ខេត្តកំពង់ស្ពឺ ៖ កំលាំងមន្ទីរយុត្តិធម៌កងរាជអាវុធហត្ថខេត្តដឹកនាំដោយលោកវរសេនីយទោ ហែម ចាន់ដារ៉ា មេបញ្ជាការរងនិងជាប្រធានមន្ទីរយុត្តិធម៌កងរាជអាវុធហត្ថខេត្ត និងមានការសម្រួលនីតិវិធីពីលោក មុត ដារ៉ា ព្រះរាជអាជ្ញារងអមសាលាដំបូងខេត្ត…
ខេត្តកំពង់ស្ពឺ ៖ កំលាំងមន្ទីរយុត្តិធម៌កងរាជអាវុធហត្ថខេត្តដឹកនាំដោយលោកវរសេនីយទោ ហែម ចាន់ដារ៉ា មេបញ្ជាការរងនិងជាប្រធានមន្ទីរយុត្តិធម៌កងរាជអាវុធហត្ថខេត្ត និងមានការសម្រួលនីតិវិធីពីលោក មុត ដារ៉ា ព្រះរាជអាជ្ញារងអមសាលាដំបូងខេត្ត បានសហការជាមួយកំលាំងស្នាក់ការសន្តិសុខគីរីរម្យ ចុះបង្ក្រាបករណីជួញដូរគ្រឿងញៀនមួយកន្លែងនៅចំណុចត្រែងត្រយឹង ចន្លោះបង្គោលគីឡូម៉ែត្រលេខ៨៤ ស្ថិតក្នុងភូមិទី១ ឃុំត្រែងត្រយឹង ស្រុកភ្នំស្រួច ខេត្តកំពង់ស្ពឺ។
លោកវរសេនីយទោ ហែម ចាន់ដារ៉ា មេបញ្ជាការរងនិងប្រធានមន្ទីរយុត្តិធម៌កងរាជអាវុធហត្ថខេត្តបានឲ្យដឹងថា ក្នុងករណីចុះសហការបង្ក្រាបខាងលើ កំលាំងអាវុធហត្ថបានឃាត់ខ្លួនជនសង្ស័យបានម្នាក់ រួមនឹងវត្ថុតាងថ្នាំញៀនមួយចំនួន និងសម្ភារៈសំរាប់ប្រើប្រាស់ និងមធ្យោបាយសេវាថ្នាំញៀនមួយចំនួនផងដែរ។
លោកបានបន្តថា ជនសង្ស័យដែលកំលាំងអាវុធហត្ថឃាត់ខ្លួនមួយនាក់នេះមានឈ្មោះ សុខ ហេង ភេទប្រុស អាយុ៣៤ឆ្នាំ មុខរបរមិនពិតប្រាកដ រស់នៅភូមិទួលងោក ឃុំកំពង់ហ្លួង ស្រុកពញាឮ ខេត្តកណ្តាល។
វត្ថុតាងរួមមាន ១-ថ្នាំញៀនប្រភេទម៉ាទឹកកកចំនួន១២កញ្ចប់មានទម្ងន់២១,៨០ក្រាម ២-ទូរសព្ទ័ដៃម៉ាកសាំស៊ុង១គ្រឿង ៣-ជញ្ជីងថ្លឹងគ្រឿងញៀន១គ្រឿង និងថង់សំរាប់ច្រកគ្រឿងញៀនមួយចំនួនធំ និង៤-ម៉ូតូមួយគ្រឿងម៉ាកអ៊ែប្ល៊ែត ពណ៌ខ្មៅ គ្មានស្លាកលេខ។
បច្ចុប្បន្ន ជនសង្ស័យរួមនឹងវត្ថុតាងថ្នាំញៀន និងសម្ភារៈត្រូវបានការិយាល័យមន្ទីរយុត្តិធម៌កងរាជអាវុធហត្ថខេត្ត កសាងសំណុំរឿងបញ្ជូនទៅតុលាការដើម្បីចាត់ការតាមនីតិវិធី៕
ចែករំលែកព័តមាននេះ