រាជធានីភ្នំពេញ ៖ រថយន្តក្រឡុកស៊ីម៉ង់ត៍មួយគ្រឿងបានបត់ត្រលប់ក្រោយខ្វះការប្រុងប្រយត្ន័ជ្រុលទៅប៉ះនឹងម៉ូតូមួយគ្រឿងម៉ាកឌ្រីមសង់ដែលជិះដោយបុរសម្នាក់ បណ្តាលអោយដួលរងរបួស ពេលនោះដែរ អ្នកបើកបរម៉ូតូបានហៅតំណាងរថយន្តបង្កចូលមកជួយដោះស្រាយ បែរជាតំណាងម្នាក់នោះមិនព្រមដោះស្រាយទេ បង្កជាទំនាស់ពាក្យសម្តីគ្នាជាមួយនឹងសមត្ថកិច្ចទៅវិញ ហេតុការណ៍នេះដែរបានកើតឡើងកាលវេលាម៉ោង១២និង៣០នាទីរំលងអាធ្រាត្រឈានចូលថ្ងៃទី១២ ខែមិថុនា ឆ្នាំ២០១៨ ទល់មុខនឹងបុរីចំការមន ផ្លូវព្រះនរោត្តម សង្កាត់ទន្លេបាសាក់ ខណ្ឌចំការមន ។
តាមប្រភពព័ត៌មានពីកន្លែងកើតហេតុបានអោយដឹងថា មុនពេលកើតហេតុ គេបានឃើញបុរសម្នាក់បានជិះម៉ូតូមួយគ្រឿងម៉ាកហុងដាឌ្រីម ស៊េរីឆ្នាំ២០១៧ ពណ៌ខ្មៅ ពាក់ស្លាកលេខ ត្បូងឃ្មុំ ១E-២៥៦០ ធ្វើដំណើរតាមផ្លូវព្រះនរោត្តម ក្នុងទិសដៅពីជើងទៅត្បូង លុះមកដល់ចំណុចកើតហេតុ ក៏ស្រាប់តែមានរថយន្តក្រឡុកស៊ីម៉ង់ត៍មួយគ្រឿង ពណ៌បៃតង ពាក់ស្លាក់លេខ ភ្នំពេញ ៥A-០៩៣៤ បើកបរដោយបុរសម្នាក់ ធ្វើដំណើរតាមផ្លូវព្រះនរោត្តម ក្នុងទិសដៅពីត្បូងទៅជើង បានបត់ឆ្វេងត្រលប់ក្រោយ ខ្វះការប្រុងប្រយត្ន័ ក៏ជ្រុលទៅប៉ះនឹងម៉ូតូមួយគ្រឿងម៉ាកហុងដាឌ្រីមខាងលើ បណ្តាលអោយដួលម៉ូតូ ចំណែកអ្នកបើកបរម៉ូតូរងរបួសរលាត់ដៃរលាត់ជើងមួយចំហៀងខ្លួន ព្រមទាំងរងការខូចខាតម៉ូតូបន្តិចបន្តួច ។ ដោយឡែករថយន្តបង្ករវិញមិនមានរងការខូចខាតអ្វីនោះទេ ។
បន្ទាប់ពីកើតហេតុ អ្នកបើកបររថយន្ត និងអ្នកបើកបរម៉ូតូបានធ្វើការសម្របសម្រួលគ្នា ដោយខាងភាគីម៉ូតូ ទាមទារសំណងចំនួន១០០ដុល្លារ ចំណែកខាងភាគីអ្នកបើកបររថយន្តបានហៅតំណាងរបស់ខ្លួនមកជួយសម្របសម្រួលគ្នា តែពេលខាងតំណាងរថយន្តក្រឡុកស៊ីម៉ង់ត៍មកដល់កន្លែងកើតហេតុ បែរជាមិននិយាយសម្របសម្រួលគ្នានោះទេ ថែមទាំងខឹងឈ្លោះទាស់ពាក្យសម្តីជាមួយនិងសមត្ថកិច្ចមូលដ្ឋាន ព្រមទាំងបងប្អូនប្រជាពលរដ្ឋ ដែលឃើញហេតុការណ៍ រួមទាំងអ្នកយកព័ត៌មានថែមទៀតផង ។
ក្រោយពេលកើតហេតុ អ្នកបើកបរម៉ូតូដែលរងគ្រោះរង់ចាំការសម្របសម្រួលគ្នាយូរពេក ក៍បានឡើងរថយន្តសង្គ្រោះដើម្បីទៅព្យាបាលរបួសនៅគ្លីនិកសិន ។ ចំណែកម៉ូតូ និងរថយន្ត ត្រូវបានសមត្ថកិច្ចជំនាញបានមកធ្វើការវាស់វែងយកទៅរក្សាទុកនៅការិយាល័យចរាចរណ៍ជើងគោករាជធានីភ្នំពេញដើម្បីរង់ចាំធ្វើការស្រាយជាបន្តទៀត ៕
ចែករំលែកព័តមាននេះ