ខេត្ដកំពង់ចាម ៖ គូស្នេហ៍កំលោះក្រមុំ មួយគូបាននាំគ្នាពង្រត់ចាកចេញពីរាជធានីភ្នំពេញ គេចពីឪពុកម្ដាយមកសម្ងំលាក់ខ្លួន រស់នៅជាច្រើនថ្ងៃលើផ្ទះឈើមួយ ស្ថិតក្នុង ភូមិថ្នល់បែកខាងកើត ឃុំស្វាយទាប ស្រុកចំការលើ ស្រាប់តែមួយរំពេចសោះ ក្លាយជាគូទំនាស់នឹងគ្នាយ៉ាងស្រួចស្រាល់ ដោយសារតែភាគខាងនារីមិនស្រួលខ្លួន ហើយបុរសជាសង្សារបង្ខំរួមភេទ កាលពីវេលាម៉ោង៣និង ៣០នាទីទៀបភ្លឺឈានចូលថ្ងៃទី១២ មិថុនា ឆ្នាំ២០១០ លុះដល់នាងខឹងខ្លាំងពេក ទ្រាំមិនបានក៏ខាំអណ្ដាតប្រុសស្នេហ៍ដាច់ឈាមហូរ រហាចរងរបួសធ្ងន់ ត្រូវបានគេនាំទៅសង្គ្រោះ នៅមន្ទីរពេទ្យបង្អែកស្រុកចំការលើជាបន្ទាន់ ។
តាមលោកអនុសេនីយ៍ឯក អ៊ិត ដារ៉ា អធិការប៉ូលិសស្រុកចំការលើ បានឱ្យកោះសន្ដិភាពដឹងថា វេលាម៉ោង៩ព្រឹកថ្ងៃទី១២ មិថុនា រូបលោកបានទទួលព័ត៌មានថា មានករណីបង្ករបួសស្នាមដោយមនុស្សស្រីម្នាក់ ឈ្មោះសែម រ៉ាវី អាយុ២៣ឆ្នាំ បានខាំអណ្ដាត ប្រុសស្នេហ៍ឈ្មោះពេជ្រ ចាន់ថា អាយុ២៩ឆ្នាំ ហើយរត់គេចចុះពីលើផ្ទះបាត់មិនដឹងទៅឯណាឡើយ ។ បន្ទាប់ពីទទួលបាននូវសេចក្ដីរាយការណ៍នោះភ្លាម លោកបានចាត់កំលាំង ប៉ុស្ដិ៍មួយចំនួនជាប់ដងផ្លូវជាតិលេខ៧១ ក្រោមឱវាទ ឱ្យចេញតាមស្រាវជ្រាវតាមរុករកនាងជាគូសង្សារដើម្បីចាប់ខ្លួន ។
រហូតដល់ម៉ោង៩និង២០នាទីព្រឹកថ្ងៃ ដដែលកំលាំងប៉ូលិសបានប្រទះឃើញនាងរ៉ាវី កំពុងតែអង្គុយហូបបបរស្ថិតនៅក្នុងភូមិតា អុង ឃុំតាអុង ចំងាយពីផ្ទះកើតហេតុ ប្រហែល១០គីឡូម៉ែត្រ បានឃាត់ខ្លួនបញ្ជូន មកកាន់អធិការដ្ឋានស្រុកចំការលើសួរនាំ ។ ព័ត៌មានលំអិតនឹងផ្សាយជូននៅពេលក្រោយ និងនៅលើទំព័រកាសែតកោះសន្ដិភាព .
ចែករំលែកព័តមាននេះ