រាជធានីភ្នំពេញ ៖ ម្តាយដើរឆ្លងផ្លូវ រីឯកូនស្រីអាយុ៦ឆ្នាំដើរឱបចង្កេះម្តាយតាមក្រោយ ជាអកុសលឆ្លងដល់ពាក់កណ្តាលផ្លូវត្រូវរថយន្តមួយគ្រឿងកៀរបណ្តាលឲ្យម្តាយដួលរងរបួសស្រាល ចំណែកកូនស្រីបានខ្ទាតចូលក្រោមរថយន្តកុងតឺន័រមួយគ្រឿងទៀតកិនស្លាប់ភ្លាមៗទាំងមេឃកំពុងតែរលឹមស្រិចៗ បង្កឲ្យមានការភ្ញាក់ផ្អើលកាលពីវេលាម៉ោង៩យប់ ថ្ងៃទី២១ ខែឧសភា នៅតាមបណ្តោយ…
រាជធានីភ្នំពេញ ៖ ម្តាយដើរឆ្លងផ្លូវ រីឯកូនស្រីអាយុ៦ឆ្នាំដើរឱបចង្កេះម្តាយតាមក្រោយ ជាអកុសលឆ្លងដល់ពាក់កណ្តាលផ្លូវត្រូវរថយន្តមួយគ្រឿងកៀរបណ្តាលឲ្យម្តាយដួលរងរបួសស្រាល ចំណែកកូនស្រីបានខ្ទាតចូលក្រោមរថយន្តកុងតឺន័រមួយគ្រឿងទៀតកិនស្លាប់ភ្លាមៗទាំងមេឃកំពុងតែរលឹមស្រិចៗ បង្កឲ្យមានការភ្ញាក់ផ្អើលកាលពីវេលាម៉ោង៩យប់ ថ្ងៃទី២១ ខែឧសភា នៅតាមបណ្តោយ ផ្លូវ៣៧១ ជិតស្ថានីយបូមទឹកបឹងទំពុន ស្ថិតក្នុងសង្កាត់បឹងទំពុន២ ខណ្ឌមានជ័យ។
កុមារីរងគ្រោះឈ្មោះសែម ធីតា អាយុ៦ឆ្នាំ បានស្លាប់នឹងនៅកន្លែងកើតហេតុ ចំណែកម្តាយឈ្មោះ អួន ស្រីដែត អាយុ២៨ឆ្នាំ ស្នាក់នៅផ្ទះជួលកន្លែងកើតហេតុ មានស្រុកកំណើតនៅភូមិដើមចាន់ សង្កាត់ច្បារអំពៅ២ ខណ្ឌច្បារអំពៅ ។
ប្រភពព័ត៌មានពីម្តាយកុមារីរងគ្រោះបានប្រាប់ឱ្យដឹងថា មុនពេលកើតហេតុ គាត់ដើរឆ្លងផ្លូវ៣៧១ពីមុខផ្ទះជួលរបស់គាត់ស្នាក់នៅទៅចំហៀងថ្នល់ម្ខាងទៀត ក្នុងទិសដៅពីត្បូងទៅជើង ពេលនោះកូនស្រី (កុមារីរងគ្រោះ) របស់គាត់បានដើរទៅតាមគាត់ដែរ ទោះបីគាត់ហាមមិនឲ្យកូនស្រីឆ្លងផ្លូវទៅតាមគាត់ ក៏កូនស្រីមិនព្រមដែរ គាត់ក៏ឱ្យកូនស្រីឆ្លងទៅជាមួយ ដោយកូនស្រីដើរឱបចង្កេះគាត់ពីក្រោយ ពេលឆ្លងដល់ពាក់កណ្តាលផ្លូវ ក៏មានរថយន្តមួយគ្រឿងមិនចាំម៉ាក បើកបរតាមផ្លូវ៣៧១ ក្នុងល្បឿនលឿន ក្នុងទិសដៅពីកើតទៅលិច បានកៀរគាត់បណ្តាលឱ្យដួលហើយរងរបួសស្រាល ចំណែកកូនស្រីគាត់បានខ្ទាតចូលក្រោមកង់រថយន្តកុងទីន័រដឹកដែកមួយគ្រឿងទៀត ពាក់ស្លាកលេខភ្នំពេញ ៣A-៥២០៥ បើកបរដោយបុរសម្នាក់ បើកបរក្នុងទិសដៅបញ្ច្រាសគ្នា បណ្តាលឱ្យរថយន្តកុងតឺន័រនោះកិនចំក្បាលកូនស្រីគាត់បែកខ្ទេចចេញខួរស្លាប់ភ្លាមៗនៅកន្លែងកើតហេតុ ហើយរថយន្តបង្កដែលកៀរគាត់ដួលនោះបានបន្ថែមល្បឿនបើករត់គេចបាត់ស្រមោល ចំណែករថយន្តកុងតឺន័រដឹកដែកនោះបានបើកបន្តទៅមុខ២០០ម៉ែត្រ ក៏ត្រូវប្រជាពលរដ្ឋ និងសមត្ថកិច្ចឃាត់បានអ្នកបើកបររថយន្តកុងតឺន័រនោះយកទៅប៉ុស្តិ៍នគរបាលបឹងទំពុន២ ដើម្បីប្រគល់ឱ្យមន្ត្រីជំនាញចរាចរណ៏ចាត់ការបន្តតាមនិតិវីធី ។
តាមចម្លើយសារភាពរបស់អ្នកបើកបររថយន្តកុងតឺន័របានឱ្យដឹងថា ពេលដែលគាត់ធ្វើដំណើរតាមដងផ្លូវក៏មានម្តាយនិងកូនស្រីដើរឆ្លងផ្លូវពីមុខរថយន្តគាត់ ហើយគាត់ក៏ឈប់រថយន្តនៅកណ្តាលផ្លូវ ខណៈនោះក៏មានរថយន្តមួយគ្រឿងទៀតបើកបរបញ្ច្រាសទិសគ្នាបានបើកកៀរទាំងម្តាយនិងកូនស្រីនោះបណ្តាលឱ្យកូនស្រីនោះដួលចូលក្រោមរថយន្តគាត់ចំកង់ខាងក្រោយកិនបែកក្បាលស្លាប់តែម្តង។
ក្រោយកើតហេតុ ម្តាយនិងឪពុកកុមារីរងគ្រោះបានត្រឹមតែយំសោកបោកខ្លួនក្បែរសពកូនស្រីស្រែកដង្ហោយហៅអោយកូនក្រោកមកវិញ មើលទៅគួអោយសង្វេគពន់ពេក ។ ចំណែករថយន្តកុងតឺន័រ និងអ្នកបើកត្រូវបានសមត្ថកិច្ចជំនាញធ្វើការវាស់វែងនាំយកទៅរក្សាទុកនៅការិយាល័យចរាចរណ៍ជើងគោក រង់ចាំដោះស្រាយនៅពេលក្រោយ រីឯសពកុមារីនោះត្រូវបានក្រុមគ្រួសារយកទៅធ្វើបុណ្យនៅវត្តច្បារអំពៅតាមប្រពៃណី ៕
ចែករំលែកព័តមាននេះ