ខេត្តកែប ៖ នៅព្រឹកថ្ងៃទី២៧ ខែមេសា ឆ្នាំ២០១៨ កន្លងទៅថ្មីៗនេះ មន្ទីរព័ត៌មានខេត្តកែប ដែលមានទីតាំងស្ថិតក្នុងភូមិកែវក្រសាំង សង្កាត់កែប ក្រុងកែប មានរៀបចំធ្វើពិធីសម្ពោធដាក់ឲ្យប្រើប្រាស់ជាផ្លូវការស្ថានីយ៍វិទ្យុជាតិឆ្នេរកែប FM៩៩ Mhz ដែលជាអំណោយរបស់វិទ្យុសសំឡេងវៀតណាម (VOV) ក្រោមអធិបតីភាព លោក ខៀវ កញ្ញារិទ្ឋ រដ្ឋមន្ត្រីក្រសួងព័ត៌មាន និងលោកស្រីរដ្ឋលេខាធិការក្រសួងព័ត៌មាន ស្ថានទូតវៀតណាមប្រចាំព្រះរាជាណាចក្រកម្ពុជា អភិបាលខេត្ត ប្រធានក្រុមប្រឹក្សាខេត្ត ។ ជាមួយគ្នានេះ ក៏មានការអញ្ជើញចូលរួមជាកិត្តិយសពីសំណាក់ប្រធានមន្ទីរព័ត៌មានតាមបណ្ដាខេត្តមួយចំនួន ព្រមទាំងសិស្សនិស្សិត និងមន្ត្រីរាជការអង្គភាពនានាជុំវិញខេត្តបានចូលរួមយ៉ាងច្រើនកុះករ ។
ថ្លែងក្នុងពិធីបើកសម្ពោធដាក់ឲ្យប្រើប្រាស់នូវស្ថានីយ៍វិទ្យុជាតិ FM៩៩ Mhz ឆ្នេរកែប នាពេលនេះ លោក ខៀវ កញ្ញារិទ្ធ រដ្ឋមន្ត្រីក្រសួងព័ត៌មាន បានមានប្រសាសន៍ថា វិទ្យុគឺជាស្ពានភ្ជាប់ទំនាក់ទំនង់រវាងថ្នាក់ដឹកនាំ និងប្រជាពលរដ្ឋ វិទ្យុមានសារៈសំខាន់ខ្លាំងណាស់ វាជាស្ពានអាចឲ្យមន្ទីរ អង្គភាពជុំវិញខេត្ត គណៈអភិបាលខេត្ត បានដឹងអំពីតម្រូវការ ការខ្វះខាត សំណូមពររបស់ប្រជាជន និងហេតុការផ្សេងៗនៅក្នុងសង្គមក៏ដូចជានៅក្នុងខេត្ត ហើយថ្នាក់ដឹកនាំខេត្ត ក៏អាចឆ្លើយតបទៅប្រជាជនវិញ តាមរយៈវិទ្យុ ឬដោយផ្ទាល់ ថារឿងនេះ រឿងនោះ កើតឡើងការពិតដោយសារមូលហេតុនេះ ឬមូលហេតុនោះ ដើម្បីចៀសវាងការផ្សព្វផ្សាយព័ត៌មានមិនពិត បំភ្លៃព័ត៌មាន ឬការបំបោងព័ត៌មានឲ្យខុសការពិត នៅតាមប្រព័ន្ធផ្សព្វផ្សាយសង្គម ។
ប្រសាសន៍លោកលើកឡើងបែបនេះ នៅក្នុងពិធីសម្ភោធដាក់ឲ្យប្រើប្រាស់ជាផ្លូងការស្ថានីយ៍វិទ្យុជាតិឆ្នេរកែប FM៩៩ Mhz ដែលជាអំណោយរបស់វិទ្យុសំឡេងវៀតណាម (VOV) នៅថ្ងៃទី២៧ ខែមេសា ឆ្នាំ ២០១៨ នៅមន្ទីរព័ត៌មានខេត្តកែបនេះ ។ លោកបានបន្តថា វិទ្យុចំណាយតិច ប៉ុន្តែមានប្រសិទ្ធភាពខ្ពស់ ព្រោះពលរដ្ឋធ្វើការងារប្រកមុខរបររបស់ខ្លួនបណ្តើរបានស្តាប់បណ្ដើរ មិនរំខាន់ដល់ពេលវេលារបស់អ្នកស្តាប់ ពិសេសអាចយកតាមខ្លួនទៅស្តាប់ទីណាក៏បាន ហើយប្រមុខរាជរដ្ឋាភិបាលមានគោលបំណងតម្រូវឲ្យខេត្តមួយមានស្ថានីយវិទ្យុជាតិមួយ ជាចាំបាច់ ។
