រាជធានីភ្នំពេញ ៖ ជនសង្ស័យ២នាក់ត្រូវបានកម្លាំងនគរបាលប៉ុស្តិ៍រដ្ឋបាលនគរបាលបឹងទំពុនទី២ ធ្វើការឃាត់ខ្លួនបន្តនីតិវិធី ក្រោយកម្លាំងឆែកឆេររកឃើញមានថ្នាំញៀនក្នុងខ្លួនជនសង្ស័យទាំង២នាក់ កាលពីវេលាម៉ោង១០យប់ថ្ងៃទី២៣ ខែមិថុនា ឆ្នាំ២០១៨ នៅតាបណ្តោយផ្លូវ៩៨BT ក្នុងក្រុមទី៥ ភូមិត្នោតជ្រុំ៤ សង្កាត់បឹងទំពុន២ ខណ្ឌមានជ័យ ។ ជនសង្ស័យទាំង២នាក់ ម្នាក់ឈ្មោះយ៉ុន វុទ្ធា ហៅទូច ភេទប្រុស អាយុ២៣ឆ្នាំ មុខរបរមិនប្រាកដ មានស្រុកកំណើតភូមិត្រពាំងព្រីង ឃុំត្រពាំងព្រីង ស្រុកកោះសូទិន ខេត្តកំពង់ចាម និងម្នាក់ទៀត ឈ្មោះបាន ឡេងហួរ ភេទប្រុស អាយុ១៨ឆ្នាំ មុខរបរមិនពិតប្រាកដ ស្នាក់នៅផ្ទះជួលក្នុងសង្កាត់ភ្នំពេញថ្មី ខណ្ឌសែនសុខ ។ នាយប៉ុស្តិ៍រដ្ឋបាលនគរបាលបឹងទំពុន២ លោកឃុន ឡេង បានអោយដឹងថា នៅវេលាខាងលើ កម្លាំងនគរបាលក្រោមឱវាទរបស់លោកបានចេញល្បាតពួនស្ទាក់នៅតាមបណ្តាផ្លូវផ្សេងៗក្នុងមូលដ្ឋាន ដើម្បីការពារ និងថែរក្សាសន្តិសុខសុវត្ថិភាពជូនបងប្អូនប្រជាពលរដ្ឋ ។ លុះកម្លាំងល្បាតដល់ចំណុចខាងលើ ស្រាប់តែប្រទះឃើញជនសង្ស័យ២នាក់ជិះម៉ូតូមួយគ្រឿងម៉ាកហុងដាឌ្រីមសេ១២៥ ពណ៌ខ្មៅ ពាក់ស្លាកលេខ ភ្នំពេញ ១GQ-១៧៧៤ ដោយមានការសង្ស័យ កម្លាំងនគរបាលបានស្ទាក់ឱ្យឈប់ដើម្បីធ្វើការសួរនាំ និងឆែកឆេរ លុះពេលឆែកក្នុងហោរប៉ាវស្រាប់តែឃើញកូនថង់ខ្មៅធំមួយ ហើយសមត្ថកិច្ចលាមើល ក៏ប្រទះឃើញមានថ្នាំញៀន ទើបសម្រេចឃាត់ខ្លួនតែម្តង។ក្រោយការឃាត់ខ្លួនជនសង្ស័យ និងវត្ថុតាងត្រូវបានបញ្ជួនទៅកាន់ប៉ុស្តិ៍រដ្ឋបាលនគរបាលមូលដ្ឋាន ដើម្បីសាកសួរនាំបន្ថែម និងត្រៀមកសាងសំណុំរឿងបញ្ជូនទៅតុលាការចាត់ការតាមផ្លូវច្បាប់ នៅពេលក្រោយ ៕
ចែករំលែកព័តមាននេះ