រាជធានីភ្នំពេញ ៖ លោក វ៉ា វុត្ថារ៉ា មានតួនាទីជាអ្នកទទួលបន្ទុកកិច្ចការទូទៅក្នុងខុទ្ទកាល័យសម្តេចក្រុមព្រះប្រធានគណបក្សហ្វ៊ុនស៊ិនប៉ិចបានលាឈប់ពីសមាជិកបក្សដោយអះអាងតាមរយៈលិខិតថ្វាយសម្តេចក្រុមព្រះថា លោកអស់មានជំនឿ និងគ្មានឱកាសបម្រើជាតិក្រោមការដឹកនាំរបស់សម្តេចក្រុមព្រះ ។ យោងតាមលិខិតមួយច្បាប់ចុះថ្ងៃទី១៨…
រាជធានីភ្នំពេញ ៖ លោក វ៉ា វុត្ថារ៉ា មានតួនាទីជាអ្នកទទួលបន្ទុកកិច្ចការទូទៅក្នុងខុទ្ទកាល័យសម្តេចក្រុមព្រះប្រធានគណបក្សហ្វ៊ុនស៊ិនប៉ិចបានលាឈប់ពីសមាជិកបក្សដោយអះអាងតាមរយៈលិខិតថ្វាយសម្តេចក្រុមព្រះថា លោកអស់មានជំនឿ និងគ្មានឱកាសបម្រើជាតិក្រោមការដឹកនាំរបស់សម្តេចក្រុមព្រះ ។
យោងតាមលិខិតមួយច្បាប់ចុះថ្ងៃទី១៨ ខែមេសា ឆ្នាំ២០១៨ ដែលមានហត្ថលេខាលោក វ៉ា វុត្ថារ៉ា បានថ្វាយសម្តេចក្រុមព្រះបានលើកឡើងថា«សូមសម្តេចក្រុមព្រះនរោត្តមរណឫទ្ធិ ព្រះប្រធានគណបក្សហ្វ៊ុនស៊ិនប៉ិចព្រះមេត្តាសម្រេច និងព្រះមេត្តាជ្រាបជាព័ត៌មាន» ។ ទោះបី នៅមិនទាន់អាចទាក់ទងអ្នកនាំពាក្យគណបក្សលោកញ៉េប ប៊ុនជិន បានលើកឡើងថា គណបក្សហ្វ៊ុនស៊ិនប៉ិចជាគណបក្សមហាសេរីណាស់ ។ ចង់អ្នកណាទៅណាក៏ទៅៗមិនដូចគណបក្សគេដទៃតឹងរឹងណាស់ ។ លោកថា៖ «ខ្ញុំមិនដឹងច្បាស់ទេថា លោក វ៉ា វុត្ថារ៉ា យល់យ៉ាងម៉េចទេ និងមិនបានទទួលពាក្យលាលែងទេ»។
លោកបានលើកឡើងថា ម៉េចបានជាអ្នកសារព័ត៌មានចាប់អារម្មណ៍លើលោក វ៉ា វុត្ថារ៉ា ខណៈពេលដែលមានសមាជិកគណបក្សហ្វ៊ុនស៊ិនប៉ិចច្រើនណាស់ដែលបានលាលែងពីបក្ស ។ លោកថា កាលពីពេលថ្មីៗនេះ មានសមាជិក២នាក់ត្រូវបានបណ្តេញចេញពីបក្សបន្ទាប់ពីសំណុំរឿងបានឡើងដល់តុលាការ ។ លោកបានលើកឡើងថា «លោកវ៉ា វុត្ថារ៉ា ត្រូវបានតែងតាំងជាទីប្រឹក្សារដ្ឋាភិបាលមានឋានៈស្មើអនុរដ្ឋលេខាធិការ ។ គាត់មានឋានៈខ្ពស់ក្នុងរដ្ឋាភិបាល ។ ម៉េចបានជាគាត់សម្រេចលាលែង ខ្ញុំមិនយល់ដែរ ឬគាត់ធ្វើលេង? » ។
លោកបានលើកឡើងថា លោក វ៉ា វុត្ថារ៉ាមិនមានតួនាទីខ្ពស់ក្នុងបក្សទេ តែគាត់ជាមនុស្សសកម្មម្នាក់ដុតដៃដុតជើងនៅក្នុងបក្ស ហើយមិនដឹងថា គាត់មិនពេញចិត្តរឿងអីដែរទេ ។ លោកថា សម្តេចក្រុមព្រះប្រធានគណបក្សបានផ្តល់ឱកាសច្រើនដល់គាត់មិនដូចលិខិតគាត់សរសេរទៅសារព័ត៌មានទេ ។ ទោះបីយ៉ាងណាលោក ញ៉េប ប៊ុនជិនបានអះអាងថា គណបក្សហ្វ៊ុនស៊ិនប៉ិចបានត្រៀមបេក្ខជនគ្រប់២៤ រាជធានី-ខេត្តក្នុងការឈរឈ្មោះបោះឆ្នោតជ្រើសតាំងតំណាងរាស្ត្រនៅថ្ងៃទី២៩ ខែកក្កដា ២០១៨ខាងមុខ ។ លោកថា សម្តេចក្រុមព្រះប្រធានគណបក្សបានយាងដោយផ្ទាល់ចុះតាមខេត្តនានា ។ លោកថា គណបក្សបានចុះទៅកាន់ខេត្តធំៗចំនួន៨ ជាគោលដៅដែលមានអាសនៈចាប់ពី៣អាសនៈ ៕
ចែករំលែកព័តមាននេះ