រាជធានីភ្នំពេញ ៖ អាជ្ញាធរខណ្ឌឫស្សីកែវដឹកនាំដោយលោក ស៊ូ សោគន្ធ អភិបាលរងបានចុះទៅរុះរើរោងចាំដីមួយកន្លែងរបស់លោក មាស សាវឿន ដែលនៅតែសាងសងរំលោភលើដីទំនាស់ ។ ការចុះរុះរើនេះធ្វើឡើងកាលពីវេលាម៉ោងប្រមាណ៩ព្រឹក ថ្ងៃទី១៦ ខែឧសភា ឆ្នាំ២០១៨ នៅក្នុងភូមិទួលពពែ សង្កាត់ទួលសង្កែទី២ខណ្ឌឬស្សីកែវ ។
លោក ស៊ូ សោគន្ធ អភិបាលរងខណ្ឌឬស្សីកែវបានអោយដឹងថា ការចុះរុះរើរោងដែលសង់រំលោភលើដីទំនាស់ធ្វើឡើងតាមបញ្ជារបស់លោក ឃួង ស្រេង អភិបាលរាជធានីភ្នំពេញបន្ទាប់ពីមានពាក្យបណ្តឹងរបស់ ឈ្មោះ លឹម សុវណ្ណា ភេទស្រី អាយុ៦១ឆ្នាំ ជាម្ចាស់ដី ។ លោកអភិបាលរងបានអោយដឹងទៀតមុនពេលចុះរុះរើអាជ្ញាធរបានចុះមកហាមឃាត់ និងណែនាំអោយរុះរើច្រើនលើកច្រើនសារមកហើយតែលោក មាស សាវឿន មិនស្តាប់ ចេះតែសង់លើដីទំនាស់នោះជាបន្តបន្ទាប់ទើបអាជ្ញាធរចុះមកប្រើវិធានការណ៍រដ្ឋបាលតែម្តង ។ ការប្រើវិធានការណ៍រដ្ឋបាលចុះរុះរោងនោះបានសម្រេចជោគជ័យទោះបីមានការតវ៉ាយ៉ាងណាក៏ដោយអាជ្ញាធរលែងយោគយល់ទៀតឡើយ ។
តាមប្រភពព័ត៌មានអោយដឹងទៀតថា ដីទំនាស់នោះមានទំហំប្រមាណជាង១ហិកតាដែលមានទំនាស់រ៉ាំរ៉ៃជាយូរមកហើយរវាងឈ្មោះ លឹម វណ្ណា និងឈ្មោះ មាស សាវឿន ដែលធ្លាប់មានរឿងអាស្រូវដីធ្លី និងធ្លាប់ជាប់គុក ។ នៅក្នុងការប្រើវិធានការណ៍រដ្ឋបាលនេះគេឃើញក្រុមគ្រួសាររបស់លោក មាស សាវឿន ដែលជាអ្នកចាំដីប្រមាណជិត១០នាក់ប្រដាប់ដោយកាំបិត ពូថៅ ធ្វើការរារាំងអាជ្ញាធរ និងប្រើពាក្យសំដីធ្ងន់ៗដាក់អាជ្ញាធរផងដែរព្រមទាំងដុតកំទេចរបស់របរមួយចំនួនចោលផងដែរ ៕
ចែករំលែកព័តមាននេះ