មេដឹកនាំកូរ៉េទាំងពីរជួបគ្នាជាលើកទី២នៅភូមិព្រំដែន
ប្រទេសកូរ៉េទាំងពីរ ៖ ប្រធានាធិបតីកូរ៉េខាងត្បូងលោក MOON JAE IN បានជួបកាលពីថ្ងៃទី២៦ ឧសភា ជាមួយមេដឹកនាំកូរ៉េខាងជើងលោក គីម…
ប្រទេសកូរ៉េទាំងពីរ ៖ ប្រធានាធិបតីកូរ៉េខាងត្បូងលោក MOON JAE IN បានជួបកាលពីថ្ងៃទី២៦ ឧសភា ជាមួយមេដឹកនាំកូរ៉េខាងជើងលោក គីម ជុងអ៊ុន ដែលជាការជួបគ្នាកំពូលលើកទី២ នៅភូមិព្រំដែនប៉ានមុនហ្សូម។
វិមានប្រធានាធិបតីកូរ៉េខាងត្បូង ប្រកាសថា មេដឹកនាំទាំង២បានជួបគ្នានៅផ្នែកខាងកូរ៉េខាងជើងនៃភូមិព្រំដែននេះ នាវេលាម៉ោង១៥ទៅ១៧ម៉ោងក្នុងស្រុក។ មេដឹកនាំទាំង២បានផ្លាស់ប្ដូរទស្សនៈគ្នាលើការអនុវត្តសេចក្ដីថ្លែងការណ៍ ប៉ានមុនហ្សូមចុះថ្ងៃទី២៧ មេសា និងលើការរៀបចំដោយជោគជ័យ ការជួបគ្នាកំពូលរវាងកូរ៉េខាងជើង និងសហរដ្ឋអាមេរិក។
លោកគីម ជុងអ៊ុន និងលោក MOON JAE IN បានជួបគ្នាកំពូលលើកទីមួយ នៅផ្នែកកូរ៉េខាងត្បូងនៃភូមិប៉ានមុនហ្សូម កាលពីថ្ងៃទី២៧ មេសា ដែលផ្ដោតលើការរំសាយនុយក្លេអ៊ែរ នៅឧបទ្វីបកូរ៉េ ហើយប្រែក្លាយយុទ្ធសន្តិភាពបច្ចុប្បន្នទៅជាសន្ធិសញ្ញាសន្តិភាពមួយ។
ការជួបគ្នាអន្តរកូរ៉េលើកទី២ ធ្វើឡើងបន្ទាប់ពីប្រធានាធិបតីអាមេរិក លោកដូណាល់ ត្រាំប្រកាសនាថ្ងៃទី២៥ ឧសភាថា អាចលើកពេល ការជួបគ្នាដែលបានគ្រោងទុក ជាមួយលោកគី មជុងអ៊ុន។ កាលពីថ្ងៃទី២៤ ឧសភា លោកត្រាំបានផ្ញើសារលិខិតមួយច្បាប់ដល់ លោកគីម ជុងអ៊ុន ដើម្បីជម្រាបជូនលោកថា ការជួបគ្នាកំពូលដែលពីដំបូង គ្រោងធ្វើនាថ្ងៃទី១២ មិថុនា នៅសិង្ហបុរី នឹងពុំមានឡើយ។
ចំណែកអនុរដ្ឋមន្ត្រីការបរទេសទីមួយ កូរ៉េខាងជើងលោក KIM KYE GWAN បានឆ្លើយតបវិញថា ប្រទេសរបស់លោកត្រៀមពិភាក្សាគ្រប់ពេល និងទោះបីតាមវិធីណាជាមួយសហរដ្ឋអាមេរិក ដើម្បីដោះស្រាយបណ្ដាបញ្ហាដែលកើតមានរវាងប្រទេសទាំង២។
ចិនគូសបញ្ជាក់នាថ្ងៃទី២៥ ឧសភាថា ខ្លួនសង្ឃឹមដែលសហរដ្ឋអាមេរិក និងកូរ៉េខាងជើង នឹងថែរក្សាការរីកចម្រើន នាពេលថ្មីៗនេះរបស់ពួកគេ ហើយនឹងបន្តដោះស្រាយការព្រួយបារម្ភទាំងឡាយរបស់ពួកគេ តាមរយៈការចរចា ហើយនឹងសម្រួលដល់ការរំសាយនុយក្លេអ៊ែរនៅឧបទ្វីបកូរ៉េ៕
ចែករំលែកព័តមាននេះ