យោងទៅតាមសេចក្តីរាយការណ៍របស់សារព័ត៌មាន The Daily Telegraph ឲ្យដឹងថា ត្រីសម្បូរខ្លាញ់អាចជួយពន្យារពេលរាំងរដូវរហូតដល់៣ឆ្នាំ ។ ការសិក្សាមួយដែលធ្វើទៅលើស្ត្រីជនជាតិអង់គ្លេសអាយុពី៤០ទៅ៦៥ឆ្នាំ ចំនួន ៩១៤នាក់ បានរកឃើញថា អ្នកដែលបានញ៉ាំត្រីសម្បូរខ្លាញ់ និងសណ្តែក ទំនងជាមិនងាយឈានដល់អាយុនៃការរាំងរដូវលឿនដូចស្ត្រីដែលញ៉ាំអាហារធម្មតាដូចជា បាយ ឬប៉ាស្តាឡើយ ។
ជាមធ្យម ស្ត្រីដែលត្រូវឈានដល់ពេលរាំងរដូវក្នុងប្រទេសអង់គ្លេសគឺអាយុ៥១ឆ្នាំ ។ មានរឿងច្រើនដែលរងការប៉ះពាល់ដោយសារតែបញ្ហានេះរួមទាំងហ្សែន ប្រវត្តិនៃការបន្តពូជ និងអាយុដែលស្ត្រីចាប់ផ្តើមមករដូវដំបូង ។ របបអាហារគឺជាកត្តាដ៏សំខាន់មួយទៀតសម្រាប់រឿងនេះដែរ ។
អាយុដែលស្ត្រីត្រូវដល់ពេលរាំងរដូវអាចប៉ះពាល់ទៅលើសុខភាពរបស់ពួកគេ ។ ការឆាប់រាំងរដូវពេកមានជាប់ទាក់ទងនឹងឆ្អឹងខ្សោយ (ជំងឺពុកឆ្អឹង) និងការបាក់ទឹកចិត្ត ។ ការដែលក្ររាំងរដូវវិញ ក៏ប្រឈមខ្ពស់នឹងជំងឺមហារីកសុដន់ ស្បូន និងក្រពេញអូវែ ដែលរឿងនេះទំនងជាដោយសារតែកត្តាអ៊័រម៉ូន ។
ខណៈពេលដែលលទ្ធផលនៃការសិក្សានេះគួរឲ្យចាប់អារម្មណ៍ តែវាមិនបានអះអាងថា របបអាហាររបស់ស្ត្រីមានការប៉ះពាល់ដោយផ្ទាល់ទៅនឹងពេលវេលានៃការរាំងរដូវរបស់ពួកគេឡើយឹ។ កត្តា ផ្សេងៗទៀតទំនងជាចូលរួមផងដែរ ។ វាពិបាកនឹងនិយាយថា តើការក្ររាំងរដូវ៣ឆ្នាំ នឹងមានប្រយោជន៍សម្រាប់ស្ត្រីទាំងអស់ណាស់ ដែលរឿងនេះអាចធ្វើឲ្យពួកគេប្រឈមនឹងជំងឺមួយចំនួនដែរ ។
ទោះបីជាយ៉ាងណាក៏ដោយ ការញ៉ាំអាហារផ្តល់តុល្យភាព និងទទួលបានវីតាមីននិងជាតិរ៉ែត្រឹមត្រូវគឺជារឿងសំខាន់សម្រាប់ស្ត្រីដើម្បីរស់នៅមានសុខភាពល្អនៅពេលពួកគេអាយុច្រើន និងរាំងរដូវ ៕
ស្រង់ពីគេហទំព័រសុខភាព
ចែករំលែកព័តមាននេះ