស័យចំនួន៣នាក់នៅចំណុចច្រកទ្វារព្រំដែនអន្តរជាតិត្រពាំងក្រៀល ព្រំដែនកម្ពុជា-ឡាវនៃខេត្តស្ទឹងត្រែង ។
សម្តេចស ខេង បានវាយតម្លៃខ្ពស់ចំពោះនាយ នាយរង និងមន្ត្រីប៉ុស្តិ៍នគរបាលច្រកទ្វារព្រំដែនអន្តរជាតិត្រពាំងក្រៀល ដែលមានប្រាជ្ញាឈ្លាសវៃ ក្នុងការបង្ក្រាបការដឹកជញ្ជូនគ្រឿងញៀនដ៏ធំខាងលើ ព្រមទាំងបានសហការជាមួយតំណាងស្នាក់ការច្រកទ្វារ តំណាងអង្គភាពគយ និងរដ្ឋាករ និងតំណាងអង្គភាពប្រឆាំងគ្រឿងញៀន (B.L.O) ដើម្បីប្រគល់ជនសង្ស័យទាំង៣នាក់ រួមទាំងវត្ថុតាងគ្រឿងញៀនចំនួន១២០គីឡូក្រាម ទៅអង្គភាពប្រឆាំងគ្រឿងញៀនដើម្បីចាត់ការបន្តតាមនីតិវិធីច្បាប់ ។
រហូតមកដល់ថ្ងៃទី២៧ ខែមិថុនា មានមនុស្សចំនួន៦នាក់ហើយដែលត្រូវបានឃាត់ខ្លួន ដោយនគរបាលអន្តោប្រវេសន៍ប៉ុស្តិ៍ត្រពាំងក្រៀល នៃអគ្គនាយកដ្ឋានអន្តោប្រវេសន៍ បន្ទាប់ពីពិនិត្យឃើញគ្រឿងញៀនប្រភេទម៉ាទឹកកកចំនួន១២០ដុំលាក់ក្នុងវ៉ាលីសខ្មៅ នៅក្នុងរថយន្តក្រុមហ៊ុនភ្នំពេញសូរិយាដឹកអ្នកដំណើរ កាលពីវេលាម៉ោង២និង៣៥នាទីរសៀលថ្ងៃទី២៦ ខែមិថុនា នៅច្រកព្រំដែនអន្តរជាតិត្រពាំងក្រៀលកម្ពុជា-ឡាវ ។
ប្រភពព័ត៌មានដំបូងត្រូវគេបង្ហើបថា ការត្រួតពិនិត្យឃើញគ្រឿងញៀនដ៏ច្រើនសន្ធឹកសន្ធាប់មិនធ្លាប់មាននេះ គឺនៅលើរថយន្តក្រុងមួយគ្រឿង ព្រមទាំងបានឃាត់ខ្លួនមនុស្ស៣នាក់ ក្នុងនោះម្នាក់ជាអ្នកបើកបររថយន្ត ម្នាក់ជាអ្នកបកប្រែភាសា និងម្នាក់ទៀតសង្ស័យជាម្ចាស់គ្រឿងញៀន ។ ប៉ុន្តែព័ត៌មានបន្ទាប់ត្រូវបានបង្ហើបបន្តថា ឧក្រិដ្ឋជនរត់ពន្ធគ្រឿងញៀននោះមានបក្សពួក៣នាក់សុទ្ធសឹងជាពលរដ្ឋខ្មែរ និង៣នាក់ទៀតស្ថិតក្រោមការពាក់ព័ន្ធលាក់បាំងទំនិញឆ្លងដែនរួមមាន អ្នកបើកបររថយន្តចំនួន២នាក់ និងអ្នកបកប្រែភាសាម្នាក់ដែលកំពុងសួរចម្លើយនៅសមត្ថកិច្ច ។
