រាជធានីភ្នំពេញ ៖ ក្រោយពេលទទួលដំណឹងថាកញ្ញាអាលីយ៉ា មានជំងឺធ្ងន់ធ្វើឲ្យអ្នកសិល្បៈមានការភ្ញាក់ផ្អើល។ ម្នាក់ៗមិនទុកនាងចោលឡើយ ដោយមិត្តសិល្បៈ និងសមាគមសិល្បៈបានទៅសួរសុខទុក្ខនាង ។
កញ្ញាឌួង ហ្សូរីដាបានសរសេរលើទំព័រហ្វេសបុករបស់នាងកាលពីថ្ងៃទី២៣ មិថុនា ២០១៨ ថា «វាសនាមនុស្សមិនទៀង..! គ្មានពាក្យអ្វីត្រូវនិយាយលើសពីអាណិត..! ជំងឺបាក់ទឹកចិត្ត ប្រែក្លាយមនុស្សប្រកបដោយសមត្ថភាព ទេពកោសល្យម្នាក់ ធ្លាក់ខ្លួនដល់ថ្នាក់ដើរដេកតាមចិញ្ចើមថ្នល់ ខ្វះអាហារហូបចុក រស់ដោយសារតែគ្រឿងកំប៉ុង និងមីស្រុស…!
ខ្ញុំធ្លាប់ផ្តល់ឱកាសការងារជាច្រើនឲ្យគាត់ធ្វើការកន្លងមកជាមួយក្រុមការងារខ្ញុំ តែក៏បាត់គាត់មួយរយៈធំ នឹកស្មានតែគាត់បានវិលទៅជួបជុំម្តាយចិញ្ចឹម ឬបងប្អូនគាត់វិញហើយ មិននឹកស្មានថាធ្លាក់ខ្លួនឈឺដល់ថ្នាក់នេះសោះ ។
ទឹកចិត្តបន្តិចបន្តួចជាការផ្តល់ជូនគាត់នាពេលនេះវាមិនច្រើនទេ តែសំខាន់ស្ទើរតែស្រក់ទឹកភ្នែកពេលគាត់ឃើញខ្ញុំលើកយកកន្ត្រកទឹកមាត់ត្រចៀកកាំហុចឲ្យគាត់ គាត់ប្រាប់ថា ឃ្លានណាស់យាយហ្សូ អើយ ចង់ញ៉ាំអាហ្នឹងយូរហើយ តែអត់មានលុយទិញ ។
ឥឡូវក្នុងនាមជាមិត្តភក្តិម្នាក់បានផ្តាំថា ត្រឹមអាហារហូបចុក សូមឲ្យគាត់ប្រាប់មក សម័យតេជោទៅហើយ ដាច់ខាតមិនអាចឲ្យប្រជាជនដាច់ពោះស្លាប់នឹងការអត់ឃ្លាន អត់អាហារឡើយ …! ខ្ញុំសុំឲ្យគាត់ខិតខំប្រឹងព្យាបាលខ្លួនអោយជា បំភ្លេចរឿងអតីតកាលឲ្យអស់ កសាងជីវិតថ្មី ឲ្យតែមានកម្លាំង មានជីវិត ការងារមិនខ្វះធ្វើទេ លុយក៏មិនខ្វះចាយ បាយទឹកក៏មិនខ្វះហូបដែរ សំខាន់ត្រូវក្រោកឈរ រឹងមាំ…! »។
កញ្ញាស៊ូ ដាណេ តារាចម្រៀងមនោសញ្ចេតនាក្រោយឃើញសភាពអាលីយ៉ាបែបនោះក៏មានអារម្មណ៍ស្លុតណាស់ដែរ ។ នាងបានប្រមូលប្រាក់ជាមួយមិត្តជិតដិតបានមួយចំនួនមានទាំងប្រាក់ដុល្លារ និងប្រាក់រៀលយកទៅជួយឌីជេអាលីយ៉ា ។ នាងបានផ្តែផ្តាំជូនពរអាលីយ៉ា ឲ្យតស៊ូមានកម្លាំងចិត្តឡើងវិញត្រូវយកឈ្នះឧបសគ្គឲ្យបាន ។
អ្នកដឹកនាំសម្តែងប្រចាំស្ថានីទូរទស្សន៍ហង្សមាស លោកកៅ សីហា បានទៅកាន់មន្ទីរពេទ្យកាល់ម៉ែត ក្រោយដឹងថាឌីជេធ្លាប់ល្បីឈ្មោះកញ្ញាអាលីយ៉ាធ្លាក់ខ្លួនឈឺធ្ងន់ ។ លោកបានសម្តែងទឹកចិត្តសោកស្តាយមិនគួរអាលីយ៉ាទៅជាបែបនេះទេ ។ លោកកៅ សីហា ក៏ធ្លាប់រួមការងារជាមួយឌីជេអាលីយ៉ាកាលពីជិត១០ឆ្នាំមុនដោយលោកយល់ថានាងមានសមត្ថភាពខ្លាំងគួរឲ្យកត់សម្គាល់ ។ លោកសីហា បានសរសេរលើហ្វេសប៊ុកថា«ឆ្លៀតពេលមកមើលDjអាលីយ៉ា ! ឃើញហើយស្លុតចិត្តណាស់ មិនគួរមនុស្សរឹងមាំ ធ្លាក់ខ្លួនមួយរំពេចភ្នែក ហើយសុខចិត្តសម្ងំរស់នៅក្រៅពិភពសង្គមសិល្បៈជាង៣ឆ្នាំតែម្នាក់ឯងរហូតដល់ដំណាក់កាលនេះ ។
បីនាក់ខ្ញុំជាមួយប្អូនស្រីលី ចាន់សីហា និងគន្ឋហ្វូតូស៊ីធី មិត្ត ចាស់ៗជាមួយគ្នាជាង១០ឆ្នាំមកនេះបានប្រាក់ម្នាក់បន្ដិចបន្តួចតាមលទ្ឋភាពដែលមានសម្រាប់ជួយដល់នាង សរុបបាន១០០ដុល្លារ និង១០ម៉ឺនរៀល »។ អាលីយ៉ា កំពុងសម្រាកនៅបន្ទប់សង្គ្រោះបន្ទាន់នៃមន្ទីរពេទ្យកាល់ម៉ែត ហើយស្ថានភាពជើងរបស់នាងគឺស្វិតទាំងសងខាងដើរមិនរួច ចំណែកឯជំងឺរលាកទងសួតគឺធ្ងន់ ៕
ចែករំលែកព័តមាននេះ