ខេត្តកំពង់ស្ពឺ ៖ រឿងរ៉ាវនឹកស្មានមិនដល់មួយ ដែលម្តាយបង្កើតបានសម្រាលកូននៅក្នុងបន្ទប់ទឹករោងចក្រ ហើយបោះបង់កូនចោល និងគេចខ្លួនទៅបាត់ បង្កឱ្យមនាការភ្ញាក់ដល់កម្មកររាប់រយនាក់ និងសមត្ថកិច្ចរួមទាំងស្ថាប័នពាក់ព័ន្ធ ព្រមទាំងពេទ្យ និងរដ្ឋបាលរោងចក្រនាំទារកដ៏អភ័ព្វនេះ ទៅសង្គ្រោះនៅមន្ទីរពេទ្យត្រាំខ្នារ ។ ករណីនេះធ្វើឱ្យមហាជនមានការភ្ញាក់ផ្អើលជាខ្លាំង រហូតមានអ្នកខ្លះបានជេរប្រទេចស្ត្រីជាម្តាយទារកនេះមិនបណ្តាក់មាត់ឡើយ ដោយសារតែទង្វើប្រៀបដូចជាសត្វធាតុ ។
កម្មការិនីមួយរូប ដែលមានចិត្តមេត្តាលើសពីម្តាយជាអ្នកផ្តល់កំណើត និងជាអ្នកមើលថែតាំងពីនៅមន្ទីរពេទ្យត្រាំខ្នារ រហូតដល់មន្ទីរពេទ្យកុមារជាតិបានឱ្យដឹងថា គាត់ឈ្មោះ សុភា អាយុ៣៦ឆ្នាំ ចំណែកប្តីឈ្មោះ សុគន្ធ អាយុ៣៦ឆ្នាំដូចគ្នា បម្រើការងារនៅរោងចក្រវីងស្តារ៍ស៊ូ រយៈពេល៦ឆ្នាំមកហើយ ។ ដោយមានក្តីអាណិតទារកនោះយ៉ាងខ្លាំង ព្រោះតែមាននិស្ស័យដិតជាប់ជានិច្ចនោះ រូបគាត់ក៏បានតាមមើលថែរហូត
មក ។ ជាងនេះទៀត រូបគាត់និងប្តីបានចាត់ទុកទារកនេះដូចជាកូនបង្កើតដែរ ព្រោះរូបគាត់និងប្តីរៀបការជិត១០ឆ្នាំហើយ មិនមានកូននឹងគេសោះ បើទោះជាទៅបន់ស្រន់សុំកូនពីអារុក្ខអារក្ខអ្នកតាយ៉ាងណាក្តីមិនបានដូចបំណងដែរ ។
កម្មការិនីរូបនេះរៀបរាប់ថា ថ្ងៃមួយក្រោយបុណ្យចូលឆ្នាំថ្មី បន្ទាប់ពីត្រឡប់មកពីស្រុកកំណើតវិញ គាត់បានបន់ស្រន់សុំកូនពីលោកតាក្រហមកប្រចាំរោងចក្រ សូមជួយឱ្យប្តីប្រពន្ធគាត់មានកូនដូចគ្រួសារដទៃផង ។ នៅយប់ថ្ងៃទី១៨ ខែឧសភា ពេលលង់លក់ក្នុងដំណេកស្រាប់តែមានក្មេងប្រុសម្នាក់មកដេកលើពោះធ្វើឱ្យគាត់សប្បាយចិត្តជាខ្លាំង និងរំភើបឥតឧបមា ព្រោះតែក្តីរំពឹងចង់បានកូនក្លាយជាការពិត ។ ផ្ទុយទៅវិញ ក្តីសង្ឃឹមបានរលាយសូន្យអស់ទៅវិញ ព្រោះតែការឃើញរបស់គាត់គឺជាការយល់សប្តិសោះ ។
