រាជធានីភ្នំពេញ ៖ គណបក្សនយោបាយចំនួន៤ត្រូវបានគណៈកម្មាធិការជាតិរៀបចំការបោះឆ្នោត (គជប) នៅថ្ងៃទី១២ ខែឧសភានេះប្រកាសទទួលស្គាល់ គឺគណបក្សប្រជាជនកម្ពុជា គណបក្សយុវជនកម្ពុជា គណបក្សសញ្ជាតិកម្ពុជា និងគណបក្សខ្មែររួបរួមជាតិ…
រាជធានីភ្នំពេញ ៖ គណបក្សនយោបាយចំនួន៤ត្រូវបានគណៈកម្មាធិការជាតិរៀបចំការបោះឆ្នោត (គជប) នៅថ្ងៃទី១២ ខែឧសភានេះប្រកាសទទួលស្គាល់ គឺគណបក្សប្រជាជនកម្ពុជា គណបក្សយុវជនកម្ពុជា គណបក្សសញ្ជាតិកម្ពុជា និងគណបក្សខ្មែររួបរួមជាតិ ។ ក្នុងនោះគណបក្ស៦បានដាក់ពាក្យចូលគជបនឹងកំពុងត្រួតពិនិត្យ ។
ដោយឡែកគណបក្ស៧ទៀតបានប្រកាសថា នឹងចូលដោយបានតម្កល់ប្រាក់១៥លានរៀលក្នុងបក្សមួយនៅរតនាគារជាតិ ។ គជបបានបញ្ជាក់ក្នុងសេចក្តីជូនដំណឹងរបស់ខ្លួនថា គណបក្សដែលបានទទួលស្គាល់ គឺគណបក្សប្រជាជនកម្ពុជាឈរឈ្មោះនៅ២៥មណ្ឌល គណបក្សយុវជនកម្ពុជាឈរឈ្មោះ១៧មណ្ឌល គណបក្សខ្មែររួបរួមជាតិឈរ២៥មណ្ឌល និងគណបក្សសញ្ជាតិកម្ពុជាឈរ២៥មណ្ឌល នៅទូទាំងប្រទេសកម្ពុជា ។
ការបោះឆ្នោតសភាអាណត្តិទី៦មានអាសនៈចំនួន១២៥ ។ ចំពោះគណបក្សដែលបានដាក់ពាក្យចូលគជបនៅថ្ងៃទី១៣ នៃការចុះឈ្មោះគណបក្សនយោបាយ និងកំពុងត្រូវបានត្រួតពិនិត្យរួមមានគណបក្សហ្វ៊ុនស៊ិនប៉ិច (ឈរឈ្មោះ២៥មណ្ឌល) គណបក្សសំបុកឃ្មុំសង្គមប្រជាធិបតេយ្យ (ឈរឈ្មោះ២៥មណ្ឌល) គណបក្សប្រជាធិបតេយ្យមូលដ្ឋាន(ឈរឈ្មោះ២៥មណ្ឌល) គណបក្សពន្លឺថ្មី(ឈរឈ្មោះ១៣មណ្ឌល) គណបក្សខ្មែរតែមួយ(ឈរឈ្មោះ១៦មណ្ឌល)និងគណបក្សសម្ព័ន្ធដើម្បីប្រជាធិបតេយ្យ(ឈរឈ្មោះ២៦មណ្ឌល) ។
ចំណែកគណបក្សចំនួន៧ដែលបានតម្កល់ប្រាក់១៥លានរៀលនីមួយៗនៅរតនាគារ និងមិនទាន់បានដាក់ពាក្យចូលគជបនៅឡើយគិតត្រឹមថ្ងៃទី១២ ខែឧសភានេះរួមមាន ៖ គណបក្សខ្មែរអភិវឌ្ឍន៍សេដ្ឋកិច្ច គណបក្សខ្មែរឈប់ក្រ គណបក្សធម្មាធិបតេយ្យ គណបក្សខ្មែរក្រោក គណបក្សសាធារណរដ្ឋប្រជាធិបតេយ្យ គណបក្សមាតុភូមិយើង និងគណបក្សប្រជាធិបតេយ្យថ្មី ៕
ចែករំលែកព័តមាននេះ