រាជធានីភ្នំពេញ ៖ មន្ត្រីជាន់ខ្ពស់ក្រសួងសាធារណការ និងដឹកជញ្ជូនបានបញ្ជាក់ថា ចំណតពហុបំណងនៃកំពង់ផែស្វយ័តក្រុងព្រះសីហនុ គឺជាច្រកទ្វារសេដ្ឋកិច្ចជាតិមួយដ៏សំខាន់សម្រាប់ដោះដូរផលិតផលកសិកម្ម និងកសិ-ឧស្សាហកម្មរបស់កម្ពុជាទៅកាន់ទីផ្សារពិភពលោក ។ លោកទេសរដ្ឋមន្ត្រី ស៊ុន…
រាជធានីភ្នំពេញ ៖ មន្ត្រីជាន់ខ្ពស់ក្រសួងសាធារណការ និងដឹកជញ្ជូនបានបញ្ជាក់ថា ចំណតពហុបំណងនៃកំពង់ផែស្វយ័តក្រុងព្រះសីហនុ គឺជាច្រកទ្វារសេដ្ឋកិច្ចជាតិមួយដ៏សំខាន់សម្រាប់ដោះដូរផលិតផលកសិកម្ម និងកសិ-ឧស្សាហកម្មរបស់កម្ពុជាទៅកាន់ទីផ្សារពិភពលោក ។
លោកទេសរដ្ឋមន្ត្រី ស៊ុន ចាន់ថុល រដ្ឋមន្ត្រីក្រសួងសាធារណការ និងដឹកជញ្ជូន បានថ្លែងបែបនេះនៅក្នុងពិធីសម្ពោធដាក់ឲ្យដំណើរការជាផ្លូវការនូវចំណតពហុបំណងនៃកំពង់ផែស្វយ័តក្រុងព្រះសីហនុ កាលពីព្រឹកថ្ងៃទី២៥ មិថុនា ម្សិលមិញ ក្រោមអធិបតីភាពដ៏ខ្ពង់ខ្ពស់ពីសំណាក់សម្ដេចតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា ។ លោកទេសរដ្ឋមន្ត្រីបានបន្ដថា ៖« ចំណតពហុបំណងនេះ បានតភ្ជាប់ទៅកាន់ផ្លូវជាតិលេខ២, លេខ៣, លេខ៤, ផ្លូវរថភ្លើង និងជាពិសេស ផ្លូវល្បឿនលឿនពីភ្នំពេញមកកាន់ខេត្តព្រះសីហនុ ដែលគ្រោងបើកការដ្ឋានសាងសង់ឆាប់ៗខាងមុខនេះ ។ ទន្ទឹមនឹងនេះ ចំណតផែនេះអាចអនុញ្ញាតឲ្យនាវាដឹកទំនិញកាន់តែធំជាងមុន ដែលមានចំណុះដល់៥ម៉ឺនតោនអាចចូលចតបាន » ។
លោកបញ្ជាក់ថា ៖« ជារួម ការតភ្ជាប់ទៅនឹងផ្លូវគមនាគមន៍សំខាន់ៗ និងការធ្វើឲ្យប្រសើរឡើងនូវសមត្ថភាពរបស់កំពង់ផែ បានធ្វើឲ្យកំពង់ផែក្រុងព្រះសីហនុ កាន់តែដើរតួនាទីយ៉ាងសំខាន់ក្នុងការដឹកជញ្ជូនទំនិញបានឆាប់រហ័ស និងតម្លៃថោក សំដៅលើកកម្ពស់សមត្ថភាពប្រកួតប្រជែងរបស់កម្ពុជាជាមួយប្រទេសជិតខាង និងក្នុងតំបន់ » ។ ចំណតផែពហុបំណងនេះ បានចាប់ផ្ដើមអនុវត្តការងារសាងសង់កាលពីថ្ងៃទី១ មករា ២០១៥ និងបញ្ចប់រួចរាល់កាលពីថ្ងៃទី៦ មិថុនា ឆ្នាំ២០១៨នេះ ក្រោមហិរញ្ញប្បទានសម្បទានពីរដ្ឋាភិបាលជប៉ុន តាមរយៈទីភ្នាក់ងារសហប្រតិបត្តិការអន្តរជាតិនៃប្រទេសជប៉ុន (JICA) រួមជាមួយថវិកាបដិភាគរបស់រាជរដ្ឋាភិបាលកម្ពុជា ។
