រាជធានីភ្នំពេញ ៖ យុវជនម្នាក់ជិះម៉ូតូចេញពីធ្វើការក្នុងគោលបំណងទៅលេងនៅកន្លែងធ្វើការមិត្តភក្តិដើម្បីជិះទៅផ្ទះជាមួយគ្នានៅឯច្បារអំពៅ តែមិនទាន់បានជួបមិត្តភក្តិផង ក៏ត្រូវក្រុមចោរមានគ្នា៦នាក់ជិះម៉ូតូ៣គ្រឿងធ្វើសកម្មភាពធាក់ផ្តួលប្លន់យកម៉ូតូបានសម្រេចជិះគេចខ្លួនបាត់ស្រមោល ហេតុការណ៍នេះកើតឡើងនៅវេលាម៉ោង១១និង៤០នាទីយប់ថ្ងៃទី១០ ខែឧសភា ឆ្នាំ២០១៨ ត្រង់ចំណុចផ្លូវសហព័ន្ធរុស្សី ស្ថិតក្នុងភូមិព្រៃជីសាក់ សង្កាត់ចោមចៅទី៣ ខណ្ឌពោធិ៍សែនជ័យ ។
ជនរងគ្រោះឈ្មោះ យ៉ាង សារ៉ាត់ ភេទប្រុស អាយុ២៣ឆ្នាំ ជាបុគ្គលិកក្រឡុកស្រា ស្នាក់នៅសង្កាត់ច្បារអំពៅ ខណ្ឌច្បារអំពៅ មានស្រុកកំណើតនៅស្រុកបរសេដ្ឋ ខេត្តកំពង់ស្ពឺ។
បើតាមសម្តីពីជនរងគ្រោះបានឲ្យដឹងថា នៅមុនពេលកើតហេតុ គាត់បានជិះម៉ូតូមួយគ្រឿងម៉ាកហ្ស៊ុយស៊ុយគីនិច ពណ៌ស ទើបតែចេញពីកន្លែងធ្វើការក្នុងគោលបំណងទៅលេងមិត្តភក្តិដែលធ្វើការនៅជិតកន្លែងកើតហេតុ ដោយធ្វើដំណើរតាមបណ្តោយផ្លូវសហព័ន្ធរុស្សី ក្នុងទិសដៅពីជើងទៅត្បូង។ ខណៈជិះមកដល់ចំណុចកើតហេតុ ក៏ស្រាប់តែលេចមុខជនសង្ស័យមួយក្រុមមានគ្នា៦នាក់ជិះម៉ូតូ៣គ្រឿងមិនចាំម៉ាក ជិះមកពីក្រោយ ហើយបានធ្វើសកម្មភាពគៀរនឹងធាក់រូបគាត់បណ្តាលឲ្យដួល ភ្លាមៗនោះរូបគាត់ភ័យស្លន់ស្លោខ្លាំងពេកក៏បានរត់ចោលម៉ូតូទៅហៅមិត្តភក្តិដែលនៅក្បែរកន្លែងកើតហេតុ ទើបក្រុមជនសង្ស័យឃើញឱកាសល្អ ក៏លើកម៉ូតូរបស់គាត់ជិះរត់គេចខ្លួនបាត់ស្រមោល។
ក្រោយកើតហេតុ ជនរងគ្រោះត្រូវបានមិត្តភក្តិឌុបទៅដាក់ពាក្យបណ្តឹងនៅប៉ុស្តិ៍នគរបាល
រដ្ធបាលចោមចៅទី៣ ដើម្បីឲ្យសមត្ថកិច្ចជួយស្រាវជ្រាវរកម៉ូតូនិងកំណត់មុខសញ្ញាយកមកផ្តន្ទាទោស តាមផ្លូវច្បាប់៕
ចែករំលែកព័តមាននេះ