ទីក្រុងវ៉ាស៊ីនតោន ៖ ទីប្រឹក្សាសេដ្ឋកិច្ចរបស់លោកប្រធានាធិបតីអាមេរិក ដូណាល់ ត្រាំ បានទទួលស្គាល់កាលពីថ្ងៃទី៣ មិថុនា កន្លងមកថា ជម្លោះពាណិជ្ជកម្មរវាងសហរដ្ឋអាមេរិកជាមួយប្រទេសសម្ព័ន្ធមិត្ត គឺអាចនឹងធ្វើឲ្យប៉ះពាល់ដល់សេដ្ឋកិច្ចអាមេរិក ដែលកំពុងតែលូតលាស់យ៉ាងលឿន ។
លោក Larry Kudlow បានមានប្រសាសន៍បែបនេះ បន្ទាប់ពីរដ្ឋមន្ត្រីហិរញ្ញវត្ថុមកពីប្រទេសក្នុង G7 បានបង្ហាញពីការខឹងសម្បាកាលពីថ្ងៃសៅរ៍ ព្រោះតែអាមេរិកដាក់ពន្ធលើដែកថែប និងអាលុយមីញ៉ូមនាំចូល ។ ពួកគេស្នើឲ្យសហរដ្ឋអាមេរិកកែប្រែគោលនយោបាយនេះឡើងវិញ ។
លោកនាយករដ្ឋមន្ត្រីកាណាដា Justin Trudeau មិនពេញចិត្តយ៉ាងខ្លាំងពីការយកសន្តិសុខជាតិ មកធ្វើជាមូលហេតុដាក់ពន្ធរបស់អាមេរិកនេះ ។
កាលពីថ្ងៃអាទិត្យ លោក Kudlow បាននិយាយក្នុងបទសម្ភាសន៍មួយថា ៖« ខ្ញុំគិតថា គាត់ឆ្លើយតបជ្រុល ។ ក្នុងនាមជាសម្ព័ន្ធមិត្តដ៏ល្អរបស់សហរដ្ឋអាមេរិក គឺគ្មាននរណាបដិសេធវាទេ ប៉ុន្តែពួកយើងត្រូវតែការពារខ្លួនឯង » ។
លោកទទួលស្គាល់ថា ជម្លោះពាណិជ្ជកម្មនេះអាចនឹងប៉ះពាល់ដល់សេដ្ឋកិច្ចរបស់សហរដ្ឋអាមេរិក ដែលកំពុងតែមើលឃើញការលូតលាស់ និងអត្រាអ្នកគ្មានការងារធ្វើទាប ។
ប៉ុន្តែលោក Kudlow បានការពារសកម្មភាពរបស់លោកប្រធានាធិបតី ដូណាល់ ត្រាំ ក្នុងការកែទម្រង់ប្រព័ន្ធពាណិជ្ជកម្មពិភពលោក ។ លោកថា ៖« កុំបន្ទោសលោកត្រាំ បន្ទោសប្រទេសចិន បន្ទោសអឺរ៉ុប បន្ទោស NAFTA ឬបន្ទោសអ្នកដែលមិនចង់បានការធ្វើពាណិជ្ជកម្ម ប៉ុន្តែលោកត្រាំ កំពុងតែឆ្លើយតបនឹងការល្មើសផ្នែកពាណិជ្ជកម្មអស់ជាច្រើនទសវត្សរ៍មកហើយ » ។
នៅក្នុងបទសម្ភាសន៍មួយ រដ្ឋមន្ត្រីការបរទេសប្រទេសកាណាដា លោកស្រី Chrystia Freeland បានព្រមានថា ការដាក់ពន្ធរបស់អាមេរិកនេះ ជាដំបូង គឺវាអាចនឹងប៉ះពាល់ដល់ក្រុមហ៊ុន និងអតិថិជនអាមេរិកខ្លាំងជាងគេ ៕
ចែករំលែកព័តមាននេះ