រាជធានីភ្នំពេញ ៖ គណៈកម្មាធិការជាតិរៀបចំការបោះឆ្នោតជ្រើសតាំងអ្នកតំណាងរាស្ត្រហៅកាត់ថា គ.ជ.ប បានអំពាវនាវ និងស្នើមន្ត្រីបោះឆ្នោតគ្រប់លំដាប់ថ្នាក់ទាំងអស់ត្រូវប្រកាន់ជំហរអព្យាក្រឹតឥតលម្អៀង ។ នេះបើសេចក្តីប្រកាសព័ត៌មានរបស់គ.ជ.ប ។
លោកទេព នីថា អគ្កលេខាធិការ គ.ជ.ប បានលើកក្នុងសេចក្តីប្រកាសព័ត៌មានរបស់គ.ជ.បចេញផ្សាយនៅថ្ងៃទៅទី២៤ មិថុនា ឆ្នាំ២០១៨ ថា មន្ត្រីគ្រប់លំដាប់ថ្នាក់ត្រូវយកចិត្តទុកដាក់អនុវត្តការងាររៀបចំការបោះឆ្នោតជ្រើសតាំងតំណាងរាស្ត្រនីតិកាលទី៦ដែលនឹងប្រព្រឹត្តទៅនៅថ្ងៃអាទិត្យថ្ងៃទី២៩ ខែកក្កដា ឆ្នាំ២០១៨ ក្នុងជំហរអព្យាក្រឹត្យឥតលម្អៀង ដើម្បីសម្រេចបានការបោះឆ្នោតមួយប្រកបដោយលក្ខណសេរីត្រឹមត្រូវ និងយុត្តិធម៌ ។
លោកទេព នីថា បានលើកឡើងក្នុងវគ្គបណ្តុះបណ្តាលស្តីពីការបោះឆ្នោតការរាប់សន្លឹកឆ្នោត និងការបូកសរុបលទ្ធផលនៃការបោះឆ្នោតរយៈពេលបីថ្ងៃនៅវិទ្យាស្ថានជាតិអប់រំក្នុងរាជធានីភ្នំពេញ ។ លោកទេព នីថាបានបញ្ជាក់ថា« តាមរយៈការបណ្តុះបណ្តាលនេះខ្ញុំមានជំនឿរយ៉ាងមុតមាំថា អ្នកចូលរួមទាំងអស់នឹងទទួលបាននូវចំណេះដឹងថ្មីៗបន្ថែមទៀត ដើម្បីជាមូលដ្ឋានក្នុងការអនុវត្ត និងចូលរួមអនុវត្តការងារនៅតាមរាជធានីខេត្ត ពិសេសការអនុវត្តបន្តការងារបណ្តុះបណ្តាលជូនដល់មន្ត្រីបោះឆ្នោត នៅតាមថ្នាក់រាជធានីខេត្តថ្នាក់ឃុំសង្កាត់ និងការរិយាល័យបោះឆ្នោត ដើម្បីឲ្យមន្ត្រីបោះឆ្នោតទាំងអស់នោះអាចអនុវត្តតួនាទី និងភារកិច្ចរបស់ខ្លួនបានត្រឹមត្រូវ មានគណនេយ្យភាព និងភាពអាចម្ចាស់ការបានទាំងទ្រឹស្តី និងការអនុវត្ត» ។ លោកក៏បានអំពាវនាវដល់គ្រប់ភាគីពាក់ព័ន្ធទាំងអស់សូមធ្វើការសហការ និងបន្តសហការតាមតួនាទី ជាមួយ គ.ជ.បក៏ដូចជា គណៈកម្មាការរៀបចំការបោះឆ្នោតគ្រប់លំដាប់ថ្នាក់ ដើម្បីអនុវត្តសម្រេចការងាររៀបចំការបោះឆ្នោត និងបានអំពាវនាវដល់ប្រជាពលរដ្ឋខ្មែរទាំងអស់ដែលមានឈ្មោះក្នុងបញ្ជីបោះឆ្នោត សូមអញ្ជើញទៅបោះឆ្នោតឲ្យបានគ្រប់គ្នា ដើម្បីជ្រើសតំណាងថ្នាក់ដឹកនាំប្រទេសព្រោះការបោះឆ្នោតគឺជាមូលដ្ឋានគ្រឹះនៃការអនុវត្តគោលការណ៍លទ្ធិប្រជាធិបតេយ្យសេរីពហុបក្ស ។
សូមជម្រាបថា វគ្គបណ្តុះបណ្តាលត្រូវបានគ្រូឧទ្ទេសជំនាញរបស់គ.ជ.ប បានបង្ហាញលើប្រធានបទដូចជា សមាសមាភាព រចនាសម្ព័ន្ធ តួនាទី និងភារកិច្ចរបស់គណៈកម្មាធិការ ការិយាល័យបោះឆ្នោត គណៈកម្មការឃុំ សង្កាត់រៀបចំការបោះឆ្នោត គណៈកម្មការរាជធានី ខេត្តរៀបចំការបោះឆ្នោត ។ នីតិវិធីនៃការបោះឆ្នោតការបិទការបោះឆ្នោតការរាប់សន្លឹកឆ្នោត និងការត្រួតពិនិត្យ និងបូកសរុបលទ្ធផលនៃការបោះឆ្នោត ព្រមទាំងការវេចខ្ចប់ និងប្រគល់ទទួលសម្ភារឯកសារសម្រាប់បម្រើឲ្យការបោះឆ្នោត ។ ឯកសារសម្រាប់ប្រើប្រាស់ក្នុងការបោះឆ្នោតព្រមទាំងនីតិវិធីនៃការស្នើសុំ និងការចេញឯកសារបញ្ជាក់អត្ថសញ្ញាណបម្រើឲ្យការបោះឆ្នោត ។ នីតិវិធីនៃការដាក់ការទទួល និងការដោះស្រាយពាក្យបណ្តឹងក្នុងដំណើរការបោះឆ្នោត ៕
ចែករំលែកព័តមាននេះ