លុះនៅថ្ងៃទី១៩ ខែឧសភា ដែលជាថ្ងៃមានការភ្ញាក់ផ្អើលនៅក្នុងរោងចក្រថា មានគេកើតកូនហើយបោះបង់ចោលនៅក្នុងបន្ទប់ទឹក គាត់ក៏ស្វះស្វែងតាមរករហូតដល់មន្ទីរពេទ្យត្រាំខ្នារ ។ អាចនិយាយថា ដោយមាននិស្ស័យនិងក្តីអាណិតអាសូរ គាត់ក៏បានស្នើសុំឱ្យគ្រូពេទ្យបញ្ជូនបន្តទៅកាន់មន្ទីរពេទ្យកុមារជាតិ ព្រោះគ្រូពេទ្យនៅមន្ទីរពេទ្យត្រាំខ្នារប្រាប់ថា សុខភាពរបស់ទារកខ្សោយខ្លាំងណាស់ ដោយសារកើតមកមិនគ្រប់ខែ ហើយត្រូវបានទុកចោលឱ្យនៅហាលខ្យល់យូរម៉ោងពេក ។ យ៉ាងណាក៏ដោយ ព្រោះតែនិស្ស័យ រូបគាត់មិនព្រងើយកន្តើយឡើយ និងបានសុំឱ្យបញ្ជូនទារកនេះបន្តភ្លាមៗតែម្តងដើម្បីសង្គ្រោះជីវិត ហើយគាត់តាមថែ ។
ពេលមកដល់មន្ទីរពេទ្យកុមារជាតិ គ្រូពេទ្យបានយកចិត្តទុកដាក់នាំចូលបន្ទប់សង្គ្រោះ ដាក់ខ្យល់អុកសុីហ្សែន ព្រោះពេទ្យពិនិត្យឃើញថា សុខភាពរបស់ទារកកាន់តែខ្សោយទៅៗ ។ ដំបូងគ្រូពេទ្យបានយកដាក់ក្នុងទូ ដែលមានអំពូលភ្លើងពណ៌លឿង និងបន្តដាក់ខ្យល់អុកសុីហ្សែនផងដែរ ដោយដាក់ជាប់ជាប្រចាំនិងប្រាប់ថា ទារកកើតមកមិនគ្រប់ខែហើយបានទម្ងន់តែ១,៦គីឡូក្រាមប៉ុណ្ណោះ ។
បើគិតមកដល់ពេលនេះ រស់រយៈពេល១២ថ្ងៃហើយ ដែលរូបគាត់និងប្តីបានផ្លាស់ប្តូរគ្នាមើលថែទាំទារកនេះ ដោយការចំណាយខ្លះជាលុយផ្ទាល់ខ្លួន ហើយប្រាក់កាសខ្លះទៀតជាអំណោយរបស់សប្បុរសជន ។ នៅក្នុងមន្ទីរពេទ្យអ្នកដឹងរឿងនេះ បានលាន់មាត់សរសើរវាសនាទារកអភ័ព្វនេះថា ពិតជាមានសំណាងណាស់ដែលជួបមនុស្សចិត្តបុណ្យបែបនេះ ។ អ្នកស្រី សុភា រៀបរាប់ទៀតថា អស់រយៈពេល១២ថ្ងៃហើយដែលរូបគាត់និងប្តីមិនបានទៅបម្រើការងារឱ្យរោងចក្រ ព្រោះត្រូវមកចាំមើលថែទាំទារក ដែលរូបគាត់និងប្តីគិតថា អ្នកតាក្រហមកបានដឹកនាំ និងផ្តល់និស្ស័យឱ្យក្មេងនេះបានក្លាយជាកូនរបស់គាត់ ។ ទោះបីមិនបានបំពេញការងារក្តី ក៏មិនបានទទួលនូវការស្តីបន្ទោសដែរ ផ្ទុយទៅវិញថៅកែរោងចក្រថែមទាំងបានជួយឧបត្ថម្ភប្រាក់កាសដល់រូបគាត់ដើម្បីជួយស្រោចស្រង់ជីវិតទារកនេះទៀតផង ។
