ខេត្តកំពង់ធំ ៖ គ្រោះថ្នាក់ចរាចរណ៍ម៉ូតូបុកម៉ូតូបណ្តាលឱ្យស្លាប់ម្នាក់ និងរងរបួសធ្ងន់៤នាក់បានកើតឡើងកាលពីរសៀលថ្ងៃទី១២ ខែឧសភា ឆ្នាំ២០១៨ ស្ថិតនៅលើកំណាត់ផ្លូវលំក្រាលកំទេចថ្មមួយកន្លែងត្រង់ចំណុចព្រៃល្វា ក្នុងភូមិថ្មសំលៀង ឃុំក្រយា ស្រុកសន្ទុក ខេត្តកំពង់ធំ ។
តាមប្រភពពីសមត្ថកិច្ចបានឱ្យដឹងថា ករណីគ្រោះថ្នាក់ចរាចរណ៍ម៉ូតូបុកជាមួយម៉ូតូក្នុងទិសដៅបញ្ច្រាសគ្នា បានបង្កឡើងដោយបុរសម្នាក់មិនបានពាក់មួកសុវត្ថិភាព ជិះម៉ូតូមួយគ្រឿងម៉ាកហុងដា C125 ពណ៌ខ្មៅ ពាក់ស្លាកលេខ តាកែវ ១A-៤៤១៥ បើកបរពីលិចទៅកើតក្នុងល្បឿនលឿនបានបុកជាមួយម៉ូតូមួយគ្រឿងទៀតយ៉ាងពេញទំហឹង ម៉ាកយ៉ាម៉ាហា ពណ៌ខ្មៅ ពាក់ស្លាកលេខ កំពង់ធំ ១E-៤៥២៤ បើកបរពីកើតទៅលិច បណ្តាលឱ្យស្លាប់ម្នាក់ និង៤នាក់ទៀតរងរបួសធ្ងន់តែម្តង ។
តាមប្រភពបានឱ្យដឹងទៀតថា ជនរងគ្រោះក្នុងហេតុការណ៍គ្រោះថ្នាក់ចរាចរណ៍ខាងលើរួមមាន អ្នកបើកម៉ូតូម៉ាកហុងដា C125 ពណ៌ខ្មៅ ពាក់ស្លាកលេខ តាកែវ ១A-៤៤១៥ ឈ្មោះញឹក ធី ភេទប្រុស អាយុ៥៣ឆ្នាំ រស់នៅភូមិដូង ឃុំបល្ល័ង្ក ស្រុកបារាយណ៍ ខេត្តកំពង់ធំ បានស្លាប់នៅនឹងកន្លែងកើតហេតុ ចំណែកម៉ូតូមួយគ្រឿងទៀតជិះគ្នា៤នាក់ (ប្តី ប្រពន្ធ និងកូន) ម៉ាកយ៉ាម៉ាហា ពណ៌ខ្មៅ ពាក់ស្លាកលេខ កំពង់ធំ ១E-៤៥២៤ អ្នកបើកបរឈ្មោះយ៉ាន់ តាក់ ភេទប្រុស អាយុ៣៤ឆ្នាំ ជាប្តី រងរបួសធ្ងន់, ឈ្មោះ រឹម ភា អាយុ៣៣ឆ្នាំ ជាប្រពន្ធ របួសធ្ងន់, ឈ្មោះ ទី រត្ន័ ភេទប្រុស អាយុ៣ឆ្នាំ ជាកូន របួសធ្ងន់ និងឈ្មោះ ទី ស្រីមុត ភេទស្រី អាយុ៨ខែ ជាកូន រងរបួសធ្ងន់ ។ ជនរងគ្រោះទាំង៤នាក់រស់នៅភូមិបឹង ឃុំចើងដើង ស្រុកបារាយណ៍ ខេត្តកំពង់ធំ ។
ក្រោយពេលកើតហេតុ អ្នករងរបួសធ្ងន់ត្រូវបានបញ្ជូនទៅសង្គ្រោះនៅមន្ទីរពេទ្យ ចំណែកសពត្រូវបានប្រគល់ជូនសាច់ញាតិយកទៅធ្វើបុណ្យតាមប្រពៃណី រីឯម៉ូតូទាំង២គ្រឿងត្រូវបានយកមករក្សាទុកនៅអធិការដ្ឋាននគរបាលស្រុកសន្ទុក ដើម្បីរង់ចាំការដោះស្រាយតាមនីតិវិធី ៕
ចែករំលែកព័តមាននេះ