រាជធានីភ្នំពេញ ៖ បុរសម្នាក់បានប្ដឹងឲ្យនគរបាលប៉ុស្ដិ៍ចោមចៅ៣ ជួយអន្តរាគមន៍ដោយបានចោទប្រកាន់ទៅលើក្រុមអ្នកបើករថយន្តឈ្នួលថា បានលើកគ្នា៤ទៅ៥នាក់ព្រួតវាយមកលើខ្លួន បន្ទាប់ពីមានការទាស់ពាក្យសម្ដីគ្នាបន្តិចបន្តួច ។ បុរសនេះបានសុំត្រឹមឲ្យនគរបាលជួយហៅក្រុមអ្នកបើករថយន្តឈ្នួលទាំងនោះធ្វើការអប់រំណែនាំតែប៉ុណ្ណោះ មិនបានឲ្យចាត់ការតាមច្បាប់ឡើយ ។ ហេតុការណ៍នោះបានកើតឡើងកាលពីវេលាម៉ោង៨ព្រឹក ថ្ងៃទី២០ ខែឧសភា ឆ្នាំ២០១៨ នៅតាមបណ្ដោយផ្លូវជាតិលេខ៤ ត្រង់ចំណុចខាងលិចរង្វង់មូលថ្នល់បំបែកចោមចៅ ស្ថិតនៅក្នុងភូមិថ្នល់បំបែក សង្កាត់ចោមចៅ៣ រាជធានីភ្នំពេញ ។
បុរសខាងលើមានវ័យជាង៣០ឆ្នាំ រស់នៅក្នុងខេត្តកំពង់ស្ពឺ ហើយមិនបានប្រាប់អត្តសញ្ញាណរបស់ខ្លួនទេ និងបានប្រាប់នគរបាលប៉ុស្តិ៍ចោមចៅ៣ថា មានអ្នកបើកបររថយន្តឈ្នួល និងបក្សពួកសរុបមានគ្នាចំនួន៤ទៅ៥នាក់ បានព្រួតវាយមកលើរូបខ្លួន ។ ដែលការប្រើអំពើហិង្សានេះ បន្ទាប់ពីមានទំនាស់ពាក្យសម្ដីគ្នាបន្តិចបន្តួចពេលដែលខ្លួនជិះរថយន្តឈ្នួលរបស់ជនដៃដល់ទាំងនោះ ប៉ុន្តែមិនបានបណ្ដាលឲ្យខ្លួនមានរបួសស្នាមអ្វីឡើយ ។
ប្រភពដដែលបានបន្តទៀតថា នៅមុនពេលកើតហេតុគាត់បានទទួលដំណឹងថា ប្រពន្ធត្រូវបានចោរដាក់ថ្នាំសណ្ដំនៅម្ដុំឃុំស្រង់ ស្រុកគងពិសី ខេត្តកំពង់ស្ពឺ យកគ្រឿងអលង្ការដូចជា កងដៃ ខ្សែដៃ ខ្សែកជាដើម អស់ពីខ្លួន ។ បន្ទាប់ពីទទួលបានដំណឹងនេះភ្លាមខ្លួនបានប្រញាប់ប្រញាល់ធ្វើដំណើរតាមម៉ូតូឌុបទៅចំណតរថយន្តចោមចៅ ហើយបានជិះរថយន្តម៉ាកសាំយ៉ុងពណ៌ស១គ្រឿង ដើម្បីធ្វើដំណើរទៅមើលប្រពន្ធ ។
បុរសនេះបានបន្តទៀតថា ដោយសារតែប្រញាប់ខ្លួនបានអន្ទះសារខ្លាំង ចំណែករថយន្តមិនព្រមចេញដំណើរសោះដោយម្ចាស់បានរង់ចាំដាក់ម៉ូយបន្ថែមទៀត ។ ពេលនោះខ្លួនបានសម្រេចចិត្តសួរទៅកាន់អ្នកបើកបររថយន្តនោះថា តើពេលណាទើបចេញដំណើរ ? ចំណែកអ្នកបើកបរបានឆ្លើយថា រង់ចាំដាក់ម៉ូយ៣នាក់ទៀតសិន ។ បន្ទាប់ពីបានឮបែបនេះគាត់បានសួរថា បើអញ្ចឹងតើ៣នាក់នឹង ដោយក្នុងម្នាក់ថ្លៃប៉ុន្មានទៅ ? អ្នកបើករថយន្តឈ្នួលឆ្លើយថា ក្នុងម្នាក់១ម៉ឺនរៀល ហើយទាំង៣នាក់៣ម៉ឺនរៀល ។ ខណៈនោះគាត់បានប្រាប់ទៅវិញថា អញ្ចឹងចាំខ្ញុំចេញជំនួសទាំងអស់មិនចាំបាច់រង់ចាំតទៅទៀតទេ ព្រោះខ្ញុំប្រញាប់ខ្លាំងណាស់ ។ បុរសខាងលើបានបន្តទៀតថា ពេលនោះអ្នកបើករថយន្តបានយល់ព្រមហើយ ប៉ុន្តែនៅតែមិនព្រមចេញដំណើរដដែល ហើយគាត់ក៏សួរពួកគេនៅតែនិយាយថា រង់ចាំដាក់ម៉ូយ៣នាក់ទៀតដដែល ។
ចំណែកគាត់បានសួរទៀតថា ចុះក្រែងអម្បាញ់មិញយល់ព្រមថា ចេញដំណើរហើយ ឥឡូវម្ដេចប្រែក្រឡាស់ទៀតហើយអញ្ចឹងហើយម៉ូយ៣នាក់ និងបើហៅបានតើថ្លៃប៉ុន្មានទើបព្រមចេញដំណើរ ខ្ញុំ នឹងចេញលុយជំនួស ដើម្បីឲ្យឆាប់បានចេញដំណើរទៅចុះ ។ ភ្លាមៗនោះអ្នកបើករថយន្តខាងលើបានឆ្លើយថា បើចង់ចេញជំនួសដើម្បីឆាប់បានចេញដំណើរនោះ គឺទាល់តែឲ្យ១៥០ដុល្លារមក បើមិនដូច្នេះទេមិនទាន់ចេញដំណើររង់ចាំដាក់ម៉ូយឲ្យគ្រប់សិន ។
ក្រោយពេលឮអ្នកបើកបររថយន្តនិយាយឈ្លើយយ៉ាងនេះគាត់ខឹងខ្លាំងណាស់ក៏បានជេរ និងចង្អុលមុខ ហើយក៏ត្រូវអ្នករថយន្តលើកគ្នា៤ទៅ៥នាក់ព្រួតវាយគាត់តែម្ដង ។
នគរបានបាននិយាយថា បុរសនេះមិនបានដាក់ពាក្យបណ្ដឹងជាលាយលក្ខណ៍អក្សរ ដើម្បីឲ្យកម្លាំងចាត់ការតាមច្បាប់នោះទេ គឺគ្រាន់តែប្ដឹងផ្ទាល់មាត់សុំឲ្យជួយធ្វើការអប់រំណែនាំដល់ក្រុមអ្នកបើករថយន្តនេះប៉ុណ្ណោះ បន្ទាប់មកក៏បានចាកចេញពីកន្លែងកើតហេតុទៅបាត់ ៕
ចែករំលែកព័តមាននេះ