រាជធានីភ្នំពេញ ៖ បញ្ហាប្រេងឥន្ធនៈឡើងថ្លៃនាពេលបច្ចុប្បន្ន ពិតជាបានធ្វើឱ្យមានផលប៉ះពាល់ធ្ងន់ធ្ងរដល់សង្គម មិនមែនត្រឹមតែសម្រាប់អ្នកប្រើប្រាស់រថយន្ត ម៉ូតូ ឬយានជំនិះផ្សេងៗនោះទេ ថែមទាំងធ្វើឱ្យតម្លៃនៃការដឹកជញ្ជូនក៏ឡើងថ្លៃ និងជំរុញឱ្យតម្លៃទំនិញក៏ហក់ឡើងដែរ ។ ការឡើងថ្លៃប្រេងឥន្ធនៈនេះ ត្រូវបានគេដឹងថា បណ្តាលមកពីការកាត់បន្ថយការផលិតរបស់អង្គការនៃបណ្តាប្រទេសនាំប្រេងចេញ(OPEC) ហើយនេះគឺជាបញ្ហាប្រឈមរបស់កម្ពុជាដែលទាមទារឱ្យមានការដោះស្រាយជាបន្ទាន់មួយចំពោះនិន្នាការនេះ ក៏ដូចជាប្រទេសមួយចំនួនក៏កំពុងរងផលប៉ះពាល់ផងដែរ ។
នៅក្នុងពិធីប្រកាសគោរមងារវិទ្យាសាស្ត្រ និងគោរមងារកិត្តិយសនៃរាជបណ្ឌិត្យសភាកម្ពុជាជូនដល់ឥស្សរជនចំនួន៨រូប នាព្រឹកថ្ងៃទី១៩ ខែមិថុនា នៅវិមានសន្តិភាព សម្តេចតេជោនាយករដ្ឋមន្ត្រី ហ៊ុន សែន បានប្រកាសថា នៅថ្ងៃទី២៨ ខែមិថុនា ខាងមុខនេះ សម្តេចនឹងប្រកាសចេញនូវគោលការណ៍មួយចំនួន ដើម្បីដោះស្រាយបញ្ហាប្រឈមសម្រាប់សេដ្ឋកិច្ចនៅកម្ពុជា និងជាកង្វល់របស់ប្រជាពលរដ្ឋផងដែរ ។
សម្តេចតេជោប្រមុខរាជរដ្ឋាភិបាលបានថ្លែងថា «នៅថ្ងៃទី២៨ ខែមិថុនា ខាងមុខនេះ ខ្ញុំនឹងប្រកាសចេញនូវគោលការណ៍មួយចំនួនពាក់ព័ន្ធនឹងបញ្ហាតម្លៃប្រេងនៅទីផ្សារក្នុងស្រុករបស់យើង ដើម្បីកាត់បន្ថយផលប៉ះពាល់ ដែលផ្តើមចេញអំពីបញ្ហាការឡើងថ្លៃប្រេង ដែលបណ្តាលមកពីការកាត់បន្ថយការផលិតរបស់អង្គការ OPEC ដែលចំណុចនេះបានធ្វើឱ្យមានផលប៉ះពាល់សម្រាប់យើង» ។ ក្រុមអ្នកវិភាគបានរំពឹងថា ការបន្លុយឱ្យដឹងពីសំណាក់ប្រមុខរាជរដ្ឋាភិបាលនេះ គឺជាសញ្ញានៃការឈានទៅដោះស្រាយដ៏មានប្រសិទ្ធភាពមួយចំពោះកង្វល់របស់់ប្រជាពលរដ្ឋ ។
យោងតាមតារាងតម្លៃប្រេងឥន្ធនៈដែលប្រកាសដោយក្រសួងពាណិជ្ជកម្មបានឱ្យដឹងថា បច្ចុប្បន្នប្រេង សាំងធម្មតាមានតម្លៃ៤.២០០រៀល ក្នុងមួយលីត្រ និងប្រេងម៉ាស៊ូតតម្លៃ៤.០០០រៀល ។ តម្លៃនេះកើនឡើងច្រើន បើធៀបនឹងចុះឆ្នាំ២០១៧ និងដើមឆ្នាំ២០១៨ ។ ការហក់ឡើងនៃតម្លៃប្រេងឥន្ធនៈនេះ ក៏បានធ្វើឱ្យអ្នកប្រើប្រាស់យានយន្តត្អូញត្អែរផងដែរ ។ ក្នុងពិធីប្រកាសគោរមងារ ដែលគេចាត់ទុកថាជាបណ្តុំឃ្លាំងបញ្ញាជននោះ សម្តេចតេជោនាយករដ្ឋមន្ត្រី ហ៊ុន សែន ក៏បានអំពាវនាវដល់បញ្ញាជនខ្មែរទាំងអស់ ត្រូវរួមគ្នាស្រាវជ្រាវបែបវិទ្យាសាស្ត្រជាមួយរាជរដ្ឋាភិបាល ក្នុងការដោះស្រាយបញ្ហាប្រឈមដូចជា ការឡើងថ្លៃប្រេងឥន្ធនៈ និងបញ្ហាផ្សេងៗមួយចំនួនទៀត ដែលពេលនេះសង្គ្រាមពាណិជ្ជកម្មកំពុងឡើងកម្តៅយ៉ាងខ្លាំងក្នុងពិភពលោក ៕
ចែករំលែកព័តមាននេះ