ខេត្តក្រចេះ ៖ សមាគមអតីតយុទ្ធជនខេត្តក្រចេះ, ខេត្តកំពង់ចាម និងខេត្តត្បូងឃ្មុំបានចុះត្រួតពិនិត្យ និងបែងចែកដីសម្បទានសង្គមកិច្ចជំហានដំបូងជា៣ចំណែក ដែលស្ថិតនៅចំណុច ភូមិសំបួរ ឃុំស្វាយជ្រៈ ស្រុកស្នួល ខេត្តក្រចេះ ដើម្បីសម្រាប់ផ្ដល់ជូនអតីតយុទ្ធជនកម្ពុជា ។
អាជ្ញាធរខេត្តក្រចេះកាលនៅថ្ងៃទី០២ ខែមិថុនា ឆ្នាំ២០១៨ នេះដឹកនាំដោយលោក វ៉ា ថន អភិបាលខេត្តក្រចេះ និងជាប្រធានកិត្តិយសសមាគមអតីតយុទ្ធជនខេត្តដែលអមដំណើរដោយប្រធានសមាគមអតីតយុទ្ធជនខេត្តក្រចេះ លោកឧត្តមសេនីយ៍ទោ លន់ សុផាត , ប្រធានសមាគមអតីតយុទ្ធជនខេត្តកំពង់ចាម លោកឧត្តមសេនីយ៍ទោ ឯម កុសល និងប្រធានសមាគមអតីតយុទ្ធជនខេត្តត្បូងឃ្មុំ លោកឧត្តមសេនីយ៍ទោ បែន រ័ត្ន បានចុះត្រួតពិនិត្យលើទីតាំងដីសម្បទានសង្គមកិច្ច ដើម្បីធ្វើការបែងចែក ។
អភិបាលខេត្តក្រចេះ និងជាប្រធានកិត្តិយសសមាគមអតីតយុទ្ធជនខេត្តលោក វ៉ា ថនបានបញ្ជាក់ប្រាប់ថា ការចុះបែងចែកដីនេះត្រូវបានធ្វើឡើងតាមការណែនាំរបស់នាយឧត្តមសេនីយ៍ បណ្ឌិត គន់ គីម អគ្គលេខាធិការសមាគមអតីតយុទ្ធជនកម្ពុជាដែលដឹកនាំដោយសម្ដេចតេជោ ហ៊ុន សែនប្រធានសមាគម ។
លោកអភិបាលខេត្តបានលើកឡើងអតីតយុទ្ធជន គឺជាបុគ្គលមានគុណបំណាច់លើប្រទេសជាតិក្នុងកាតព្វកិច្ចការពារជាតិមាតុភូមិកន្លងមក ។ ក្រោមការដឹកនាំរបស់សម្តេច អគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា សម្តេចបានជម្រុញឲ្យមានការយកចិត្តទុកដាក់ទៅលើគ្រួសារអតីតយុទ្ធជនដោយមិនទុកឲ្យគ្រួសារអតីតយុទ្ធជនរស់នៅដោយឯកោ និងជួបការលំបាកដោយប្រការណាមួយ ហើយពុំមានការដឹងលឺពីសំណាក់អាជ្ញាធរនោះទេ ។ ដោយឡែកសម្រាប់ផែនការជំហានទី២នៃការបែងចែកនេះនឹងបន្តទៅពិនិត្យនៅស្រុកសំបូរ ស្ថិតក្នុងឃុំក្បាលដំរី និងឃុំអូរគ្រៀង ។
សូមបញ្ជាក់ថា អតីតយុទ្ធជន និងសមាជិកអតីតយុទ្ធជននៅខេត្តក្រចេះសព្វថ្ងៃមានចំនួនជាង២ពាន់នាក់ ហើយក្នុងនោះអាជ្ញាធរគ្រោង និងរៀបចំដីសម្បទានសង្គមកិច្ចចំនួនជាង២រយហិកតា នៅស្រុកចំនួន២ ទុកសម្រាប់បែកចែកជូន គ្រួសារអតីតយុទ្ធទីទាល់ក្រ ៕
ចែករំលែកព័តមាននេះ