រាជធានីភ្នំពេញ ៖ ឆ្លើយតបនឹងការស្នើឱ្យសមត្ថកិច្ចស៊ើបអង្កេតឡើងវិញ គ្រោះថ្នាក់ចរាចរណ៍លើទីនាំងសម្តេចក្រុមព្រះនរោត្តមរណឫទ្ធិ ប្រធានគណបក្សហ្វុ៊នស៊ិនប៉ិច ដែលបានធ្វើឱ្យព្រះអង្គរងរបួសធ្ងន់ធ្ងរ និងអ្នកម្នាងជាជាយាទទួលមរណភាពនោះ ទីបំផុត អគ្គស្នងការនគរបាលជាតិ ក្រោយពីបានស៊ើបអង្កេតនិងស្រាវជ្រាវ…
រាជធានីភ្នំពេញ ៖ ឆ្លើយតបនឹងការស្នើឱ្យសមត្ថកិច្ចស៊ើបអង្កេតឡើងវិញ គ្រោះថ្នាក់ចរាចរណ៍លើទីនាំងសម្តេចក្រុមព្រះនរោត្តមរណឫទ្ធិ ប្រធានគណបក្សហ្វុ៊នស៊ិនប៉ិច ដែលបានធ្វើឱ្យព្រះអង្គរងរបួសធ្ងន់ធ្ងរ និងអ្នកម្នាងជាជាយាទទួលមរណភាពនោះ ទីបំផុត អគ្គស្នងការនគរបាលជាតិ ក្រោយពីបានស៊ើបអង្កេតនិងស្រាវជ្រាវ បានធ្វើការបកស្រាយឆ្លើយតបថា ហេតុការណ៍នោះគឺជារឿងគ្រោះថ្នាក់ចរាចរណ៍សុទ្ធសាធ ។ ព្រោះជនបង្កបានសារភាពថា ខ្លួនបានបើកបរក្នុងល្បឿនប្រហែល១០០គីឡូម៉ែត្រ ក្នុងមួយម៉ោងដើម្បីចំណេញពេលវេលា ។ បើតាមលោកនាយឧត្តមសេនីយ៍ ហ៊ឹម យ៉ាន អគ្គស្នងការរងនគរបាលជាតិថា «ជនបង្កបានប្រព្រឹត្តល្មើសផ្ទុយច្បាប់ចរាចរណ៍ត្រង់មាត្រា៨៣ និង៨៥» ។ នេះជាករណីគ្រោះថ្នាក់ចរាចរណ៍សុទ្ធសាធ មិនមែនជារឿងអ្វីផ្សេងទេ និងបដិសេធរាល់ព័ត៌មានទាំងឡាយណា ផ្ទុយពីលទ្ធផលស៊ើបអង្កេតនេះ ។ ក្រោយពីគ្រោះថ្នាក់បានកើតឡើងមន្ត្រីជាន់ខ្ពស់របស់គណបក្សហ្វុ៊នស៊ិនប៉ិចបានចេញមកបញ្ជាក់ដល់អ្នកសារព័ត៌មាននៅក្បែរកន្លែងតម្កល់សពអ្នកម្នាង អ៊ុក ផល្លា រណឫទ្ធិ នៅក្នុងវត្តបទុមវតី គឺលោក យូ ហុកគ្រី អនុប្រធានគណបក្សហ្វុ៊នស៊ិនប៉ិចថា«យើងមានការប្រុងប្រយ័ត្ន មិនបានធ្វេសប្រហែសនោះទេ ។ តែវានឹកស្មានមិនដល់ព្រោះបានកើតឡើងបីដងមកហើយ» ។ លោកបានទាមទារថា«យើងសូមស្នើដល់អាជ្ញាធរមានសមត្ថកិច្ចធ្វើការស៊ើបអង្កេតរឿងនេះដោយផ្អែកលើការស្រាវជ្រាវគ្រប់ជ្រុងជ្រោយ» ។នៅក្នុងសន្និសីទសារព័ត៌មាននៅអគ្គស្នងការដ្ឋាននគរបាលជាតិនាព្រឹកថ្ងៃទី២១ មិថុនា លោកនាយឧត្តមសេនីយ៍អគ្គស្នងការរងនគរបាលជាតិបានបញ្ជាក់ថា«គ្រោះថ្នាក់ចរាចរណ៍ទៅលើសម្តេចក្រុមព្រះ ពិតជាគ្រោះថ្នាក់ចរាចរណ៍ពិតមែន ដោយជនបង្កឈ្មោះ វ៉ុល សារ៉េត បានបើកបរក្នុងល្បឿនលឿន បំពាននឹងច្បាប់ចរាចរណ៍ ហើយលោកក៏បដិសេធរាល់ព័ត៌មានទាំងឡាយណា ដែលផ្ទុយពីការស៊ើបអង្កេតដែលថាមានចេតនាគិតទុកជាមុន ក្នុងការប៉ុនប៉ងបុករថយន្តសម្តេចក្រុមព្រះ ។
សន្និសីទនេះបានធ្វើឡើងតាមការគ្រោងទុកនៅម៉ោង៩ព្រឹក ដោយលោកនាយឧត្តមសេនីយ៍ ហ៊ឹម យ៉ាន អគ្គស្នងការរងនគរបាលជាតិទទួលបន្ទុកចរាចរណ៍សាធារណៈ ដោយបានបង្ហាញជាផ្លូវការ អំពីគ្រោះថ្នាក់ចរាចរណ៍លើទីនាំងសម្តេចក្រុមព្រះ និងអ្នកម្នាង ដែលបានកើតឡើងកាលពីថ្ងៃទី១៧ មិថុនា នៅស្រុកព្រៃនប់ ខេត្តព្រះសីហនុ ។លោកនាយឧត្តមសេនីយ៍បានលើកឡើងថា គ្រោះថ្នាក់ចរាចរណ៍ទៅលើទីនាំងសម្តេចក្រុមព្រះបណ្តាលឱ្យទ្រង់រងរបួសធ្ងន់ និងអ្នកម្នាងអ៊ុក ផល្លា ទទួលមរណភាព ។ លោកថារថយន្តមួយគ្រឿងបានបើកលឿន មកប៉ះនឹងទីនាំងសម្តេចក្រុមព្រះក្នុងទិសដៅផ្ទុយគ្នាបណ្តាលឱ្យអ្នកម្នាងស្លាប់ និងសម្តេចក្រុមព្រះរបួសធ្ងន់ ។ លោកថាជនបង្កឈ្មោះ វ៉ុល សារ៉េត មានការធ្វេសប្រហែសនិងដាក់មនុស្សហួសចំណុះមិនអាចបញ្ជារថយន្តបាននៅពេលជួបគ្រោះថ្នាក់ ។លោក យូ ហុកគ្រី អនុប្រធានគណបក្សហ្វុ៊នស៊ិនប៉ិចបានធ្វើការកត់សម្គាល់ក្នុងឧបទ្ទវហេតុនោះ ជនបង្កត្រូវបានចាប់ខ្លួនឃុំឃាំងមែន តែវាជារឿងដែលមិនគួរកើតមានដល់ទៅ៣ដង រហូតដល់បាត់បង់ជីវិតអ្នកម្នាង និងសម្តេចព្រះប្រធានរងរបួសធ្ងន់ធ្ងរ ។ យើងស្នើសុំដល់អាជ្ញាធរមានសមត្ថកិច្ចសង្កេតរឿងនេះឱ្យបានស៊ីជម្រៅ ។ជាការឆ្លើយតបលោកនាយឧត្តមសេនយ៍ ហ៊ឹម យ៉ាន បានបញ្ជាក់ថា ក្រោយពីការស្រាវជ្រាវបន្ទាប់ពីគ្រោះថ្នាក់បានកើតឡើងកាលពីវេលាម៉ោង៨និង៥០នាទីព្រឹកថ្ងៃទី១៧ មិថុនា នៅស្រុកព្រៃនប់ ខេត្តព្រះសីហនុ គឺរថយន្តមួយគ្រឿងម៉ាកហាយឡែនឌ័រពាក់ផ្លាកលេខភ្នំពេញ២AL-៩៦៦៧ និងទីនាំងសម្តេចក្រុមព្រះ ពណ៌ទឹកប្រាក់ពាក់ផ្លាកលេខរដ្ឋសភា ។ ក្នុងព្រឹត្តការណ៍នោះបណ្តាលឱ្យអ្នកម្នាងទទួលមរណភាព និងរបួសសម្តេចក្រុមព្រះនិងមនុស្ស៩នាក់ផ្សេងទៀត ។លោកនាយឧត្តមសេនីយ៍អគ្គស្នងការរងបានលើកឡើងទៀតថា នៅពេលគ្រោះថ្នាក់ភ្លាមអគ្គស្នងការនគរបាលជាតិដោយមានបញ្ជាពីសម្តេចក្រឡាហោម ស ខេង ឧបនាយករដ្ឋមន្ត្រីបានដាក់បទបញ្ជាទី១-ឱ្យធ្វើការងារយ៉ាងសកម្មដល់ស្នងការដ្ឋានក្នុងការជួយដល់ជនរងគ្រោះ ។ ទី២-ស៊ើបអង្កេតចាប់ជនល្មើសស្រាវជ្រាវជាបន្តរកការពិតក្នុងគ្រោះថ្នាក់ចរាចរណ៍នេះ ។ទី៣-រៀបចំសណ្តាប់ធ្នាប់នៅកន្លែងកើតហេតុឱ្យមានសភាពធម្មតាចៀសវាងការកកស្ទះចរាចរណ៍ ។
លោកនាយឧត្តមសេនីយ៍បានអះអាងថា«នៅថ្ងៃទី២១ មិថុនានេះ យើងទទួលបានលទ្ធផលស៊ើបអង្កេតបឋម ។ ពេលស៊ើបអង្កេតយើងទទួលបានព័ត៌មានពីជនល្មើស និងព័ត៌មានពីប្រភពការត្រួតពិនិត្យកន្លែងកើតហេតុ ប្រមែប្រមូលវត្ថុតាង»បានបញ្ជាក់ថា រថយន្តហាយឡែនឌ័រដឹកអ្នកដំណើរពីខេត្តព្រះសីហនុ មកកាន់រាជធានីភ្នំពេញ ដែលបើកបរដោយឈ្មោះ វ៉ុល សារ៉េត បានដឹកអ្នកដំណើរចំនួន៦នាក់» ។ លោកថា«រថយន្តនេះដឹកអ្នកដំណើរលើសចំណុះ ពេលនោះមានការជែងគ្នាខាងឆ្វេងដៃ ក្នុងល្បឿនលឿន ។ ពេលនោះអ្នកជិះបានប្រាប់ឈ្មោះ សារ៉េត ឱ្យបន្ថយល្បឿនដែរ» ។ លោកនាយឧត្តមសេនីយ៍បានលើកឡើងទៀតថា«អ្នកដំណើរបានប្រាប់ឈ្មោះ វ៉ុល សារ៉េត ថាកុំដាក់មនុស្សកណ្តាលផ្លូវនៅពេលចេញពីខេត្តព្រះសីហនុបាន៥០០ម៉ែត្រ ។ នៅពេលដល់កន្លែងកើតហេតុអ្នកបើកឈ្មោះ វ៉ុល សារ៉េត នេះបានបើកវ៉ាជែងច្រាសទិសដៅចរាចរណ៍ ចំពេលដែលក្បួនរថយន្តសម្តេចក្រុមព្រះមកដល់បានធ្វើឱ្យឈ្មោះ វ៉ុល សារ៉េត កាន់តែបន្ថែមល្បឿនមកខាងស្តាំដៃ បន្ទាប់មកចូលមកឆ្វេងដៃវិញ ទៅបុកនឹងទីនាំងសម្តេចក្រុមព្រះទិសដៅទល់មុខគ្នា» ។លោកអគ្គស្នងការរងបន្តថា«ពេលបុកនោះពេញទំហឹង ហើយរថយន្តមិនបានចាប់ហ្វ្រាំងទាន់ទេ ។ ចំណុចនេះមានករណីរថយន្តតាក់ស៊ីផ្ទុកចំណុះលើសចំនួន ធ្វើឱ្យការបើកបរពិបាកក្នុងការកាច់ចង្កូតនិងជាន់ហ្វ្រាំង ក៏បុកទីនាំងសម្តេចក្រុមព្រះពេញទំហឹង» ។ លោកបន្តថា ពេលនោះរថយន្តរបស់ឈ្មោះ វ៉ុល សារ៉េត នេះបានវិលក្បាលទៅខេត្តព្រះសីហនុវិញ ។ ចំណែកទីនាំងសម្តេចក្រុមព្រះងាកក្បាលមកខាងស្តាំ ។លោកបានអះអាងថា«នេះជាករណីគ្រោះថ្នាក់ចរាចរណ៍ធម្មតាបង្កឡើងដោយអ្នកបើកបរឈ្មោះ វ៉ុល សារ៉េត ។ នគរបាលស្នងការខេត្តព្រះសីហនុបានឃាត់ខ្លួនឈ្មោះ វ៉ុល សារ៉េត សាកសួរ ។ ផ្អែកលើព័ត៌មានកន្លែងកើតហេតុ ភស្តុតាងទាំងអស់ សមត្ថកិច្ចវាយតម្លៃថា«ហេតុការណ៍នេះជាគ្រោះថ្នាក់ចរាចរណ៍បង្កឡើងដោយឈ្មោះ វ៉ុល សារ៉េត បានបើកបរធ្វេសប្រហែស ខ្វះការប្រុងប្រយ័ត្ន បង្កគ្រោះថ្នាក់បណ្តាលឱ្យមានការបាត់បង់ជីវិតមនុស្សនិងរបួសជាច្រើននាក់» ។លោកបានលើកឡើងថា ពេលនេះជនល្មើសត្រូវបានចោទប្រកាន់តាមមាត្រា៨៣ និងមាត្រា៨៥ នៃច្បាប់ស្តីពីចរាចរណ៍ផ្លូវគោក ។ ឈ្មោះ វ៉ុល សារ៉េត នេះត្រូវបានចៅក្រមសាលាដំបូងខេត្តព្រះសីហនុ ចេញដីកាឃុំខ្លួនបណ្តោះអាសន្នរង់ចាំការស៊ើបអង្កេត តាមនីតិវិធីបន្តទៅទៀត និងសវនាការផ្តន្ទាទោសតាមច្បាប់ ។
តបនឹងសំណួរថា តើគ្រោះថ្នាក់ដដែលៗមកលើតែសម្តេចក្រុមព្រះ ? លោកថា«នេះជាគ្រោះថ្នាក់ចរាចរណ៍សុទ្ធសាធ ។ នគរបាលជាតិសូមបដិសេធចំពោះព័ត៌មានទាំងឡាយណាដែលលើសពីការលើកឡើង»ខាងលើ ។លោកបានលើកឡើងថានៅមុនពេលបុកទីនាំងសម្តេចក្រុមព្រះ គឺរថយន្តជនរងគ្រោះនៅចម្ងាយប្រមាណ២០ម៉ែត្រ ពីទីនាំងសម្តេចក្រុមព្រះ ។ រថយន្តល្មើសព្យាយាមគេចតែបែរជាមកបុកចំទីនាំងសម្តេចក្រុមព្រះ ដោយសាររថយន្តបង្កនោះលឿនពេក