រាជធានីភ្នំពេញ ៖ រថយន្តមួយគ្រឿងបានបើកបត់ឆ្វេងឆ្លងផ្លូវ ក៏ត្រូវម៉ូតូបើកបោះពួយក្នុងល្បឿនលឿនបានជ្រុលទៅបុក បណ្តាលអោយអ្នកជិះម៉ូតូរងរបួសធ្ងន់ម្នាក់ និងស្រាល២នាក់ ហេតុការណ៍នេះបានកើតឡើងកាលពីវេលាម៉ោង១និង១០នាទីរំលងអាធ្រាត្រឈានចូលថ្ងៃទី១១ ខែឧសភា ឆ្នាំ២០១៨ នៅ
ចំណុចផ្លូវ៣៦០ កែងនឹងផ្លូវ ព្រះមុនីវង្ស សង្កាត់បឹងកេងកង៣ខណ្ឌចំការមន ។
តាមប្រភពព័ត៌មានពីកន្លែងកើតបានអោយដឹងថា មុនពេលកើតហេតុ គេបានឃើញបុរសម្នាក់រួមជាមួយនារីម្នាក់ បានបើករថយន្តម៉ាកកាមរី បាឡែន ពណ៌ស្ករ ពាក់ស្លាកលេខ ភ្នំពេញ ២AJ-៤០០៩ ធ្វើដំណើរតាមផ្លូវ ព្រះមុនីវង្ស ក្នុងទិសដៅពីត្បូងទៅជើង ខណៈមកដល់ចំណុចកើតហេតុ អ្នកបើកបរបានបើករថយន្តបត់ឆ្វេងឡើងទៅផ្លូវ៣៦០ ស្រាប់តែពេលរថយន្តបត់បានពាក់កណ្តាលផ្លូវ ក៏ស្រាប់តែមានបុរស៣នាក់ជិះម៉ូតូមួយគ្រឿងម៉ាកហុងដាឃ្លីក ពណ៌ខ្មៅ ពាក់ស្លាកលេខ ភ្នំពេញ ១CC-៩០២០ ចេញពីកម្មវិធីជួបជុំមិត្តភក្តិ ក្នុងស្ថានភាពស្រវឹង បានធ្វើដំណើរតាមផ្លូវព្រះមុនីវង្ស ក្នុងទិសដៅពីជើងទៅត្បូងក្នុងល្បឿនលឿន បានជ្រុលទៅបុករថយន្តកាមរីបាឡែនចំថ្ពាល់មុខចំហៀងខាងស្តាំយ៉ាងពេញទំហឹង បណ្តាលអោយអ្នកបើកម៉ូតូហោះផ្ទប់ទៅបុកនឹងកញ្ចក់រថយន្តរងរបួសសន្លប់ស្តូកស្តឹង ត្រូវបានរថយន្តសង្គ្រោះមកដឹកយកទៅសង្គ្រោះនៅគ្លីនិកឯកជនមួយ ចំណែកអ្នកជិះពីខាងក្រោយ២នាក់ទៀត រងរបួសរលាត់ដៃរលាត់ជើងតិចតួច រីឯម៉ូតូវិញរងការខូចខាតខ្ទេចផ្នែកខាងមុខ ។
ដោយឡែកខាងរថយន្តវិញរងការខូចខាតក្រពិតថ្ពាល់មុខចំហៀងខាងស្តាំ និងបែកកញ្ចក់ខាងមុខ មិនបណ្តាលឱ្យគ្រោះថ្នាក់ដល់អ្នកជិះក្នុងរថយន្តនោះទេ ។
ក្រោយពេលកើតហេតុ ដោយសារតែមិនមានដំណោះស្រាយ ទើបរថយន្តនិងម៉ូតូត្រូវបានសមត្ថកិច្ចជំនាញបានចុះទៅកន្លែងកើតហេតុ និងធ្វើការវាស់វែងយកទៅរក្សាទុកនៅអធិការដ្ឋានខណ្ឌចំការមន ដើម្បីរង់ចាំការដោះស្រាយ ៕
ចែករំលែកព័តមាននេះ