រាជធានីភ្នំពេញ ៖ គណៈកម្មាធិការអចិន្ត្រៃយ៍នៃរដ្ឋសភាបានសម្រេចប្រគល់សេចក្តីព្រាងច្បាប់ និងសេចក្តីវិសោធនកម្មច្បាប់មួយចំនួន បន្ទាប់ពីពិនិត្យទៅគណៈកម្មការជំនាញ ដើម្បីសិក្សា និងពិនិត្យ រួចបញ្ជូនមកគណៈកម្មាធិការអចិន្ត្រៃយ៍វិញ ។
ការសម្រេចបញ្ជូនលើកសេចក្តីព្រាងច្បាប់ក៏ដូចជា សេចក្តីវិសោធនកម្មច្បាប់នេះធ្វើក្នុងកិច្ចប្រជុំគណៈកម្មាធិការអចិន្ត្រៃយ៍រដ្ឋសភានាព្រឹកថ្ងៃទៅ២២ ខែឧសភា ឆ្នាំ២០១៨ ក្រោមធិបតីភាពសម្តេចហេង សំរិន ប្រធានរដ្ឋសភា ដោយមានសមាជិកគណៈកម្មាធិការអចិ ន្ត្រៃយ៍ទាំងអស់ ។
ថ្លែងប្រាប់ក្រុមអ្នកសារព័ត៌មានលោកឡេង ប៉េងឡុង អ្នកនាំពាក្យរដ្ឋសភាបានឲ្យដឹងក្រោយកិច្ចប្រជុំថា អង្គប្រជុំបានធ្វើការពិភាក្សា និងអនុម័តតាមរបៀបវារៈដោយមានលទ្ធផលដូចជា ៖ ទី១ – អង្គប្រជុំបានអនុម័តប្រគល់សេចក្តីព្រាងច្បាប់ស្តីពីការអនុម័តយល់ព្រមលើកិច្ចព្រមព្រៀងស្តីពី ការបង្កើតអង្គការសហប្រតិបត្តិការព្រៃឈើអាស៊ីដល់គណៈកម្មការកិច្ចការបរទេស សហ-ប្រតិ បត្តិការអន្តរជាតិ ឃោសនាការ និងព័ត៌មាននៃរដ្ឋសភាពិនិត្យសិក្សាដោយសហការជាមួយគណៈកម្មការផែនការ វិនិយោគ កសិកម្ម អភិវឌ្ឍន៍ជនបទ បរិស្ថាន និងធនធានទឹកនៃរដ្ឋសភា ហើយធ្វើរបាយការណ៍ជូនគណៈកម្មាធិការអចិន្ត្រៃយ៍រដ្ឋសភាវិញ ។ ទី២ – អង្គប្រជុំបានអនុម័តប្រគល់សេចក្តីព្រាងច្បាប់ស្តីពីសញ្ជាតិដល់គណៈកម្មការមហាផ្ទៃការពារជាតិ និងមុខងារសាធារណៈនៃរដ្ឋសភា ពិនិត្យសិក្សា ដោយសហការជាមួយគណៈកម្មការនីតិកម្ម និងយុត្តិធម៌នៃរដ្ឋសភា ហើយធ្វើរបាយការណ៍ជូនគណៈកម្មាធិការអចិន្ត្រៃយ៍រដ្ឋសភាវិញ ។ ទី៣- អង្គប្រជុំបានអនុម័តប្រគល់សេចក្តីព្រាងច្បាប់ស្តីពីការរៀបចំ និងការប្រព្រឹត្តទៅនៃគណៈរដ្ឋមន្ត្រីដល់គណៈកម្មការនីតិកម្ម និងយុត្តិធម៌នៃរដ្ឋសភា ពិនិត្យសិក្សា ហើយធ្វើរបាយការណ៍ជូនគណៈកម្មាធិការអចិន្ត្រៃយ៍រដ្ឋសភាវិញ ។
ទី៤- អង្គប្រជុំបានអនុម័តប្រគល់សេចក្តីព្រាងច្បាប់ស្តីពីវិសោធនកម្មមាត្រា៣ មាត្រា២៣ មា ត្រា៣០ មាត្រា៣៣ មាត្រា៣៤ មាត្រា៣៥ មាត្រា៣៦ មាត្រា៣៧ មាត្រា៣៨ មាត្រា៣៩ និងមាត្រា៤០នៃច្បាប់ស្តីពីការគ្រប់គ្រង និងការធ្វើអាជីវកម្មធនធានរ៉ែដល់គណៈកម្មការ សាធារណការ ដឹកជញ្ជួន ទូរគមនាគមន៍ ប្រៃសណីយ៍ ឧស្សាហ រ៉ែ ថាមពលពាណិជ្ជកម្ម រៀបចំដែនដីនគរូបនីយកម្ម និងសំណង់នៃរដ្ឋសភា ពិនិត្យសិក្សា ហើយធ្វើរបាយការណ៍ជូនគណៈកម្មាធិការអចិន្ត្រៃយ៍រដ្ឋសភាវិញ ។
និង៥- អង្គប្រជុំបានអនុម័តសេចក្តីសម្រេចស្តីពីក្រមសីលធម៌របស់តំណាងរាស្ត្រដែលរៀបចំដោយលោកប៉ែន បញ្ញា ប្រធានគណបក្សនីតិកម្ម និងយុត្តិធម៌ ។
យ៉ាងណាក្តីបើតាមលោកឡេង ប៉េងឡុងបានឲ្យដឹងថា ក្នុងកិច្ចប្រជុំអចិន្ត្រៃយ៍រដ្ឋសភាមិនទាន់កំណត់ថ្ងៃណាមួយជាក់លាក់ ដើម្បីបើកសម័យប្រជុំពេញនោះទេ ។ ជាមួយគ្នានោះដែរ អ្នកនាំពាក្យរដ្ឋសភាក៏បានឲ្យដឹងថា សមាជិករដ្ឋសភាដែលកំពុងធ្វើការ និងអស់សុពលភាពនៅពេលសមាជិកថ្មីមកចូលមកជំនួស សមាជកថ្មីកើតឡើងយ៉ាងយូរ៦០ថ្ងៃ ក្រោយការបោះឆ្នោត ៕
ចែករំលែកព័តមាននេះ