ងាកចូលមកក្នុងក្បួន ។ លោកថា«វាជាគ្រោះថ្នាក់ចរាចរណ៍មិនមែនរឿងអ្វីនោះទេ» ។ លោកថារថយន្តបង្កបានដឹកលើសចំណុះ ព្រោះចង់បានចំណេញប្រាក់ច្រើន ។លោកបានលើកឡើងថា គណៈកម្មការចរាចរណ៍ជើងគោក បានរកឃើញករណីល្មើសរយៈពេលជាង៥ខែ មានជាង៥០០០ករណីដែលបានប្រព្រឹត្តល្មើសច្បាប់ចរាចរណ៍ផ្លូវគោកកម្ពុជា ។ការត្រួតពិនិត្យនេះទៅលើភាគច្រើនរថយន្តឈ្នួល ។លោកថា ទោះបីជានគរបាលបានរឹតបន្តឹងច្បាប់ក៏ដោយ តែវាជាការចៃដន្យ ដែលបានកើតឡើងជាពិសេសនៅផ្លូវជាតិលេខ៤ ។ ការរឹតបន្តឹងលើការប្រើប្រាស់គ្រឿងស្រវឹងហើយមានការកាត់បន្ថយគ្រោះថ្នាក់បើប្រៀបធៀបឆ្នាំ២០១៧ ។
លោកថាសូមឱ្យអ្នកបើកបររថយន្តឈ្នួលទាំងអស់ ប្រុងប្រយ័ត្នដោយគោរពច្បាប់ចរាចរណ៍ បើកបរតាមល្បឿនកំណត់ ។ តែចំពោះករណីនេះឈ្មោះ វ៉ុល សារ៉េត នេះបាននិយាយថា គាត់បើកល្បឿន១០០គីឡូម៉ែត្រក្នុងមួយម៉ោង ។ លោកបានលើកឡើងថា បើកបរលើសល្បឿនមាន៣៦% ត្រូវបានរកឃើញនៅក្នុងឆ្នាំ២០១៨ និងការមិនប្រកាន់ស្តាំមាន២០%និងការបើកច្រាសទិសជែងឆ្វេង១៥%នៃការគ្រោះថ្នាក់៥ខែដើមឆ្នាំ២០១៨ ។ ចំពោះការប្រើគ្រឿងស្រវឹងបើផឹកកុំបើកបរមានចំនួន៦%គ្រោះថ្នាក់ចរាចរណ៍ ការមិនមានភ្លើងបំភ្លឺក៏ជាកត្តាគ្រោះថ្នាក់ដែរ ។ គួរបញ្ជាក់ថា សម្តេចក្រុមព្រះនរោត្តម រណឫទ្ធិ និងអ្នកម្នាងរងរបួសធ្ងន់ក្នុងហេតុការណ៍គ្រោះថ្នាក់ចរាចរណ៍នៅផ្លូវជាតិលេខ៤ ក្នុងស្រុកព្រៃនប់ ខេត្តព្រះសីុហនុ និងក្រោយមកអ្នកម្នាងជាជាយាបានទទួលមរណភាព ។ លោកឧត្តមសេនីយ៍ទោ ជួន ណារិន ស្នងការនគរបាលខេត្តព្រះសីុហនុបានឱ្យដឹងថា ពិតជាមានការរងគ្រោះថ្នាក់ចរាចរណ៍ពិតប្រាកដមែន ។ ខណៈនេះដែរខាងឧទ្ធម្ភាគចក្រកំពុងតែចេញដំណើរហោះហើរទៅទទួលព្រះអង្គយកមកមន្ទីរពេទ្យឯទីក្រុងភ្នំពេញផងដែរ ។ អ្នករងរបួសធ្ងន់និងស្រាលក្នុងហេតុការណ៍នេះសរុបមានចំនួន៧នាក់ ៕
ចែករំលែកព័តមាននេះ