ខេត្តកំពង់ស្ពឺ ៖ មនុស្ស២នាក់ដែលគេដឹងថាជាអ្នកបើកបររថយន្តត្រូវបានដឹកបញ្ជូនយកទៅសង្គ្រោះបន្ទាប់ពីរថយន្តទាំង២គ្រឿងបានបុកគ្នាបណ្តាលអោយរងរបួសធ្ងន់ ។ ក្នុងហេតុការណ៍នេះដែរគ្រាន់តែខូចខាតរថយន្ត និងរងរបួសអ្នកបើកបរតែប៉ុណ្ណោះ មិនមានប៉ះពាល់ដល់អ្នកដំណើរផ្សេងទៀតឡើយ។
ហេតុការណ៍គ្រោះថ្នាក់ចរាចរណ៍នេះកើតឡើងកាលពីវេលាម៉ោង៨និង៤៥នាទីយប់ថ្ងៃទី៥ ខែមិថុនា ឆ្នាំ២០១៨ នៅលើកំណាត់ផ្លូវជាតិលេខ៤ ត្រង់ចន្លោះគីឡូម៉ែត្រលេខ៣៨ និង៣៩ ចំណុចភូមិស្លា ឃុំវល្លិ.ស ស្រុកសំរោងទង ខេត្តកំពង់ស្ពឺ។
ប្រភពពីមន្ត្រីនគរបាលជំនាញដែលចុះធ្វើកំណត់ហេតុ និងសាកសួរសាក្សីនិយាយថា នៅមុនពេលកើតហេតុ មានរថយន្តមួយគ្រឿងម៉ាកហ៊ីយ៉ាន់ដាយ ពណ៌ស ពាក់ស្លាកលេខ ភ្នំពេញ ៣D-៤៦៨១ សណ្តោងស៊ីទែនប្រេងសាំងពីក្រោយ បានបើកបរតាមលើផ្លូវជាតិលេខ៤ ពីទិសខាងលិចទៅទិសខាងកើត លុះបើកបរដល់ចំណុចកើតហេតុ ខាងលើ បានបុកគ្នាជាមួយរថយន្ត ម៉ាកហ៊ីយ៉ាន់ដាយ ពណ៌ឈាមជ្រូក ពាក់ស្លាកលេខ ព្រះសីហនុ ៣Q-៤៦៨១ សណ្តោងរ៉ឺម៉ក ដែលបើកបញ្ច្រាសទិសគ្នា បណ្តាលអោយអ្នកបើកបររថយន្តទាំងសងខាងរងរបួសធ្ងន់ ហើយត្រូវបានសមត្ថកិច្ចហៅរថយន្តសាមុយដឹកបញ្ជូនទៅមន្ទីរពេទ្យដើម្បីសង្គ្រោះបន្ទាន់ផងដែរ។ ចំណែករថយន្តទាំងពីរគ្រឿងរងការខូចខាតកំរិតធ្ងន់ ។
នគរបាលជំនាញបន្តទៀតថា ក្នុងហេតុការណ៍គ្រោះថ្នាក់ចរាចរណ៍ខាងលើនេះ ក៏បណ្តាលឱ្យមានការកកស្ទះចរាចរណ៍ជាច្រើនម៉ោងផងដែរ គឺការស្ទះចរាចរណ៍នេះចាប់ពីវេលាម៉ោង៨និង៤៥នាទីរហូតដល់ម៉ោង១រំលងអាធ្រាត្រឈានចូលថ្ងៃទី៦ ខែមិថុនា ឆ្នាំ២០១៨ ទើបធើ្វចរាចណ៍បានធម្មតាឡើងវិញ។
ក្រោយសម្រួលចរាចរណ៍បានហើយ សមត្ថកិច្ចនគរបាលខេត្តកំពង់ស្ពឺក្រោមការបញ្ជាផ្ទាល់ពីស្នងការនគរបាលខេត្តបានជួយអន្តរាគមន៍ ដោយប្រើរថយន្តអគ្គីភ័យធើ្វការបាញ់ទឹកលៀងសំអាតប្រេងដែល
ហៀរលើផ្លូវជាតិអស់ចំនួន៤រថយន្តទើបលៀងស្អាតប្រេងនោះ។
ក្រោយកើតហេតុ នគរបាលជំនាញចរាចរណ៍ស្រុកបានដឹកអូសយករថយន្តទាំង២គ្រឿង មករក្សារទុកនៅអធិការដ្ឋានស្រុកសំរោងទង រង់ចាំកសាងសំណុំរឿងចាត់ការតាមនីតិវិធី៕
ចែករំលែកព័តមាននេះ