មុទិតាចិត្តបានដល់ចិត្តដែលប្រកបដោយភាពទន់ភ្លន់ រីករាយ ត្រជាក់ជានិច្ចនៅពេលឃើញអ្នកដទៃគេបានទទួលផល ធ្វើអំពើល្អណាមួយ ។ មុទិតានេះមានសត្រូវធំបំផុតគឺឥស្សា សេចក្តីច្រណែន ឈ្នានីសគេ ។
មនុស្សដែលមានមុទិតាចិត្ត គឺជាមនុស្សពិសេសរស់នៅជាមួយនឹងសេចក្តីសុខរបស់ខ្លួន មានចិត្តប្រសើរខ្ពង់ខ្ពស់ មានចិត្តទូលាយ និងជាចិត្តព្រមទទួលយកសេចក្តីល្អរបស់អ្នកដទៃដែលគេបានធ្វើហើយ ជាអ្នកមានចិត្តរីករាយស្មើជានិច្ចប្រៀបបាននឹងព្រះព្រហ្មដូច្នោះដែរ។
ការអប់រំមុទិតាចិត្តឱ្យចម្រើនជាប្រក្រតី គប្បីកម្ចាត់នូវសត្រូវដ៏ធំ គឺអរតិសេចក្តីមិនត្រេកអរ ព្រោះជាចិត្តប្រកបដោយឥស្សាច្រណែនឈ្នានីសហ្នឹងឯង ។ មនុស្សដែលមានចិត្តឥស្សានេះឯងមិនចង់ឱ្យរីកចម្រើន និងមិនចង់ឱ្យគេបានសុខនោះឡើយ ។
ដូច្នេះហើយមនុស្សយើងត្រូវសាងមុទិតាចិត្តឱ្យកើតឡើងជានិច្ចជំនួសកន្លែងឥស្សា ដោយការព្យាយាមសម្លឹងរកមើលសេចក្តីល្អរបស់អ្នកដទៃឱ្យបានច្រើនសូម្បីតែសេចក្តីល្អនោះបន្តិចបន្តួចក៏ដោយ ក៏ត្រូវមាននៅក្នុងចិត្តជារៀងរហូត ។
ចែករំលែកព័តមាននេះ