ខេត្តប៉ៃលិន ៖ ភ្ញៀវទេសចរជាច្រើននាក់ដែលបើកបររថយន្ត និងម៉ូតូទៅលេងកំសាន្តទឹកធ្លាក់ភ្នំខៀវ រៀងរាល់ថ្ងៃចុងសប្តាហ៍ និងថ្ងៃបុណ្យទានផ្សេងៗ មានការរអ៊ូរទាំនឹងផ្លូវដែលទទួលរងការខូចខាតអស់ជាច្រើនកន្លែង ដោយសារភ្លៀងធ្លាក់ខ្លាំងរាល់ថ្ងៃ ហូរដាច់ខូចខ្ទេចខ្ទី ។ ផ្លូវដែលទទួលរងការខូចនេះ ស្ថិតនៅជាប់នឹងផ្លូវជាតិលេខ៥៧ ឆ្ពោះទៅទិសខាងត្បូង ក្នុងភូមិខ្លុង សង្កាត់អូរតាវ៉ៅ ក្រុងប៉ៃលិន ។
ប្រភពព័ត៌មានពីប្រជាពលរដ្ឋរស់នៅក្បែរៗផ្លូវទៅទឹកធ្លាក់អូរតាវ៉ៅ ហៅទឹកធ្លាក់ភ្នំខៀវ បានឱ្យដឹងថា រហូតមកដល់ពេលនេះ ផ្លូវលំដែលប្រជាពលរដ្ឋ និងភ្ញៀវទេសចរតែងតែធ្វើដំណើរទៅលេងកំសាន្តនៅទឹកធ្លាក់ភ្នំខៀវ ដែលមានចម្ងាយពីក្រុងប៉ៃលិនប្រមាណ៦ទៅ៧គីឡូម៉ែត្រ បានទទួលរងការខូចខាតក្លាយទៅជាជង្ហុកតូចធំ លំបាកក្នុងការបើកបរម៉ូតូ ឬរថយន្តទៅមក ។ ប្រភពបន្តទៀតថា ផ្លូវឆ្ពោះទៅទឹកធ្លាក់ភ្នំខៀវនាឆ្នាំ២០១៨នេះ មានការខូចខាតច្រើនជាងឆ្នាំនានា ខណៈឆ្នាំនេះភ្លៀងអស់រយៈពេលជាយូរមកហើយ នៅមិនទាន់ឈប់ភ្លៀងស្រួលបួលទៀត ដែលជាហេតុឱ្យទឹកហូរធ្លាក់ពីលើភ្នំច្រោះដីផ្លូវដាច់ខូចអស់បែបនេះ ។
ទោះបីជាយ៉ាងណាក៏ដោយ ម្ចាស់រមណីយដ្ឋានទឹកធ្លាក់ខាងលើ គួរតែនាំគ្នារៀបចំធ្វើការឈូសឆាយជួសជុលឡើងវិញឱ្យបានល្អស្រួលបួល ងាយស្រួលក្នុងការទាក់ទាញភ្ញៀវទេសចរក្នុងស្រុក ក៏ដូចជាអ្នកមកពីតាមបណ្តាខេត្តនានា ធ្វើដំណើរទៅលេងទីនោះបានស្រួលបួលផងដែរ ។ បើពុំមានការធ្វើផ្លូវថ្មីទេ នៅថ្ងៃខាងមុខ ភ្ញៀវទេសចរនឹងមិនបន្តធ្វើដំណើរមកលេងរមណីយដ្ឋានខាងលើឡើយ ព្រោះផ្លូវមានការលំបាកខ្លាំង អាចនឹងមានបញ្ហាគ្រោះថ្នាក់ ឬធ្វើឱ្យខូចរថយន្តជាដើម ។
ចំណែកអ្នករស់នៅក្បែរផ្លូវទៅទឹកធ្លាក់មួយចំនួនបានឱ្យដឹងថា មិនត្រឹមតែភ្ញៀវទេសចរ ដែលធ្វើដំណើរទៅលេងកំសាន្តនៅទឹកធ្លាក់លើភ្នំខៀវលំបាកប៉ុណ្ណោះទេ សូម្បីតែពួកគាត់ក៏មានការលំបាកផងដែរ ព្រោះពេលភ្លៀវធំម្តងៗ ផ្លូវក្លាយទៅជាជង្ហុកតូចធំ ពេលបើកបរម៉ូតូទៅណា មកណា អាចដួលរងរបួសស្រាលក៏មានដែរ ។
ពួកគាត់ក៏មានសំណូមពរឱ្យម្ចាស់រមណីយដ្ឋាន ក៏ដូចជាអាជ្ញាធរមូលដ្ឋាន ឱ្យចុះទៅរៀបចំធ្វើផ្លូវនេះសារជាថ្មីឡើងវិញ ដើម្បីងាយស្រួលក្នុងការធ្វើដំណើរចេញចូលដឹកកសិផលទៅមក និងបានរហ័សទាន់ចិត្តថែមទៀត ៕
ចែករំលែកព័តមាននេះ