មន្ត្រីនគរបាលប៉ុស្តិ៍ច្រកទ្វារព្រំដែនត្រពាំងក្រៀលកម្ពុជា-ឡាវ បានឱ្យដឹងថា ការរកឃើញគ្រឿងញៀនទាំងនោះមិនមែនជាការបង្ក្រាបឬជាករណីប្រើវិធានញុះញង់នោះទេ តែជាការត្រួតពិនិត្យរកឃើញ ក្រោមការដឹកនាំពីសំណាក់លោក ញ៉ែម បូរីម នាយប៉ុស្តិ៍ច្រកទ្វារព្រំដែនត្រពាំងក្រៀល រួមជាមួយមន្ត្រីអន្តោប្រវេសន៍ប្រចាំច្រកទ្វារ ។ មន្ត្រីដដែលបន្តថា បន្ទាប់ការត្រួតពិនិត្យឃើញគ្រឿងញៀននៅក្នុងវ៉ាលីសចំនួន៤ នៅលើរថយន្តក្រុងដឹកជញ្ជូនអ្នកដំណើរនៅប៉ុស្តិ៍ច្រកទ្វារ ក៏បានអញ្ជើញកម្លាំងសហការរួមមានតំណាងអង្គភាពគយនិងរដ្ឋាករ ប្រធានស្នាក់ការ៤ មន្ត្រីBLOប្រចាំច្រកទ្វារ ដើម្បីចូលរួមពិនិត្យនិងធ្វើកំណត់ហេតុនៅនឹងកន្លែង ដោយមានការចង្អុលបង្ហាញពីលោកអភិបាលខេត្ត ក្រោមការចុះសម្របសម្រួលផ្ទាល់ពីលោក ច្រឹង ខ្មៅ ព្រះរាជអាជ្ញាអមសាលាដំបូងខេត្ត ក្រឡាបញ្ជី និងស្នងការនគរបាលខេត្ត ។
មន្ត្រីនគរបាលការិយាល័យប្រឆាំងគ្រឿងញៀនខេត្តឱ្យដឹងថា គ្រឿងញៀនទាំងនេះត្រូវបានឧក្រិដ្ឋជនដឹកចេញពីប្រទេសឡាវចូលមកកម្ពុជាតាមច្រកទ្វារអន្តរជាតិត្រពាំងក្រៀលកម្ពុជា-ឡាវ គោលបំណងដឹកឆ្ពោះទៅរាជធានីភ្នំពេញតាមរយៈរថយន្តក្រុមហ៊ុនភ្នំពេញសូរិយា ដឹកជញ្ជូនអ្នកដំណើរ ពីក្រុងប៉ាក់សេ ប្រទេសឡាវ ទៅរាជធានីភ្នំពេញ ប្រទេសកម្ពុជា ។មន្ត្រីដដែលបន្តថា ឧក្រិដ្ឋជនពាក់ព័ន្ធក្នុងករណីរត់ពន្ធគ្រឿងញៀននេះមាន ៖១-ឈ្មោះ ឆិវ ធារ៉ូ ភេទប្រុស អាយុ៣៥ឆ្នាំ មានស្រុកកំណើតនៅខេត្តព្រះវិហារ បច្ចុប្បន្នរស់នៅភូមិត្នោតថ្មី ឃុំសំអាង ស្រុកថាឡាបរិវ៉ាត់ ខេត្តស្ទឹងត្រែង ២-ឈ្មោះ ឆិវ តុងហៃ ភេទប្រុស អាយុ៣៧ឆ្នាំ មានស្រុកកំណើតនៅខេត្តព្រះវិហារ បច្ចុប្បន្នរស់នៅភូមិត្នោតថ្មី ឃុំសំអាង ស្រុកថាឡាបរិវ៉ាត់ (២នាក់នេះជាបងប្អូនបង្កើត) និង៣-ឈ្មោះ ហែម សាវន ភេទប្រុស អាយុ៣៥ឆ្នាំ រស់នៅខេត្តព្រះវិហារ ។
ជនទាំង៣នាក់បានដឹកជញ្ជូនគ្រឿងញៀនចេញពីប្រទេសឡាវ តាមការបញ្ជាពីមេខ្លោងនៅប្រទេសឡាវ យកទៅប្រគល់ឱ្យមេខ្លោងម្នាក់នៅរាជធានីភ្នំពេញ ដោយទទួលកម្រៃឈ្នួលសរុបចំនួន២ម៉ឺនដុល្លារអាមេរិក ។ នេះជាការអះអាងរបស់មន្ត្រីនគរបាលBLOប្រចាំច្រកទ្វារអន្តរជាតិត្រពាំងក្រៀល ។សមត្ថកិច្ចបញ្ជាក់ថា