ខេត្តព្រះសីហនុ ៖ កូនបង្គាចំនួន២លានក្បាលត្រូវបានសាកល្បងចិញ្ចឹមជាលើកដំបូង នៅក្នុងស្រះបែបធម្មជាតិដ៏ធំមួយមានទំហំ៨ហិកតា ដែលមានទីតាំងនៅស្រុកព្រៃនប់ ។ ការបង្កើតឲ្យមានកន្លែងចិញ្ចឹមបង្គានេះ រំពឹងថានឹងចូលរួមចំណែកកាត់បន្ថយការនាំចូលបង្គាពីប្រទេសជិតខាង និងបង្កើតការងារដល់ប្រជាពលរដ្ឋក្នុងមូលដ្ឋានផងដែរ ។
លោក នេន ចំរើន នាយខណ្ឌរដ្ឋបាលជលផលកំពង់សោម បានឲ្យដឹងកាលពីរសៀលថ្ងៃទី២៣ មិថុនា កន្លងមកថា នេះជាលើកទី១ហើយ ដែលស្រុកព្រៃនប់មានការចិញ្ចឹមបង្គាជាលក្ខណៈធម្មជាតិដ៏ធំមិនធ្លាប់មានបែបនេះ ។ លោកនាយខណ្ឌបន្ដថា ៖« ស្រះនេះមានទីតាំងជាប់ទំនប់ការពារទឹកប្រៃ ស្ថិតក្នុងភូមិបឹងជុំ ឃុំបឹងតាព្រហ្ម ស្រុកព្រៃនប់ មានផ្ទៃដីសរុបចំនួន៨ហិកតា ដែលវិនិយោគដោយក្រុមហ៊ុនហេង ហេង ឌីវើឡុបភើមែន ហើយនេះជាដំណាក់កាលទី១ប៉ុណ្ណោះដែលមានការចិញ្ចឹមចំនួន២លានក្បាល » ។
អភិបាលខេត្តព្រះសីហនុ លោក យន្ដ មីន បានសម្តែងការសាទរយ៉ាងខ្លាំងទៅនឹងការបង្កើតទីតាំងភ្ញាស់កូន និងចឹញ្ចឹមបង្គាបង្កាត់ពូជក្នុងស្រុក ដែលនេះគឺជាសកម្មភាពមួយចូលរួមចំណែកយ៉ាងធំធេងដល់សង្គមជាតិ ។ លោកអភិបាលខេត្តបានបន្ដថា ៖« សកម្មភាពនេះ វាបានបង្ហាញអំពីសក្តានុពលដែលខេត្តកំពុងមាន ក៏ដូចជាជួយសម្រួលដល់ជីវភាពរបស់ពលរដ្ឋកម្ពុជា ជាពិសេស បងប្អូននៅក្បែរទីតាំងនេះផ្ទាល់តែម្ដង » ។
តំណាងក្រុមហ៊ុន ហេង ហេង ឌីវើឡុបភើមែន លោក ស៊ិន សត្ថា បានឲ្យដឹងផងដែរថា នេះជាដំណាក់កាលទី១ ដែលអាចចាត់ទុកថា ជាការសាកល្បងក្នុងគម្រោងដ៏ធំមួយសម្រាប់ខេត្តព្រះសីហនុ ហើយនៅថ្ងៃខាងមុខនេះ ក្រុមហ៊ុន នឹងមានគម្រោងពង្រីកស្រះឲ្យបានផ្ទៃដីជាង១០០ហិកតា ដោយមានផែនការចិញ្ចឹមបន្ថែមទៀតដូចជា ត្រី និងក្តាម ជាដើម ដើម្បីកាត់បន្ថយការនាំចូលពីបរទេស ដែលមានតម្លៃខ្ពស់ ហើយពុំមានសុវត្ថិភាព ។
លោកគូសបញ្ជាក់ថា ៖« កូនបង្គាចំនួន២លានក្បាលដែលយកមកលែងនៅក្នុងស្រះធម្មជាតិនេះ មិនមែននាំចូលពីក្រៅប្រទេសនោះទេ គឺយកពីទីតាំងបង្កាត់បង្គាដែលមានមូលដ្ឋាននៅសមុទ្ររាម ឃុំរាម ស្រុកព្រៃនប់ នេះតែម្ដង » ។ លោកបន្ថែមថា ទីតាំងចិញ្ចឹមបង្គានេះ នឹងស្រូបយកកម្លាំងពលកម្មនៅក្នុងមូលដ្ឋានបានមួយចំណែក និងចូលរួមកាត់បន្ថយការចំណាកស្រុករបស់ប្រជាពលរដ្ឋខ្មែរផងដែរ ។
ប្រជាពលរដ្ឋរស់នៅជុំវិញនោះបានសម្តែងការសាទរ និងមានទឹកចិត្តសប្បាយរីករាយបន្ទាប់ពីទទួលបាននូវការងារថ្មីក្បែរលំនៅឋានរបស់ពួកគាត់ ហើយមានតម្លៃខ្ពស់ ពុំចាំបាច់ធ្វើចំណាកស្រុកទៅរកការងារឆ្ងាយៗពីក្រុមគ្រួសារ ៕
ចែករំលែកព័តមាននេះ