លោករដ្ឋមន្ត្រីបានបញ្ជាក់ថា វិទ្យុជាតិឆ្នេររកែបនេះ មិនមែនវិទ្យុរបស់សាលាខេត្តទេ គឺវិទ្យុរបស់បងប្អូនទាំងអស់គ្នានៅក្នុងខេត្តកែប ដូច្នេះឧទាហរណ៍ថា បើមានអគ្គិភ័យ គ្រោះថ្នាក់ចរាចរ ឬហេតុការណ៍ផ្សេងៗទៀតកើតឡើងមិនប្រក្រតី សូមបងប្អូនជួយផ្តល់ព័ត៌មានភ្លាមៗមកស្ថានីយវិទ្យុដែលទើបដំណើរការមួយនេះ ព្រោះកន្លែងវិទ្យុជាកន្លែងប្រមូលផ្តុំ និងផ្លាស់ប្តួរព័ត៌មានទៅវិញទៅមក ។ វិទ្យុគឺស្ពានមួយសម្រាប់ឆ្លងរវាងថ្នាក់ដឹកនាំខេត្តជាមួយ និងប្រជាជន ។
លោករដ្ឋមន្ត្រីបានស្នើឲ្យប្រធានមន្ទីរព័ត៌ទាំងអស់ ត្រូវបង្កើតការយកចិត្តទុកដាក់ និងធ្វើការប្រជុំក្រុមវិទ្យុរៀងរាល់ព្រឹក ដើម្បីស្តាប់សភាពការ តើនៅក្នុងខេត្តនរណានិយាយអ្វីខ្លះ មានហេតុការអ្វីកើតឡើង ហើយអាចដោះស្រាយដោយផ្ទាល់បានទេ បើមិនបានត្រូវរាយការណ៍ទៅអភិបាលរងខេត្ត ដើម្បីឲ្យលោកអភិបាលរងរាយការណ៍បន្តទៅអភិបាលខេត្ត ជួយរកដំណោះស្រាយដើម្បីធ្វើការឆ្លើយតបឲ្យបានត្រឹមត្រូវ ។ លោករដ្ឋមន្ត្រីបានកោតសរសើរដល់អ្នកសារព័ត៌វិជ្ជាជីវៈនៅទូទាំងប្រទេសដែលបានបំពេញកិច្ចការងាររបស់ខ្លួនបានយ៉ាងល្អ ព្រោះការងារសារព័ត៌មាន ឬការងារអ្នកកាសែត ជាការងារលំបាកណាស់ ធ្វើការ១ថ្ងៃ២៤ម៉ោង១សប្តាហ៍៧ថ្ងៃ គ្មានពេលឈប់សម្រាកទេ ហើយអ្នកសារព័ត៌មានក៏មិនអាចខ្ជិលបានដែរ ។ យ៉ាងណាក៏ដោយ លោកបានស្នើឲ្យមន្ទីរព័ត៌មាន ត្រូវមានទំនាក់ទំនង់ល្អ គ្រប់មន្ទីរ និងអង្គភាពនានាជុំវិញខេត្ត ទើបអាចដំណើរការបានល្អ ព្រោះអ្នកសារព័ត៌មានមិនមែនចេះគ្រប់ទេ ពេលមានបញ្ហាអ្វីដោះស្រាយ ឬឆ្លើយតបមិនបាន ត្រូវរត់រកអ្នកជំនាញជួយ ។
លោកក៏បានផ្តាំផ្ញើដល់អ្នកសារព័ត៌មាន ពិសេសក្រុមការងារវិទ្យុខេត្តកែបផ្ទាល់ ធ្វើយ៉ាងតាមដាន និងក្តាប់សាច់រឿងឲ្យច្បាស់ និងធ្វើខ្លួនជាអ្នកសារព័ត៌មានវិជ្ជាជីវៈ កុំអីបន្តិចថតផ្សាយ អីបន្តិចជេរ ដោយគ្មានការសួរនាំ ធ្វើឲ្យបាត់ទំនុកចិត្ត ៕
ចែករំលែកព័តមាននេះ