រាជធានីភ្នំពេញ ៖ ខេត្តព្រះសីហនុ ក្រៅពីទទួលបានការបណ្តាក់ទុនវិនិយោគលើវិស័យអចលនទ្រព្យ និងជំនួញហើយនោះ អ្នកជំនាញនៅក្នុងផ្នែកទេសចរណ៍មើលឃើញថា នៅថ្ងៃអនាគត ខេត្តមួយនេះអាចនឹងស្រូបយកភ្ញៀវទេសចរឈានមុខបង្អស់ បើមានការអភិវឌ្ឍតំបន់ទេសចរណ៍ចម្រុះឱ្យបានច្រើនបន្ថែមទៀត ។…
រាជធានីភ្នំពេញ ៖ ខេត្តព្រះសីហនុ ក្រៅពីទទួលបានការបណ្តាក់ទុនវិនិយោគលើវិស័យអចលនទ្រព្យ និងជំនួញហើយនោះ អ្នកជំនាញនៅក្នុងផ្នែកទេសចរណ៍មើលឃើញថា នៅថ្ងៃអនាគត ខេត្តមួយនេះអាចនឹងស្រូបយកភ្ញៀវទេសចរឈានមុខបង្អស់ បើមានការអភិវឌ្ឍតំបន់ទេសចរណ៍ចម្រុះឱ្យបានច្រើនបន្ថែមទៀត ។
លោកស្រី ឆាយ ស៊ីវលីន ប្រធានសមាគមទីភ្នាក់ងារទេសចរណ៍កម្ពុជា បានឱ្យដឹងថា វិស័យទេសចរណ៍នៅតំបន់ឆ្នេរសមុទ្រឈរនៅលំដាប់លេខ១ ក្នុងការទាក់ទាញភ្ញៀវទេសចរតែបើនិយាយជារួមនៅទូទាំងប្រទេស ខេត្តព្រះសីហនុឈរលំដាប់លេខ២ បន្ទាប់ពីខេត្តសៀមរាប ។
លោកស្រីមានប្រសាសន៍ថា ៖« ប្រសិនបើខេត្តព្រះសីហនុមានការអភិវឌ្ឍឱ្យក្លាយជាកន្លែងទេសចរណ៍ចម្រុះ មានទីកន្លែងកម្សាន្តច្រើនដើម្បីផ្តល់ជាជម្រើសដល់ភ្ញៀវ ខេត្តនេះនឹងនាំមុខគេក្នុងការស្រូបយកភ្ញៀវទេសចរជាតិ-អន្តរជាតិគ្រប់ជាតិសាសន៍ » ។
លោកស្រីបន្តថា ៖« បើការអភិវឌ្ឍ និងគម្រោងនៅតែមានបន្តទៀតប្រកបដោយការទាក់ទាញ ខេត្តព្រះសីហនុអាចប្រហាក់ប្រហែលនឹងខេត្តសៀមរាបដែរ ឬអាចនាំមុខខេត្តសៀមរាប ក្នុងការស្រូបយកភ្ញៀវទេសចរឱ្យមកកម្សាន្តនៅក្នុងតំបន់ » ។
ក្នុងឆ្នាំ២០១៧ កន្លងទៅនេះ ខេត្តព្រះសីហនុ ទទួលបានភ្ញៀវទេសចរជាតិ និងអន្តរជាតិទៅកម្សាន្តជិត២លាននាក់ ហើយនៅពេលបច្ចុប្បន្ននេះ រាជរដ្ឋាភិបាលមានគម្រោងបង្កើតឱ្យមានតំបន់អភិវឌ្ឍន៍ទេសចរណ៍នាគរាជក្រុងព្រះសីហនុ សម្រាប់ផ្តល់ផលិតផលទេសចរណ៍ជូនភ្ញៀវជាតិ-អន្តរជាតិបន្ថែមទៀត ។
លោក ទិត ចន្ថា រដ្ឋលេខាធិការក្រសួងទេសចរណ៍ មានប្រសាសន៍ថា ៖« គម្រោងអភិវឌ្ឍន៍តំបន់ទេសចរណ៍នាគរាជក្រុងព្រះសីហនុ ជាតំបន់គំរូមួយដឹកនាំដោយរាជរដ្ឋាភិបាល ដែលមានការចូលរួមវិនិយោគរវាងរដ្ឋ និងវិស័យឯកជន តែរដ្ឋជាអ្នកនាំមុខ » ។
លោករដ្ឋលេខាធិការបន្តថា ៖« យើងមានចក្ខុវិស័យ បើសិនយើងមានការអភិវឌ្ឍល្អ យើងជំរុញការអភិវឌ្ឍផលិតផលទេសចរណ៍ថ្មីៗច្រើនថែមទៀត ដើម្បីរុញច្រានឱ្យកើនឡើងខ្លាំង ព្រោះយើងមានព្រលានយន្តហោះ, មានកំពង់ផែអន្តរជាតិ, មានច្រកចូលតាមផ្លូវគោក-ទឹក, មានគម្រោងផ្លូវល្បឿនលឿនភ្នំពេញ-ខេត្តព្រះសីហនុ និងមានគម្រោងកំពង់ផែទេសចរណ៍ ដែលចូលរួមធ្វើឱ្យខេត្តព្រះសីហនុ នៅថ្ងៃអនាគតខ្លាំងក្លា ។ តាមទស្សនវិស័យរបស់យើង ខេត្តព្រះសីហនុ មានភ្ញៀវទេសចរយ៉ាងតិច៨លាននាក់មកទស្សនានៅត្រឹមឆ្នាំ២០៣០ » ។
យោងតាមរបាយការណ៍ប្រចាំឆ្នាំ២០១៧របស់ក្រសួងទេសចរណ៍បង្ហាញថា ភ្ញៀវទេសចរអន្តរជាតិចូលមកទស្សនាកម្ពុជាសរុប៥,៦លាននាក់ កើនឡើង១១,៨% បើធៀបនឹងឆ្នាំ២០១៦ ។
របាយការណ៍បញ្ជាក់ថា ភ្ញៀវទេសចរចូលមកទស្សនាកម្ពុជាតាមផ្លូវអាកាស មានប្រមាណ៣,៣លាននាក់ ស្មើនឹង៥៩%នៃចំនួនសរុប កើនឡើង២២,៥% ។ ផ្លូវគោកមានជាង២,១លាននាក់ ស្មើនឹង៣៨,៣%នៃចំនួនសរុប ថយចុះ០,៥% និងតាមផ្លូវទឹកមានជាង១៤ម៉ឺននាក់ ស្មើនឹង២,៦%នៃចំនួនសរុប ថយចុះ៥,២% ៕
ចែករំលែកព័តមាននេះ