រាជធានីភ្នំពេញ ៖ បុរស៣នាក់បើករថយន្តស៊េរីទំនើប ពណ៌ស ស្រវឹងស្រា បើកក្នុងល្បឿងយ៉ាងលឿនដូចហោះក៏បានរេចង្កូតបុកឃឿនសួរច្បារ ពុះចែកទ្រូងផ្លូវ ហើយហោះផ្លោងទៅបុកបង្គោលស្លាកប៉ាណូព្រះករុណាព្រះសីហមុន្នីបាក់ បណ្តាលឲ្យរថយន្តក្រឡាប់ផ្ងារជើងកៀបជាប់អ្នកជិះក្នុងរថយន្តស្លាប់ម្នាក់ របួសធ្ងន់២នាក់ បង្កឲ្យមានការភ្ញាក់ផ្អើលកាលពីវេលាម៉ោង៣និង២០នាទីទាបភ្លឺថ្ងៃទី១៦ ខែឧសភា ឆ្នាំ២០១៨ តាមបណ្តោយផ្លូវជាតិលេខ៦ នៅចំណុចរង្វង់មូលព្រហ្មមុខបួន ស្ថិតនៅក្នុងសង្កាត់ជ្រោយចង្វារ ខណ្ឌជ្រោយចង្វារ ។
ជនរងគ្រោះដែលស្លាប់មានឈ្មោះសយ សាន ភេទប្រុស អាយុ២៩ឆ្នាំ មានស្រុកកំណើតនៅភូមិល្អក់ ឃុំកំពុងថ្ម ស្រុកសន្ទុក ខេត្តកំពង់ធំ ។ ចំណែកអ្នករួមដំណើរជាមួយ២នាក់ទៀតរងរបួសធ្ងន់មិនស្គាល់អត្តសញ្ញាណទេ ។
សាក្សីដែលឃើញហេតុការណ៍បានឲ្យដឹងថា មុនពេលកើតហេតុគេបានឃើញបុរស៣នាក់ បើករថយន្តមួយគ្រឿង ពណ៌ស ពាក់ស្លាកលេខភ្នំពេញ 2AS- 9229 បើកបរតាមបណ្តោយផ្លូវជាតិលេខ៦ ក្នុងទិសដៅពីជើងទៅត្បូង បើកចេញមកពីម្តុំព្រែកលៀប គោលបំណងបើកចូលក្រុងភ្នំពេញក្នុងល្បឿនយ៉ាងលឿនដូចហោះ ខណៈពេលបើកមកដល់ចំណុចកើតហេតុត្រង់ចំណុចរង្វង់មូលព្រហ្មមុខបួនផ្លូវរៀងកោង ហើយរថយន្តមិនបានបន្ថយល្បឿននោះទេក៏ជិះទៅបុកឃឿនសួរច្បារពុះចែកទ្រូងផ្លូវ បណ្តាលឲ្យហោះទៅបុកនឹងបង្គោលស្លាកប៉ាណូដែលតាំងរូបព្រះករុណាព្រះបាទសីហមុន្នី បណ្តាលឲ្យបាក់ដួលបង្គោលប៉ាណូ ។
ចំណែករថយន្តក្រឡាប់ផ្ងារជើងឡើងលើឆេះហុយផ្សែងទ្រលោម ភ្លាមៗនោះដែរបុរស៣នាក់ដែលជិះក្នុងរថយន្តបានកៀបជាប់នៅក្នុងរថយន្តត្រូវបានសមត្ថកិច្ចរួមនឹងប្រជាពលរដ្ឋនាំគ្នាអន្តរាគមន៍ជួយទាញយកទាំងតៃកុងរថយន្ត និងអ្នករួមដំណើរ២នាក់ទៀតយកចេញមកក្រៅ រួចដាក់នៅលើរថយន្តសង្គ្រោះយកទៅព្យាបាលនៅមន្ទីរពេទ្យកាល់ម៉ែត ជាអកុសលតៃកុងរថយន្តត្រូវបានស្លាប់ ក្រោយពេលទៅដល់មន្ទីរពេទ្យ១៥នាទី រីឯ២នាក់ទៀតរងរបួសធ្ងន់ធ្ងរ ដោយក្នុងនោះបុរសម្នាក់របើកសាច់លលាដ៍ក្បាល ។
ដោយឡែករថយន្តបង្កវិញខូចខាតខ្ទេចស្ទើរតែ១០០ភាគរយនឹងឆេះរថយន្តត្រូវបានប្រជាពលរដ្ឋយកបំពង់ពន្លត់អគ្គិភ័យបាញ់អស់៥បំពង់នៅមិនទាន់រលត់ក៏បានហៅរថយន្តពន្លត់អគ្គិភ័យមួយគ្រឿងមកបាញ់កុំឲ្យឆេះរាលដាលបន្តទៀត ។
ក្រោយពេលកើតហេតុរថយន្តត្រូវបានសមត្ថកិច្ចធ្វើការវាស់វែងស្ទូចយកទៅរក្សាទុកនៅការិយាល័យចរាចរណ៍ផ្លូវគោក ។ រីឯសពត្រូវបានសមត្ថកិច្ចយកទៅដម្កល់នៅវត្តទឹកថ្លា រង់ចាំសាច់ញាតិមកទទួលយកទៅធ្វើបុណ្យទៅតាមប្រពៃណី ៕
ចែករំលែកព័តមាននេះ