រាជធានីភ្នំពេញ ៖ ក្រុមហ៊ុន វេស្ទឡាញ អេឌ្យូខេសិនគ្រុប ដែលមានសាលាវេស្ទឡាញ និង ណត្សឡាញជាបុត្រសម្ព័ន្ធ បានរៀបចំវគ្គសិក្ខាសាលាមួយ ដោយមានការចែករំលែកពីបណ្ដាសាកលវិទ្យាល័យ…
រាជធានីភ្នំពេញ ៖ ក្រុមហ៊ុន វេស្ទឡាញ អេឌ្យូខេសិនគ្រុប ដែលមានសាលាវេស្ទឡាញ និង ណត្សឡាញជាបុត្រសម្ព័ន្ធ បានរៀបចំវគ្គសិក្ខាសាលាមួយ ដោយមានការចែករំលែកពីបណ្ដាសាកលវិទ្យាល័យ និងវិទ្យាស្ថាននានា ក្នុងនិងក្រៅប្រទេស ដើម្បីផ្ដល់ព័ត៌មានអាហារូបករណ៍ដល់សិស្សានុសិស្ស ។
នៅក្នុងសិក្ខាសាលាដែលបានរៀបចំឡើងនៅសាលាអន្តរជាតិវេស្ទឡាញសាលាសន្ធរម៉ុក កាលពីចុងសប្ដាហ៍កន្លងទៅនេះ លោក នូ ស៊ីមដារា អ្នកគ្រប់គ្រងកម្មវិធីអប់រំនៅវិទ្យាស្ថានអភិវឌ្ឍន៍វិស័យអប់រំ បានអោយដឹងថា ជាទូទៅសាលាវេស្ទឡាញតែងតែសហការជាមួយបណ្ដាសាកលវិទ្យាល័យទាំងក្នុងស្រុក និងក្រៅស្រុក ដើម្បីផ្ដល់អាហារូបករណ៍ដល់សិស្សរបស់ខ្លួន ជាក់ស្ដែងនៅក្នុងឱកាសនេះ មានសាកលវិទ្យាល័យបីដែលបានសហការជាមួយវេស្ទឡាញក្នុងការផ្ដល់អាហារូបករណ៍ជូនសិស្សថ្នាក់ទី១២ នៅពេលពួកគេប្រឡងបញ្ចប់ ។
លោកបន្តថា ការផ្ដល់អាហរូបករណ៍នេះដែលនឹងផ្ដល់ជូនសិស្ស មានប្រភេទ ១០០ភាគ ៧០ភាគរយ និង ៥០ភាគរយ ទៅតាមសមត្ថភាពរបស់សិស្សដែលទទួលយកបាន ។ ចំណែកសិស្សរបស់វេស្ទឡាញ និងណត្សឡាញក៏ដូចគ្នា ដែរ គឺពួកគេត្រូវតែប្រឡងជាប់និងទទួលបាននិទ្ទេសល្អ ទើបអាចស្នើរសុំអាហារូបករណ៍ពីសាកលវិទ្យាល័យល្បីៗដែលបានសហការជាមួយបាន ។
លោកបញ្ជាក់ថា ក្នុងស្មារតី និងទឹកចិត្តជាអ្នកអប់រំ សាលាតែងតែយកចិត្តទុកដាក់ និងគិតគូជានិច្ចពីបញ្ហាគុណភាព និងប្រសិទ្ធភាព លើការបង្រៀន និងការរៀនរបស់ក្មួយៗសិស្សានុសិស្ស ប្រសិនបើយើងបើកបម្រើសេវាកម្មជាសាលារៀន នោះវាត្រូវតែជាសាលារៀនអប់រំពិតប្រាកដ ។ មិនមែនជាសាលារៀន ដែលគ្រាន់តែមានកន្លែងទទួលចុះឈ្មោះសិស្ស មានបន្ទប់ទឹក និងចំណតយាន្តជំនិះនោះទេ ។ ក្នុងន័យនេះ យើងជឿជាក់ថា ការបង្កើតសាលារៀនមួយ ដែលពេញលេញ និងគ្រប់លក្ខណៈ វាពិតជាផ្តល់លទ្ធផលល្អ និងគុណភាពខ្ពស់ដល់ការបង្រៀន និងជាពិសេសគុណភាពនៃការសិក្សារបស់សិស្ស ៕
ចែករំលែកព័តមាននេះ