ខេត្តសៀមរាប ៖ មន្ត្រីជាន់ខ្ពស់ក្រសួងទេសចរណ៍កម្ពុជា-ឥណ្ឌា បានជួបពិភាក្សាគ្នាក្នុងកិច្ចប្រជុំក្រុមការងារទេសចរណ៍រវាងប្រទេសទាំងពីរ ដើម្បីស្វែងរកជំហានរីកចម្រើននៃកិច្ចសហប្រតិបត្តិការអភិវឌ្ឍន៍វិស័យទេសចរណ៍ ខណៈកិច្ចពិភាក្សានេះធ្វើឡើង បន្ទាប់ពីបានរៀបចំសន្និសីទផ្សព្វផ្សាយទេសចរណ៍ឥណ្ឌានៅកម្ពុជា (Incredible India Road…
ខេត្តសៀមរាប ៖ មន្ត្រីជាន់ខ្ពស់ក្រសួងទេសចរណ៍កម្ពុជា-ឥណ្ឌា បានជួបពិភាក្សាគ្នាក្នុងកិច្ចប្រជុំក្រុមការងារទេសចរណ៍រវាងប្រទេសទាំងពីរ ដើម្បីស្វែងរកជំហានរីកចម្រើននៃកិច្ចសហប្រតិបត្តិការអភិវឌ្ឍន៍វិស័យទេសចរណ៍ ខណៈកិច្ចពិភាក្សានេះធ្វើឡើង បន្ទាប់ពីបានរៀបចំសន្និសីទផ្សព្វផ្សាយទេសចរណ៍ឥណ្ឌានៅកម្ពុជា (Incredible India Road Show 2018) ក្នុងរាជធានីភ្នំពេញ កាលពីល្ងាចថ្ងៃទី៩ ឧសភា កន្លងមក ។
កិច្ចប្រជុំដ៏មានសារសំខាន់នេះ បានរៀបចំឡើងកាលពីថ្ងៃទី១០ ឧសភា នៅខេត្តសៀមរាប ទឹកដីបេតិកភណ្ឌដ៏ល្បីល្បាញរបស់កម្ពុជា ក្រោមវត្តមានលោក ហោ មុនីរ័ត្ន អនុរដ្ឋលេខាធិការក្រសួងទេសចរណ៍កម្ពុជា, លោកស្រី Rashmi Verma រដ្ឋលេខាធិការក្រសួងទេសចរណ៍នៃប្រទេសឥណ្ឌា, លោកស្រី Manika Jain ឯកអគ្គរដ្ឋទូតឥណ្ឌាប្រចាំកម្ពុជា រួមទាំងក្រសួង-ស្ថាប័នពាក់ព័ន្ធ និងសមាគមទីភ្នាក់ងារទេសចរណ៍កម្ពុជា (CATA) ផងដែរ ។
លោក ហោ មុនីរ័ត្ន អនុរដ្ឋលេខាធិការក្រសួងទេសចរណ៍ បានថ្លែងថា ៖« កិច្ចពិភាក្សានេះមានសារសំខាន់ចាំបាច់ដើម្បីជំរុញ និងពង្រឹងទំនាក់ទំនងមិត្តភាព និងកិច្ចសហប្រតិបត្តិការ រវាងប្រទេសទាំងពីរលើវិស័យទេសចរណ៍ »។ លោកបានវាយតម្លៃខ្ពស់លើលទ្ធផលកើតចេញពីកិច្ចសហប្រតិបត្តិការកន្លងមក ដែលបានចូលរួមចំណែកយ៉ាងសំខាន់ដល់ការជំរុញកំណើនទេសចរណ៍ ។