ចំណែកជន៣នាក់ទៀតគ្រាន់តែស្ថិតក្រោមការសង្ស័យប៉ុណ្ណោះដោយសារថា អ្នកបើកបរពុំបានដឹងថារបស់របររបស់ភ្ញៀវមានបង្កប់គ្រឿងញៀនក្នុងវ៉ាលីសនោះទេព្រោះភ្ញៀវជាអ្នកកាន់និងគ្រប់គ្រងថែរក្សាសម្ភារផ្ទាល់ខ្លួន ។ ប្រសិនទំនិញនោះជារបស់បញ្ញើ គឹពួកគាត់ជាអ្នកទទួលខុសត្រូវលើការដឹកជញ្ជូន ។
ចំណែកអ្នកបកប្រែភាសា គឺគេគ្រាន់ជាអ្នកបកប្រែណែនាំភ្ញៀវ ដើម្បីបំពេញបែបបទ ឆ្លងកាត់ប៉ុណ្ណោះ ។ទាក់ទិននឹងករណីរត់ពន្ធគ្រឿងញៀនឆ្លងដែននេះដែរ កាលពីពេលថ្មីៗកន្លងទៅ មានការចរាចរគ្រឿងញៀនចេញពីប្រទេសឡាវមកកាន់ទឹកដីកម្ពុជា ហើយមានថ្នាំញៀនចំនួន៤ដុំស្មើនឹងប្រមាណ៤គីឡូក្រាម ត្រូវបានបង្វិលចូលទៅប្រទេសឡាវវិញ ដោយសារថ្នាំញៀនប្រមាណ៤គីឡូក្រាមនោះមិនសុទ្ធ ហើយត្រូវបានកម្លាំងសមត្ថកិច្ចប្រចាំច្រកទ្វារត្រួតពិនិត្យនិងរឹបអូស។គួរបញ្ជាក់ថា នៅពាក់កណ្តាលឆ្នាំ២០១៨នេះការបង្ក្រាបជំនួញគ្រឿងញៀនឆ្លងដែន កម្លាំងនគរបាលនៃមន្ទីរប្រឆាំងគ្រឿងញៀនក្រសួងមហាផ្ទៃ បង្ក្រាបបានចំនួន៣០គីឡូក្រាម និងបានចាប់ខ្លួនជនជាតិឡាវម្នាក់ ។
នេះជាលើកទី១ហើយសម្រាប់កម្លាំងនគរបាលអន្តោប្រវេសន៍ប៉ុស្តិ៍ច្រកទ្វារព្រំដែនត្រពាំងក្រៀល រួមជាមួយកម្លាំងអង្គភាពពាក់ព័ន្ធប្រចាំច្រកទ្វារព្រំដែនបានត្រួតពិនិត្យជនអន្តោប្រវេសន៍ឆ្លងដែន និងសម្ភារឆ្លងកាត់ ហើយរកឃើញគ្រឿងញៀនមេតំហ្វេតាមីនគ្រីស្តាល់ចំនួន១២០ដុំ ដែលតាមការប៉ាន់ស្មានគឺប្រហែលជាង១០០គីឡូក្រាម ។ករណីរត់ពន្ធគ្រឿងញៀនដ៏ធំនេះ គឺកម្លាំងនគរបាលអន្តោប្រវេសន៍បានរកឃើញ ខណៈអាជ្ញាធរជាតិប្រយុទ្ធប្រឆាំងគ្រឿងញៀនបានធ្វើការដុតបំផ្លាញចោលនូវវត្ថុតាងចាប់យកពី
ជនសង្ស័យ និងជនល្មើសកន្លងមកជាង៦០គីឡូក្រាម ក្នុងឱកាសទិវាអន្តជាតិប្រយុទ្ធប្រឆាំងគ្រឿងញៀន នៅមជ្ឍមណ្ឌលកោះពេជ្រ ក្នុងរាជធានីភ្នំពេញ ។តាមនយោបាយដែលបានប្រកាសរួចហើយនោះ គឺក្រុមមន្ត្រីដែលបង្ក្រាបគ្រឿងញៀនបាន១គីឡូក្រាម នឹងបានរង្វាន់១ម៉ឺនដុល្លារជាការលើកទឹកចិត្តផងដែរ ៕
ចែករំលែកព័តមាននេះ