ក្លាយទៅជាសេដ្ឋី ព្រោះតែលក់ពងឆ្កែ
តាមប្រភពព័ត៌មាន Oddity Central បានឲ្យដឹងថា បុរសម្នាក់ក្លាយទៅជាសេដ្ឋី ដោយសារតែបង្កើតពងស្វាសសិប្បនិម្មិតសម្រាប់សត្វឆ្កែ ដែលក្រៀវហើយ។ គំនិតរបស់លោក Gregg Miller…
តាមប្រភពព័ត៌មាន Oddity Central បានឲ្យដឹងថា បុរសម្នាក់ក្លាយទៅជាសេដ្ឋី ដោយសារតែបង្កើតពងស្វាសសិប្បនិម្មិតសម្រាប់សត្វឆ្កែ ដែលក្រៀវហើយ។
គំនិតរបស់លោក Gregg Miller ចាប់ផ្តើមដំបូងដោយសារគាត់ចង់ឲ្យឆ្កែនៅតែមានរូបរាងជាសត្វឈ្មោលពេញលេញ បើទោះបីជាគ្រាប់ពីរត្រូវកាត់ចេញក៏ដោយ។ ដំបូងឡើយ គាត់ទៅសួរគ្រូពេទ្យសត្វដែរ តែគេមិនមានសេវាបែបនេះទេ។ គាត់ក៏នឹកឃើញចង់បង្កើតទៅជាពងសម្រាប់ដាក់ក្នុងថងពងស្វាស ដែលមានសណ្ឋានដូចទៅនឹងការវះកាត់ពង្រីកសុដន់របស់នារីៗដែរ។
លោកគិតឃើញគំនិតនេះ តាំងពីឆ្នាំខ្ទង់ឆ្នាំ១៩៩០ ដែលពេលនោះមានមនុស្សជាច្រើនសើចចំអកថា ជាគំនិតឆ្កួតៗ សូម្បីតែម្តាយឪពុកបងប្អូនរបស់គាត់ក៏សើចដែរ។ តែក្រោយមក គាត់ក៏ប្រមូលគ្នាបានជាហ៊ុន១០ម៉ឺនដុល្លារក្នុងការបង្កើតជាពងស្វាសសិប្បនិម្មិតយីហោ Neuticles។
កាលពីឆ្នាំ១៩៩៥ គាត់បានដាក់វានៅក្នុងសត្វឆ្កែ៣០ក្បាល ដោយគ្មានបញ្ហា។ ពេលនោះ មិនសូវជាជោគជ័យប៉ុន្មានទេ ដោយសារតែមិនសូវមានអ្នកស្គាល់។ លោក Gregg ចេះតែខំប្រឹងដើរផ្សព្វផ្សាយ រហូតដល់ថ្នាក់លក់បាន៥០ម៉ឺនពងមកដល់សព្វថ្ងៃនេះ។ នៅពេលនេះ លោកក៏ផលិតពងសិប្បនិម្មិតសម្រាប់សត្វសេះ សត្វគោ និងសត្វដំរីផងដែរ។
ពេលខ្លះគំនិតឆ្កួតៗ អាចឲ្យអ្នកក្លាយទៅជាសេដ្ឋីបានដោយមិនបានត្រៀមទុក ឲ្យតែឆ្កួតត្រូវបែបបទ៕
ចែករំលែកព័តមាននេះ