លោកក៏បានលើកឡើងផងដែរពីចំណុចសំខាន់ៗសម្រាប់ការពិភាក្សាឆ្ពោះទៅរកជំហានរីកចម្រើននៃកិច្ចសហប្រតិបត្តិការទេសចរណ៍ ក្នុងនោះការអភិវឌ្ឍវិស័យទេសចរណ៍ប្រកបដោយនិរន្តរភាព ស្របតាមផែនការការងារអនុវត្តអនុស្សរណៈយោគយល់គ្នា ស្តីពីកិច្ចសហប្រតិបត្តិការទេសចរណ៍រវាងកម្ពុជា និងឥណ្ឌា ។
ចំណុចសំខាន់ៗដែលបានពិភាក្សានៅក្នុងកិច្ចប្រជុំ រួមមាន សម្រួលការធ្វើដំណើររបស់ភ្ញៀវទេសចរ, ការគិតគូរដោះស្រាយឧបសគ្គ និងបញ្ហាប្រឈមក្នុងការទំនាក់ទំនង និងការធ្វើដំណើរ, ជំរុញការលើកកម្ពស់គុណភាព និងសេវាកម្មទេសចរណ៍, ជំរុញការផ្សព្វផ្សាយទីផ្សាររួមគ្នា, ការរៀបចំដំណើរទស្សនកិច្ចឈ្វេងយល់អំពី FAM Trips នៃប្រតិបត្តិករទេសចរណ៍ និងប្រព័ន្ធផ្សព្វផ្សាយ, ការរៀបចំព្រឹត្តិការណ៍បង្ហាញផ្លូវទេសចរណ៍ (Roadshow) និងការគាំទ្រគ្នាទៅវិញទៅមកក្នុងការចូលរួមពិព័រណ៍ទេសចរណ៍អន្តរជាតិ ដែលរៀបចំឡើងដោយប្រទេសនីមួយៗ ។
ទន្ទឹមនឹងនេះ ភាគីទាំងពីរក៏បានពិភាក្សាផងដែរពីកិច្ចពង្រឹងការអភិវឌ្ឍហេដ្ឋារចនាសម្ព័ន្ធទន់ តាមរយៈការផ្លាស់ប្តូរទស្សនកិច្ចសិក្សា, ការពង្រឹងស្ថាប័នអភិបាលកិច្ចល្អ, ការកសាង សមត្ថភាព និងកម្មវិធីបណ្ដុះបណ្ដាលសម្រាប់មន្ត្រីរដ្ឋាភិបាលក្នុងវិស័យទេសចរណ៍, ការសហការជាមួយស្ថាប័នពាក់ព័ន្ធអំពីលទ្ធភាពតភ្ជាប់តាមផ្លូវអាកាសសម្រាប់ជើងហោះហើរ ត្រង់រវាងឥណ្ឌា និងកម្ពុជា, ការបង្កើតការយល់ដឹង និងជំរុញផ្សព្វផ្សាយតំបន់គោលដៅទេសចរណ៍ ព្រមទាំងទស្សនកិច្ចព្រះពុទ្ធសាសនា និងធម្មយាត្រា ដែលទាក់ទងនឹងប្រវត្តិសាស្ត្រ វប្បធម៌ និងធម្មជាតិ ។
គួរបញ្ជាក់ថា នៅឆ្នាំ២០១៧ កម្ពុជាទទួលបានភ្ញៀវទេសចរអន្តរជាតិប្រមាណ៥,៦លាននាក់ កើនឡើង១១% បើធៀបនឹងឆ្នាំ២០១៦ ក្នុងនោះទេសចរឥណ្ឌាមានចំនួន៥៩.៥៧១នាក់ កើនឡើង២៩% ។ លើសពីនេះ ក្នុងរយៈពេល២ខែដើមឆ្នាំ២០១៨ តាមទិន្នន័យរបស់ក្រសួងទេសចរណ៍បង្ហាញថា ទេសចរឥណ្ឌាដែលមកទស្សនាកម្ពុជាបានកើនឡើង១០% ស្មើនឹង១០.៧៥០នាក់ ហើយនៅឆ្នាំនេះ កម្ពុជារំពឹងថា នឹងទទួលបានទេសចរឥណ្ឌាប្រមាណ៨ម៉ឺននាក់ ៕
ចែករំលែកព័តមាននេះ