រាជធានីភ្នំពេញ ៖ អ្នកជំនាញផ្នែកសេដ្ឋកិច្ច និងពាណិជ្ជកម្មបានអះអាងថា ការមានបុណ្យឈប់សម្រាកច្រើននៅកម្ពុជា មិនប៉ះពាល់ដល់សុខភាពសេដ្ឋកិច្ចកម្ពុជានោះទេ ដោយសារឱកាសឈប់សម្រាកបែបនេះ ធ្វើឲ្យប្រជាពលរដ្ឋមានការចំណាយកើនឡើង ហើយធ្វើឲ្យចរន្តសេដ្ឋកិច្ចរស់រវើក ។
ប្រធាននាយកប្រតិបត្តិធនាគារអេស៊ីលីដា ភីអិលស៊ី លោកបណ្ឌិត អុិន ចាន់នី បានថ្លែងតាមទូរស័ព្ទនារសៀលថ្ងៃទី១៥ ឧសភា ម្សិលមិញថា ការឈប់សម្រាកច្រើននៅកម្ពុជា មិនមានអ្វីខាតបង់នោះទេ ប៉ុន្តែផ្តល់ផលចំណេញទៅវិញទេ ដោយសារវាធ្វើឲ្យធនធានមនុស្សរបស់យើងកាន់តែមានថាមពល សុខភាពល្អ និងធ្វើឲ្យការងារមានប្រសិទ្ធភាព ពេលពួកគេត្រឡប់មកធ្វើការវិញ ។ លោកបន្តថា ការឈប់សម្រាកច្រើនឆ្លុះបញ្ចាំងពីកត្តាសុខសន្តិភាព និងស្ថិរភាពនយោបាយនៅកម្ពុជាផងដែរ ។
លោកបន្តថា ៖« ការឈប់សម្រាកការងារ មិនមែនឈប់ទាំងអស់គ្នាទេ ព្រោះផ្នែកខ្លះដូចជាភោជនីយដ្ឋាន និងសណ្ឋាគារមិនបានឈប់ទេ តែបង្កើនឱកាសការងារ ដើម្បីផ្តល់សេវាកម្មដល់ភ្ញៀវទេសចរ » ។
លោកបន្តទៀតថា ៖« តាមន័យទេសចរណ៍ គេចង់បង្កលក្ខណៈឲ្យប្រជាពលរដ្ឋបានឈប់សម្រាក ដើរ
កម្សាន្តច្រើន និងចំណាយច្រើន ដែលនេះបង្កឲ្យមានចលនាសេដ្ឋកិច្ចកាន់តែរស់រវើក » ។
អនុប្រធានសភាពាណិជ្ជកម្មកម្ពុជា លោកឧកញ៉ា លឹម ហេង បានថ្លែងថា ការដែលមានថ្ងៃឈប់សម្រាកច្រើន ធ្វើឲ្យមានការចរាចរសាច់ប្រាក់ច្រើននៅក្នុងចរន្តសេដ្ឋកិច្ចជាតិ និងធ្វើឲ្យយើងចំណេញច្រើន បើសិនជាគិតក្នុងលក្ខខណ្ឌម៉ាក្រូសេដ្ឋកិច្ច ។
លោកបន្តថា បើរោងចក្រ សហគ្រាសណានៅបន្តធ្វើការងារ គឺបុគ្គលិកត្រូវធ្វើការដោយស្ម័គ្រចិត្ត និងមានប្រាក់លើកទឹកចិត្ត ប៉ុន្តែស្ថាប័ននាំចេញ-នាំចូលនៅតែធ្វើការងារ ដូច្នេះ វាមិនប៉ះពាល់ដល់សកម្មភាពនាំចេញ-នាំចូលរបស់យើងទេ ។
លោកឧកញ៉ាបានបន្តថា ៖« បើមើលតែមួយផ្នែក គឺការឈប់សម្រាកច្រើនពិតជាខាត ប៉ុន្តែបើមើលព្រៃទាំងមូល មិនខាតនោះទេ ព្រោះការឈប់សម្រាកច្រើនធ្វើឲ្យលំហូរសាច់ប្រាក់ចាក់ចូលគ្រប់ផ្នែកនៃសេដ្ឋកិច្ចរបស់យើង » ។
ជាមួយគ្នានេះដែរ លោកស្រី ឆាយ ស៊ីវលីន ប្រធានសមាគមទីភ្នាក់ងារទេសចរណ៍កម្ពុជា បានថ្លែងថា ការឈប់សម្រាកច្រើនមានចំណេញ និងខាត ប៉ុន្តែបើនិយាយពីផ្នែកទេសចរណ៍គឺចំណេញ ព្រោះប្រជាពលរដ្ឋចេញដើរកម្សាន្តច្រើន និងចំណាយប្រាក់ច្រើន មានពេលវេលាចាយលុយច្រើន តែផ្ទុយទៅវិញសម្រាប់សហគ្រាស ផលិតកម្មនានា ការឈប់សម្រាកច្រើនធ្វើឲ្យពួកគេខាតបង់ផលិតភាព ។
លោកស្រីបន្តថា ៖« ហេតុនេះ រោងចក្រ សហគ្រាសឬក្រុមហ៊ុនមួយចំនួន មិនគួរលើកថ្ងៃធ្វើការបន្ថែមទៀតនោះទេ ព្រោះយើងមានថ្ងៃឈប់សម្រាកច្រើនរួចទៅហើយ » ។
លោកស្រីបន្ថែមថា ៖« មានអ្នកវិនិយោគបរទេសមួយចំនួន ពួកគេបានរអ៊ូរទាំពីកម្ពុជាថាជាប្រទេសមានថ្ងៃឈប់សម្រាកច្រើនពេក » ៕
ចែករំលែកព័តមាននេះ