រាជធានីភ្នំពេញ ៖ ក្នុងរយៈពេល៥ខែដើមឆ្នាំនេះ អគ្គនាយកដ្ឋានពន្ធដារប្រមូលចំណូលពន្ធបង់ចូលថវិកាជាតិ បានជាង១ពាន់លានដុល្លារអាមេរិក កើនឡើងជាង១២%។ នេះបើយោងតាមរបាយការណ៍ផ្លូវការរបស់អគ្គនាយកដ្ឋានពន្ធដារ នៃក្រសួងសេដ្ឋកិច្ច និងហិរញ្ញវត្ថុ ។…
រាជធានីភ្នំពេញ ៖ ក្នុងរយៈពេល៥ខែដើមឆ្នាំនេះ អគ្គនាយកដ្ឋានពន្ធដារប្រមូលចំណូលពន្ធបង់ចូលថវិកាជាតិ បានជាង១ពាន់លានដុល្លារអាមេរិក កើនឡើងជាង១២%។ នេះបើយោងតាមរបាយការណ៍ផ្លូវការរបស់អគ្គនាយកដ្ឋានពន្ធដារ នៃក្រសួងសេដ្ឋកិច្ច និងហិរញ្ញវត្ថុ ។
របាយការណ៍នេះត្រូវបានប្រកាសឲ្យដឹងនៅក្នុងកិច្ចប្រជុំបូកសរុបលទ្ធផលប្រមូលចំណូលពន្ធ ប្រចាំខែឧសភា ឆ្នាំ២០១៨ ព្រមទាំងទិសដៅសម្រាប់អនុវត្តបន្តរបស់អគ្គនាយកដ្ឋានពន្ធដារ កាលពីថ្ងៃទី២២ មិថុនា កន្លងមក នៅសាលប្រជុំសាលាជាតិពន្ធដារ នៃអគ្គនាយកដ្ឋានពន្ធដារ ។ ក្នុងឱកាសនោះ លោក គង់ វិបុល ប្រតិភូរាជរដ្ឋាភិបាល ទទួលបន្ទុកជាអគ្គនាយកនៃអគ្គនាយកដ្ឋានពន្ធដារ បានបង្ហាញថា រយៈពេល៥ខែដើមឆ្នាំ២០១៨នេះ (ចាប់ពីខែមករា ដល់ខែឧសភា) អគ្គនាយកដ្ឋានពន្ធដារប្រមូលចំណូលពន្ធ-អាករបានចំនួន៤.១៧១,៨២ប៊ីលានរៀល ស្មើប្រមាណជា១.០៤២,៩៦លានដុល្លារអាមេរិក ឬស្មើនឹង៥៤,២៣% ។ បើធៀបនឹង៥ខែដើមឆ្នាំ២០១៧កន្លងមកឃើញថា កើនឡើងចំនួន៤៥២,០៥ប៊ីលានរៀល (ប្រមាណ១១៣លានដុល្លារអាមេរិក) ស្មើនឹង១២,១៥% ។
ជាមួយនឹងលទ្ធផលប្រមូលពន្ធអាករមានកំណើនល្អបែបនេះ លោកក៏បានណែនាំបន្ថែមដល់គ្រប់អង្គភាព ឱ្យបន្តខិតខំពង្រឹងការអនុវត្តច្បាប់ វិន័យការងារ និងត្រូវមានភាពទន់ភ្លន់ តែម៉ឺងម៉ាត់ដោយផ្អែកលើទិដ្ឋភាពច្បាប់ ក្នុងការឆ្លើយតបទៅកាន់អ្នកជាប់ពន្ធ សំដៅឱ្យពួកគាត់រីករាយទទួលយក និងស្ម័គ្រចិត្តបង់ពន្ធគ្រប់ៗគ្នា ធ្វើយ៉ាងណា កាត់បន្ថយជាអតិបរមានូវការរអ៊ូរទាំរបស់អ្នកជាប់ពន្ធ និងផ្តល់កិច្ចសហការល្អក្នុងការបង់ពន្ធ ជូនប្រជាពលរដ្ឋ ដោយបានដាក់ចេញនូវវិធានការមួយចំនួនដូចជា ៖
១-បន្តអនុវត្តប្រកបដោយប្រសិទ្ធភាពខ្ពស់ថែមទៀតសម្រាប់ឆ្នាំចុងក្រោយនេះ នូវយុទ្ធសាស្ត្រកៀរគរចំណូលរយៈពេលមធ្យមរបស់រាជរដ្ឋាភិបាល ឆ្នាំ២០១៤-២០១៨ ។
២-គ្រោងនឹងដាក់ឱ្យដំណើរការនូវប្រព័ន្ធផ្សាយបន្តផ្ទាល់នៃកិច្ចប្រជុំ ដែលផ្តល់លទ្ធភាពដល់ថ្នាក់់ដឹកនាំ និងមន្ត្រីនៅតាមសាខាពន្ធដារខេត្ត-ខណ្ឌនានាអាចមើល និងទទួលបានព័ត៌មានផ្ទាល់អំពីកិច្ចប្រជុំនានារបស់អគ្គនាយកដ្ឋានផងដែរ ។
៣-បន្តពង្រឹងការចុះបញ្ជីពន្ធដារ និងធ្វើបច្ចុប្បន្នភាពព័ត៌មានសហគ្រាសឱ្យកាន់តែប្រសើរឡើងថែមទៀត ដោយក្នុងនោះក៏ត្រូវពង្រឹងតាមដានសហគ្រាសទាំងឡាយ ដែលប្រើប្រាស់រូបភាពមានអ្នកឈរឈ្មោះជំនួស ព្រមទាំងបន្តការងារជំរុញការចុះបញ្ជីពន្ធដារចំពោះសហគ្រាសដែលមិនទាន់បានចុះបញ្ជីនៅតាមបណ្តាខេត្ត-ខណ្ឌទាំងអស់ ។