គាត់បន្តថា នៅពេលចេញពីពេទ្យ រូបគាត់និងប្តីនឹងខិតខំធ្វើការដើម្បីយកប្រាក់មកទិញទឹកដោះគោឱ្យទារកនេះបានបន្តជីវិតទៅថ្ងៃមុខ ហើយប្រសិនបើពេលវេលាផ្លាស់ប្តូរយ៉ាងណានោះ ឬរូបគាត់និងប្តីត្រូវផ្អាកការងារក៏មិនតូចចិត្តដែរ ព្រោះនេះជាផ្លូវដែលគាត់ជ្រើសរើស ហើយរកកន្លែងផ្សេងដើម្បីបន្តការងារតទៅទៀត ។ ទោះជាយ៉ាងណា អ្នកស្រីនិងប្តីក៏សុំក្តីមេត្តាករុណាពីសំណាក់ថៅកែរោងចក្រផងដែរ ចំពោះការដែលអវត្តមានមិនបានបំពេញការងារមួយរយៈនេះ ។អ្នកស្រី សុភា និងប្តី បានសម្រេចចិត្តដាក់ឈ្មោះឱ្យទារកនេះថា«សុគន្ធ វាសនាសំណាង»ដែលឈ្មោះនេះរូបគាត់និងប្តីយល់ថា វាសនាគឺទារកនេះនិងរូបគាត់មានវាសនានឹងគ្នា ហើយសំណាងគឺសូមឱ្យរូបគេមានសំណាងរួចផុតចាកទុក្ខទោស និងជំងឺទាំងឡាយ មានសុខភាពល្អដូចក្មេងដទៃ ។
ម្តាយចិញ្ចឹមចិត្តធម៌រូបនេះបានបញ្ជាក់ជាចុងក្រោយថា ក្រោយពីស្នាក់នៅទទួលការសង្គ្រោះអស់រយៈពេល១២ថ្ងៃកន្លងមកនេះ តាមលោកគ្រូពេទ្យបានប្រាប់ថា កូនរបស់គាត់«វាសនាសំណាង» មានសុខភាពល្អប្រសើរជាងមុនបណ្តើរៗហើយ រង់ចាំតែសុខភាពរបស់គេល្អមួយកម្រិតទៀត គ្រូពេទ្យអាចអនុញ្ញាតឱ្យចេញពីមន្ទីរពេទ្យហើយ ។រហូតមកដល់ពេលនេះគឺ១៣ថ្ងៃហើយ ដែលរឿងរ៉ាវគួរឱ្យហួសចិត្តមួយបានកើតមាននៅក្នុងបន្ទប់ទឹករោងចក្រវីងស្តារ៍ស៊ូ ស្ថិតនៅតាមផ្លូវជាតិលេខ៣ ក្នុងភូមិសុគន្ធា ឃុំមហាឫស្សី ស្រុកគងពិសី ។ ទោះបីជាបែបណា ស្ត្រីដែលបង្កើតកូនដោយខ្លួនឯងក្នុងបន្ទប់ទឹក ហើយទុកកូនចោលរួចគេចខ្លួនបាត់នោះ នៅតែរកមុខមិនឃើញ ដែលមហាជនទូទៅបានដាក់ការសង្ស័យថា អ្នកកើតកូនចោលដូចសត្វធាតុនេះមិនមែនជាមនុស្សខ្ចាត់ព្រាត់មកពីណាទេ គឺជាអ្នកនៅក្នុងរោងចក្រ ទើបអាចចេញចូលបន្ទប់ទឹកនោះបាន ។ ផ្ទុយទៅវិញ ក៏មិនមានប្រភពណាមួយឱ្យដឹងថា តើស្ត្រីម្តាយទារកនេះជាអ្នកណាឡើយ ៕
គួររំលឹកថា ៖
https://kohsantepheapdaily.com.kh/article/640191.html
ចែករំលែកព័តមាននេះ