ខេត្តបន្ទាយមានជ័យ ៖ រថយន្ត១គ្រឿងដឹកសត្វព្រៃជាង៧០០គីឡូក្រាម ដែលលួចនាំចូលពីប្រទេសថៃតាមច្រករបៀងស្រុកម៉ាឡៃ ត្រូវនគរបាលចាប់បាន និងប្រគល់ជូនមន្ត្រីរដ្ឋបាលព្រៃឈើ នាព្រឹកថ្ងៃទី២៨ ខែឧសភា នៅស្នងការដ្ឋាននគរបាលខេត្ត ។
លោកឧត្តមសេនីយ៍ត្រី ចាប សុផារិទ្ធិ ស្នងការរងនគរបាលខេត្ត ទទួលផែនប្រឆាំងបទល្មើសសេដ្ឋកិច្ច បានឱ្យដឹងថា រថយន្ត១គ្រឿងនេះម៉ាកតូយូ៉តា តាកូម៉ា ពាក់ផ្លាកលេខ បន្ទាយមានជ័យ ២A-៧២៨២ ដឹកសត្វព្រៃ២ប្រភេទ ទម្ងន់សរុប៧២១គីឡូក្រាមក្នុងនោះ មានទន្សងចំនួន៧០ក្បាលស្មើនឹងទម្ងន់៣៥១គីឡូក្រាម និងអណ្តើក៦១៨ក្បាល ទម្ងន់សរុប៤០៦គីឡូក្រាម ។ អ្នកបើកបររថយន្តខាងលើឈ្មោះ សោម កែវ ភេទប្រុស អាយុ២៤ឆ្នាំ នៅភូមិវាលរហាត់ ឃុំម៉ាឡៃ ស្រុកម៉ាឡៃ ។
រថយន្តដឹកសត្វព្រៃមួយគ្រឿងនេះ ត្រូវចាប់ឃាត់បានកាលពីវេលាម៉ោង៩និង៣០នាទីយប់ថ្ងៃទី២៧ ខែឧសភា នៅលើកំណាត់ផ្លូវជាតិលេខ៥៩ ស្ថិតក្នុងភូមិថ្មី ឃុំម៉ាឡៃ ស្រុកម៉ាឡៃ ។បើតាមចម្លើយរបស់អ្នកបើកបររថយន្តគឺរូបគេស៊ីឈ្នួលដឹកសត្វព្រៃឱ្យឈ្មោះ ជីម និងឈ្មោះ ភ័ណ ជាឈ្មួញសត្វព្រៃ រស់នៅភូមិបឹងបេង ឃុំបឹងបេង ស្រុកម៉ាឡៃ ក្នុង១ជើងបានកម្រៃ១០ម៉ឺនរៀល ។ រូបគេរកស៊ីបែបនេះរយៈពេលជាង១ឆ្នាំមកហើយ ដោយលួចនាំចូលពីថៃមកតាមច្រករបៀងក្បែរវត្តឡងខង ច្រករបៀងនៅជិតវត្ត៩៣ និងច្រករបៀងជិតរោងវែង ស្ថិតក្នុងស្រុកម៉ាឡៃ ក្នុងគោលដៅដឹកចេញពីខេត្តបន្ទាយមានជ័យ ឆ្លងកាត់ខេត្តបាត់ដំបងឆ្ពោះទៅរាជធានីភ្នំពេញ ។
លោកឧត្តមសេនីយ៍ទោ អាត់ ខែម ស្នងការនគរបាលខេត្ត ថ្លែងថា ក្រោយពេលបង្ក្រាបបានរថយន្តដឹកសត្វព្រៃខាងលើ និងឃាត់ខ្លួនអ្នកបើកបររួចមក បច្ចុប្បន្នកំពុងស្រាវជ្រាវតាមចាប់ខ្លួនឈ្មួញនាំចូលសត្វព្រៃល្មើសច្បាប់ជាបន្តទៀត ដើម្បីចាត់ការតាមច្បាប់ ។ ចំណែកសត្វព្រៃទាំង២ប្រភេទដែលមានចំនួនសរុប៦៨៨ក្បាល ស្មើនឹងទម្ងន់៧២១គីឡូក្រាម ត្រូវបានប្រគល់ឱ្យខាងខណ្ឌរដ្ឋបាលព្រៃឈើ ។ រីឯរថយន្តនិងអ្នកបើកបរ ត្រូវបានបញ្ជូនទៅសាលាដំបូងខេត្តដើម្បីចាត់ការតាមច្បាប់ ៕
ចែករំលែកព័តមាននេះ