៤-បន្តពង្រឹងចាត់វិធានការចំពោះការគេចវេះពន្ធគ្រប់រូបភាព ដោយសហការជាមួយស្ថាប័នពាក់ព័ន្ធ ដើម្បីប្រមូលព័ត៌មានបន្ថែមសម្រាប់ជាមូលដ្ឋានក្នុងការកំណត់ពន្ធ ចំពោះក្រុមហ៊ុនដែលប្រកាសបង់ពន្ធមិនស្មោះត្រង់ ឬគេចវេះពន្ធតាមគ្រប់រូបភាព ។ ពង្រឹងតាមដានការចាត់ចែងលិខិតប្រកាស ជាពិសេស នៅតាមបណ្តាខេត្ត-ខណ្ឌនានា ។
៥-បន្តពង្រឹង និងធ្វើឱ្យប្រសើរឡើងថែមទៀតលើការបង្វិលសងអាករលើតម្លៃបន្ថែមជូនស្ថានទូត អង្គការអន្តរជាតិ ក៏ដូចជាសហគ្រាសនានា ក្នុងនោះអគ្គនាយកដ្ឋានពន្ធដារ ក៏បានសម្រួលនីតិវិធីនៃការបង្វិលសងស្របតាមប្រកាសលេខ៥៧៦ សហវ.ប្រក ចុះថ្ងៃទី១៩ ខែមិថុនា ឆ្នាំ២០១៨ និងប្រកាសលេខ៥៧៧ សហវ.ប្រក ចុះថ្ងៃទី១៩ ខែមិថុនា ឆ្នាំ២០១៨ ។
៦-សហការជាមួយអគ្គនាយកដ្ឋានគោលនយោបាយនៃក្រសួងសេដ្ឋកិច្ចនិងហិរញ្ញវត្ថុ និងស្ថាប័នពាក់ព័ន្ធ ដើម្បីរៀបចំយុទ្ធសាស្ត្រកែទម្រង់ពន្ធដារ ដោយផ្តោតការយកចិត្តទុកដាក់ជាសំខាន់លើកិច្ចការកៀរគរចំណូល និងការលើកទឹកចិត្តពន្ធចំពោះវិស័យធុរកិច្ចមួយចំនួន ។
៧-បន្តកែទម្រង់ធនធានមនុស្ស តាមរយៈការពង្រឹងការគ្រប់គ្រងវាយតម្លៃក្នុងប្រព័ន្ធគ្រប់គ្រងធនធានមនុស្ស និងត្រៀមដាក់ឱ្យប្រើប្រាស់នូវប្រព័ន្ធវាយតម្លៃធនធានមនុស្សពេញលេញ ដែលនឹងត្រៀមដាក់ឱ្យប្រើប្រាស់ក្នុងពេលឆាប់ៗខាងមុខ ព្រមទាំងបន្តពង្រឹងអភិបាលកិច្ចល្អ កែប្រែផ្តត់គំនិតរបស់មន្ត្រីពន្ធដារឱ្យក្លាយជាអ្នកបម្រើសេវាជូនអ្នកជាប់ពន្ធបានល្អ ក្លាយជាមន្ត្រីដែលពោរពេញដោយសមត្ថភាព ជំនាញ និងទេពកោសល្យ ស្មោះត្រង់ មានភាពម្ចាស់ការ ព្រមទាំងមានមនសិការវិជ្ជាជីវៈខ្ពស់ក្នុងការបំពេញភារកិច្ចការងារ ។
៨-បន្តជំរុញអនុវត្តឱ្យកាន់តែស៊ីជម្រៅថែមទៀតនូវកំណែទម្រង់សំខាន់ៗ ដើម្បីបង្កើនប្រសិទ្ធភាព និងស័ក្តិសិទ្ធិភាពនៃការផ្តល់សេវាសាធារណៈជូនអ្នកជាប់ពន្ធ ។
៩-បន្តធ្វើទំនើបកម្មប្រព័ន្ធព័ត៌មានវិទ្យា ដោយពង្រឹងនូវការប្រើប្រាស់ ការធ្វើសវនកម្មសហគ្រាសតាមប្រព័ន្ធ ពង្រីកការប្រើប្រាស់ប្រព័ន្ធតាមដានឯកសារ (Tracking Document System) គ្រប់អង្គភាពក្រោមឱវាទអគ្គនាយកដ្ឋានពន្ធដារ ទូទាំងប្រទេស ដើម្បីបង្កភាពងាយស្រួលដល់អ្នកជាប់ពន្ធ ។
១០-បន្តធ្វើបច្ចុប្បន្នភាពព័ត៌មានអចលនទ្រព្យនៅរាជធានីភ្នំពេញ និងតំបន់ដែលជាកម្មវត្ថុនៃពន្ធលើអចលនទ្រព្យ ។
១១-បន្តខិតខំប្រមូលបំណុលពន្ធដែលនៅរ៉ាំរ៉ៃជាយូរឆ្នាំ និងពង្រឹងការយកចិត្តទុកដាក់ក្នុងការធ្វើសវនកម្មចំពោះសហគ្រាសធំៗ ដែលមានហានិភ័យខ្ពស់ក្នុងការបាត់បង់ចំណូលពន្ធ ដោយសារតែប្រកាសបង់ពន្ធក្នុងកម្រិតទាប មិនឆ្លើយតបនឹងសកម្មភាពអាជីវកម្មរបស់ខ្លួន ឬប្រកាសខាតជាច្រើនឆ្នាំ ៕
ចែករំលែកព័តមាននេះ