រាជធានីភ្នំពេញ ៖ គណបក្សខ្មែរតែមួយបានប្រកាសជំហរថា ធ្វើនយោបាយមិនដើម្បីតែអំណាច និងមិនសុខចិត្តលក់ក្បាលដើម្បីតែក្រពះនោះទេ ។ នេះបើតាមអ្នកនាំពាក្យគណបក្សខ្មែរតែមួយ ។ លោក គុជ លី អ្នកនាំពាក្យ និងជាស្ថាបនិកគណបក្សខ្មែរតែមួយបានអះអាងថា លោកធ្វើនយោបាយមិនដើម្បីតែអំណាច និងក្រពះលក់ក្បាលឲ្យអ្នកដ៏ទៃនោះទេ ។
ការលើកឡើងនេះខណៈដែលគណបក្សមួយនេះដែលប្អូនប្រុសលោកបណ្ឌិត កែម ឡី គឺលោកកែម រិទ្ធីសិត ជាប្រធាននោះបានឈរលំដាប់លេខរៀងទី១៩ ក្នុងចំណោមគណបក្ស២០ ដែលចូលរួមប្រកួតប្រជែងការបោះឆ្នោតជ្រើសតាំងតំណាងរាស្ត្រអាណត្តិទី៦ ឆ្នាំ២០១៨ នេះ ។
លោក គុជ លី បានសរសេលើបណ្តាញសង្គមឲ្យដឹងនៅថ្ងៃទី៣១ ឧសភា យ៉ាងដូច្នេះថា ខ្ញុំឆ្លងកាត់នូវបទពិសោធន៍គ្រប់យ៉ាងក្នុងការចូលរួមជាមួយគណបក្សប្រឆាំង តស៊ូដើម្បី សេរីភាព និងលិទ្ធិប្រជាធិបតេយ្យនៅក្នុងប្រទេសកម្ពុជា ។ ខ្ញុំបានប្ដេជ្ញាចិត្តធ្វើជាអ្នកនយោបាយពិតប្រាកដ ព្រោះខ្ញុំបានគិតថា សង្គមនេះគឺជាពោពេញទៅដោយសង្គមវប្បធម៌លាបពណ៍ និងសង្គមវប្បធម៌ក្តិចត្រួយ ។ វប្បធម៌ទាំងពីរនេះអាចធ្វើឲ្យប្រទេសកម្ពុជា និងប្រជាជាតិខ្មែរបាត់បង់សាមគ្គឺជាតិ និងភាតរភាពរវាងខ្មែរ និងខ្មែរពីមួយថ្ងៃទៅមួយថ្ងៃ ។
លោកបញ្ជាក់ថា «ខ្ញុំជាអ្នកនយោបាយបន្តវេន គឺមិនមែនធ្វើនយោបាយដើម្បីតែអំណាចសុខចិត្តលក់ក្បាលព្រោះតែក្រពះនោះទេ បើធ្វើនយោបាយខ្លាចស្លាប់ព្រោះតែក្រពះគឺនៅផ្ទះឈ្នះឯង ។ ខ្ញុំធ្វើនយោបាយដើម្បីតទល់នឹងអ្នកមានអំណាចតែងតែធ្វើបាបប្រជារាស្ត្ររបស់ខ្លួនដោយសារតែតណ្ហានិយម» ។
លោក គុជ លី ដែលឈរជាបេក្ខជនតំណាងរាស្ត្រនៅមណ្ឌលខេត្តសៀមរាបរបស់គណបក្សខ្មែរតែមួយរូបនេះក៏បានលើកឡើងទៀតថា សង្គមកម្ពុជាយើងសព្វថ្ងៃពោរពេញដោយជំងឺរួមមាន ជំងឺសង្គម ជំងឺអ្នកនយោបាយតួឯក ជំងឺបក្សពួក ជំងឺអាត្មានិយម និងជំងឺពុករលួយបើកដៃឲ្យពួកបរទេសចូលមករស់នៅដោយសេរី ។
លោកក៏បានសង្កត់ធ្ងន់ថា «ខ្ញុំបានក្លាយជាអ្នកនយោបាយបន្តវេនមិនខ្លាចទេសេចក្តីស្លាប់ ពីព្រោះខ្ញុំបានកើតមកហើយត្រូវតែស្លាប់ទៅវិញជាច្បាប់ធម្មជាតិអ្វីដែលខ្ញុំត្រូវខ្លាចគឺមិនមានឱកាសបម្រើប្រទេសជាតិដោយសារតែលោកធំនៅបក្ស CPP កាន់អំណាចអស់មួយជីវិត ។ សូមអ្នកនយោបាយជំនាន់ក្រោយ គំនិតថ្មីរួមគ្នាបោះឆ្នោតទំលាក់មនុស្សចាស់ៗក្នុងបក្ស CPP នៅថ្ងៃទី២៩ ខែកក្កដា ឆ្នាំ២០១៨ ខាងមុខនេះ» ។
សូមជម្រាបថា ការប្រកាសជំហររបស់អ្នកនាំពាក្យគណបក្សខ្មែរតែមួយបន្ទាប់ពីគណៈកម្មាធិការជាតិរៀបចំការបោះឆ្នោតបានធ្វើការចាប់លំដាប់លេខរៀងគណបក្សនយោបាយដើម្បីបោះពុម្ពសន្លឹកឆ្នោត ដើម្បីបំរើការក្នុងការបោះឆ្នោតជ្រើសតាំងតំណាងរាស្ត្រ អាណត្តិទី៦ កាលពីថ្ងៃទី២៩ ឧសភា កន្លងមកនេះ ៕
ចែករំលែកព័តមាននេះ