លោកទេសរដ្ឋមន្ត្រី ស៊ុន ចាន់ថុល បានគូសបញ្ជាក់ថា ៖« គម្រោងសាងសង់ចំណតផែពហុបំណងនៃកំពង់ផែក្រុងព្រះសីហនុ មានដូចជា ចំណតផែទំនិញលក់រាយប្រវែង៣៣០ម៉ែត្រ ជម្រៅទឹក១៣ម៉ែត្រកន្លះ, ចំណតផែមូលដ្ឋានផ្គត់ផ្គង់ភស្ដុភារសម្រាប់ការរុករកប្រេង ប្រវែង២០០ម៉ែត្រ ជម្រៅទឹក៧ម៉ែត្រកន្លះ និងការផ្គត់ផ្គង់នាវាសណ្តោង (Tugboat) ក្រោមហិរញ្ញប្បទានសម្បទាន មានទឹកប្រាក់សរុបប្រមាណ៧៤លានដុល្លារអាមេរិកពីរដ្ឋាភិបាលជប៉ុន តាមរយៈទីភ្នាក់ងារសហប្រតិបត្តិការអន្តរជាតិជប៉ុន (JICA) ក្នុងក្របខ័ណ្ឌនៃការអនុវត្តគម្រោងអភិវឌ្ឍន៍ចំណតផែពហុបំណងកំពង់ផែក្រុងព្រះសីហនុ រួមជាមួយថវិកាបដិភាគរបស់រាជរដ្ឋាភិបាលសម្រាប់ទទួលបន្ទុកលើការបង់ពន្ធ និងអាករផ្សេងៗ » ។ ចំណុចសំខាន់នៃកំពង់ផែនេះ នឹងអាចស្រូបយកចំណែកនៃទីផ្សាររហូតដល់ជាង៧០% នៃការចរាចរទំនិញចេញ-ចូលសរុបរបស់កម្ពុជា ។ ម្យ៉ាងវិញទៀត ចំណតផែពហុបំណងនេះនឹងជួយគាំទ្រដល់មូលដ្ឋានភស្ដុភារសម្រាប់ផ្គត់ផ្គង់រុករកប្រេង និងការធ្វើអាជីវកម្មប្រេងក្នុងដែនសមុទ្រកម្ពុជា ដែលនឹងជួយជំរុញដល់ការអភិវឌ្ឍឧស្សាហកម្មប្រេងនៅកម្ពុជាផងដែរ ។
ថ្លែងនាឱកាសនោះ សម្ដេចតេជោ ហ៊ុន សែន បានវាយតម្លៃខ្ពស់ចំពោះវឌ្ឍនភាពនៃកំពង់ផែស្វយ័តក្រុងព្រះសីហនុ ដែលកាលពីមុន មានសមត្ថភាពអនុញ្ញាតឲ្យនាវាដឹកទំនិញចំណុះតែ១ម៉ឺនតោនប៉ុណ្ណោះ ដែលជាការលំបាកសម្រាប់ការដឹកជញ្ជូននៅក្នុងប្រទេស តែពេលនេះ អាចឲ្យនាវាចំណុះ៥ម៉ឺនតោនចូលចតបាន ។ ទោះយ៉ាងនេះក្ដី សម្តេចបានថ្លែងបញ្ជាក់ថា ៖«ចំនួននេះ ថ្វីដ្បិតតែវាមិនទាន់គ្រប់គ្រាន់ ក៏ប៉ុន្ដែវាល្អប្រសើរជាងការដែលយើងដឹកត្រឹម១ម៉ឺនតោន ហើយក៏សូមបញ្ជាក់ជូនដែរថា យើងមិនស្កប់ស្កល់ត្រឹមប៉ុណ្ណឹងទេ យើងត្រូវធ្វើបន្ដទៀត ដើម្បីឲ្យជម្រៅទឹកឈានទៅដល់១៤ម៉ែត្រកន្លះ អាចចូលនាវាបានរហូតដល់៦ម៉ឺនតោន » ។ បើតាមការអះអាងពីលោកទេសរដ្ឋមន្ត្រី ស៊ុន ចាន់ថុល ដើម្បីឆ្លើយតបនឹងការរីកចម្រើននៃបរិមាណកុងតឺន័រឆ្លងកាត់កំពង់ផែនាពេលបច្ចុប្បន្ន និងពេលអនាគត កំពង់ផែស្វយ័តក្រុងព្រះសីហនុ គ្រោងនឹងពង្រីកសមត្ថភាពកំពង់ផែបន្ថែមទៀត តាមរយៈការសាងសង់ផែកុងតឺន័រថ្មីមួយទៀត ដែលមានជម្រៅទឹក១៤ម៉ែត្រកន្លះ ប្រវែង៣៥០ម៉ែត្រ ដែលគ្រោងនឹងសាងសង់នៅឆ្នាំ២០១៩ ហើយគ្រោងនឹងបញ្ចប់នៅចុងឆ្នាំ២០២២ ឬដើមឆ្នាំ២០២៣ ដែលមានទឹកប្រាក់ប្រមាណ២០៣លានដុល្លារអាមេរិក ។
