រាជធានីភ្នំពេញ ៖ យ៉ាងហោចណាស់បុរស២នាក់បានរងរបួសធ្ងន់ និងស្រាល ខណៈពេលដែលពួកគេទាំងពីរនាក់បានជិះម៉ូតូធំមួយគ្រឿងម៉ាក Duke ឌុបគ្នាទៅធ្វើការ លុះដល់ចំណុចផ្លូវបំបែកជា៤ ក៏ត្រូវបានរថយន្តមួយគ្រឿង ដែលបើកបរដោយស្ត្រីម្នាក់មកបុកបណ្តាលអោយខ្ទាត និងកិនម៉ូតូជាប់ខាងក្រោមនោះ។ ករណីគ្រោះថ្នាក់ចរាចរណ៍នេះដែរបានកើតឡើងកាលពីវេលាម៉ោង២និង៤៥នាទីរសៀលថ្ងៃទី៣០ ខែឧសភា ឆ្នាំ២០១៨ នៅចំណុចផ្លូវលេខ៥៧ កែងនឹងផ្លូវលេខ៣៦០ ក្នុងសង្កាត់ បឹងកេងកងទី១ ខណ្ឌចំការមន។
តាមប្រភពព័ត៌មានពីនគរបាលបានប្រាប់ឱ្យដឹងថា បុរសរងគ្រោះទាំងពីរនាក់ អ្នកបើកបរម៉ូតូឈ្មោះ ឌួង រ៉ានី អាយុ២៤ឆ្នាំ មុខរបរជាងសំណង់ និងអ្នកជិះពីក្រោយឈ្មោះអៀន អេង អាយុ២៧ឆ្នាំ មុខរបរជាងសំណង់ បុរសរងគ្រោះទាំង២នាក់នេះស្នាក់នៅក្នុងសង្កាត់ផ្សារថ្មីទី៣ ខណ្ឌដូនពេញជាមួយគ្នា។
មុនពេលកើតហេតុ បុរសរងគ្រោះទាំងពីរនាក់ខាងលើបានជិះម៉ូតូធំមួយគ្រឿងម៉ាក Duke ពណ៌ស លាយលឿង ពាក់ស្លាកលេខ ភ្នំពេញ ១CJ-៥៣៩១ បើកបរក្នុងទិសដៅពីកើតទៅលិច ក្នុងបំណងទៅធ្វើការនៅការដ្ឋានមួយកន្លែងដែលនៅក្បែរនោះ ។
តាមប្រភពដដែលក៏បានប្រាប់បន្តទៀតថា លុះមកដល់ចំណុចកើតហេតុដែលជាផ្លូវបំបែកជា៤នោះ ក៏ស្រាប់តែមានរថយន្តស៊េរីទំនើបមួយគ្រឿង ពណ៌ស ពាក់ស្លាកលេខ ភ្នំពេញ ២AU-៦៥៩៨ ដែលបើកបរដោយស្ត្រីម្នាក់ និងស្ត្រី២នាក់ទៀតជាអ្នករួមដំណើរ ក៏ស្រាប់តែរថយន្តនោះបានទៅបុកម៉ូតូធំមួយគ្រឿងម៉ាក Duke បណ្តាលឱ្យម៉ូតូធំនោះដួល ចំណែកបុរសទាំងពីរនាក់ខ្ទាតចេញឆ្ងាយ ហើយទំនងជាស្ត្រីជាបើកបររថយន្តមានការភ័យស្លន់ស្លោ ក៏ស្រាប់តែជាន់ហ្គាបន្ថែម និងកិនអូសជាប់ម៉ូតូនៅពីខាងក្រោមតែម្តង បានបណ្តាលឱ្យបុរសជាអ្នកបើកបរម៉ូតូរងរបួសជើងខាងស្តាំធ្ងន់ធ្ងរ និងបុរសជាអ្នកជិះខាងក្រោយរលាត់ដៃជើងរងរបួសស្រាល រីឯម៉ូតូធំម៉ាក Duke បានរងការខូចខាត ។
ភ្លាមៗនោះ បុរសជាអ្នកបើកបរម៉ូតូដែលរងរបួសធ្ងន់ត្រូវបានគេបញ្ជូនយកទៅព្យាបាលនៅគ្លីនិកឯកជនមួយកន្លែងដែលនៅក្បែរនោះ ហើយកម្លាំងមានសមត្ថកិច្ចក៏បានចុះមកដល់ធ្វើការវាស់វែង រួចយកដែក
ដូយមកដូយយកម៉ូតូចេញពីក្រោមរថយន្តផងដែរ។ ក្រោយពីបានយកម៉ូតូធំម៉ាក Duke មួយគ្រឿងនោះចេញពីខាងក្រោមរថយន្តរួចហើយ ក៏បានយកម៉ូតូធំនោះមកដាក់លើចិញ្ចើមផ្លូវដើម្បីធ្វើការសម្របសម្រួលគ្នា ដោយភាគីខាងរថយន្តមានក្រុមហ៊ុនធានារ៉ាប់រងបានចេញមកធ្វើការដោះស្រាយ ដោយយល់ព្រមយកម៉ូតូធំដែលរងការខូចខាតទៅធ្វើការជួសជុល និងចេញថ្លៃព្យាបាលដល់បុរសដែលជាជនរងគ្រោះទាំង២នាក់ដើម្បីបញ្ចប់រឿងនៅនឹងកន្លែងកើតហេតុភ្លាមៗផងដែរ ៕
ចែករំលែកព័តមាននេះ