លោក ស៊ុន ចាន់ថុល ថ្លែងថា ៖« កំពង់ផែទឹកជ្រៅនេះ នឹងធានាដល់ការចូលចតនាវាកុងតឺន័រខ្នាតធំចំណុះ៦ម៉ឺនតោន រហូតដល់៩៣%នៃចំនួននាវាប្រចាំតំបន់អាស៊ីប៉ាស៊ីហ្វិកនៅដើមឆ្នាំ២០២៣ ។ ជាងនេះទៅទៀត កំពង់ផែនេះនឹងក្លាយជាកំពង់ផែលំដាប់មធ្យម ដោយមានកុងតឺន័រឆ្លងកាត់លើសពី១លានTEU ក្នុង១ឆ្នាំ ។ រីឯតម្លៃដឹកជញ្ជូនតាមសមុទ្រទៅមកកម្ពុជា នឹងកាន់តែចុះទាបប្រហាក់ប្រហែលនឹងតម្លៃដឹកជញ្ជូនតាមសមុទ្រនៃប្រទេសជិតខាង » ។
លោក Bessho Kenichi ភារធារីស្ដីទីនៃស្ថានទូតជប៉ុនប្រចាំកម្ពុជា ក៏បានឲ្យដឹងដែរថា សេដ្ឋកិច្ចកម្ពុជាបច្ចុប្បន្ននេះ បាននិងកំពុងរក្សាបាននូវអត្រាកំណើនខ្ពស់ក្នុងរង្វង់៧% ហើយការដឹកជញ្ជូនទំនិញ និងពាណិជ្ជកម្ម គឺជាកត្តាមួយដ៏សំខាន់ក្នុងការទ្រទ្រង់ការរីកចម្រើនលូតលាស់នៃសេដ្ឋកិច្ចនេះ ។
លោកថ្លែងថា ៖« បរិមាណទំនិញឆ្លងកាត់កំពង់ផែស្វយ័តក្រុងព្រះសីហនុ ដែលជាកំពង់ផែទឹកជ្រៅធំតែមួយគត់របស់កម្ពុជា កំពុងមានការកើនឡើងខ្ពស់ ដែលធ្វើឲ្យតួនាទីកំពង់ផែនេះកាន់តែមានសារសំខាន់នាពេលអនាគត » ។
លោកបន្ដថា កំពង់ផែស្វយ័តក្រុងព្រះសីហនុ មានសារសំខាន់យ៉ាងខ្លាំង ដើម្បីពង្រឹងការតភ្ជាប់តំបន់មេគង្គ និងតំបន់អាស៊ានទាំងមូល ដែលនេះគឺជាកិច្ចការនិមិត្តរូបដ៏ធំមួយក្នុងចំណោមគម្រោងកិច្ចសហប្រតិបត្តិការរបស់ជប៉ុននៅកម្ពុជា ។ រដ្ឋាភិបាលជប៉ុនបាននិងកំពុងធ្វើគម្រោងកិច្ចសហប្រតិបត្តិការផ្សេងៗសម្រាប់កំពង់ផែស្វយ័តក្រុងព្រះសីហនុជាបន្ដបន្ទាប់ ។ កាលពីខែមិថុនាឆ្នាំមុន JICAបានទិញភាគហ៊ុនមួយផ្នែកពីកំពង់ផែស្វយ័តក្រុងព្រះសីហនុ ដើម្បីពង្រឹកបន្ថែមពីលើកិច្ចសហប្រតិបត្តិការដែលមានរហូតដល់បច្ចុប្បន្ន ព្រមទាំងរួមចំណែកដល់ការជំរុញពាណិជ្ជកម្មនៅកម្ពុជា ។
គួរកត់សម្គាល់ថា ក្នុងរយៈពេល៥ឆ្នាំចុងក្រោយនេះ បរិមាណកុងតឺន័រឆ្លងកាត់កំពង់ផែស្វយ័តក្រុងព្រះសីហនុ បានកើនឡើងជាមធ្យម១២,៦៥% ។ ចំណែកឆ្នាំ២០១៧កន្លងទៅនេះ បរិមាណកុងតឺន័រឆ្លងកាត់កំពង់ផែ មានចំនួន៤៥៩.៨៣៤TEU(ចំណុះនៃកុងតឺន័រ) ដែលមានកំណើនប្រមាណ១៥%ធៀបនឹងឆ្នាំ២០១៦ ។ ដោយឡែក រយៈពេល៥ខែ ដើមឆ្នាំ២០១៨នេះ បរិមាណកុងតឺន័រឆ្លងកាត់មានចំនួន២០៧.០៤៧ TEU ដែលមានកំណើនជិត២០% ធៀបនឹងរយៈពេលដូចគ្នាកាលពីឆ្នាំ២០១៧ ៕
ចែករំលែកព័តមាននេះ