រាជធានីភ្មពេញ ៖ ក្មេងស្រីម្នាក់ដែលគេដឹងថា ជាក្មេងកំព្រាម្នាក់ឪពុកម្តាយ ត្រូវជនខិលខូចមួយក្រុមមានគ្នា៤នាក់ធ្វើសកម្មភាពចាប់ពង្រត់នាងពីខេត្តតាកែវ នាំមករាជធានីភ្នំពេញ ក្នុងគោលបំណងយកមកលក់ ប៉ុន្តែត្រូវនាងរត់រួចពីកណ្តាប់ដៃក្រុមជនពាលទាំងនោះ និងបានស្រែកឱ្យគេជួយ ទើបក្រុមជនពាលនាំគ្នាបើករថយន្តរត់គេចខ្លួនបាត់ ។ ហេតុការណ៍នេះបានកើតឡើងកាលពីវេលាម៉ោង៧និង២០នាទីយប់ថ្ងៃទី២៤ មករា នៅចំណុចផ្ទះគ្មានដំបូលមួយស្ថិតក្នុងភូមិបាគូ សង្កាត់ដង្កោ ខណ្ឌដង្កោ ។
ក្មេងស្រីរងគ្រោះត្រូវបានគេស្គាល់ថា ឈ្មោះកែង ស្រីចិន អាយុ១៣ឆ្នាំ ជាសិស្សថ្នាក់ទី៧ នៃវិទ្យាល័យជាសីុម តាកែវ មានស្រុកកំណើតនៅភូមិខ្នារ សង្កាត់ដូនកែវ ក្រុងដូនកែវ ខេត្តតាកែវ។ នាងបាននិយាយប្រាប់សមត្ថកិច្ចថា នៅវេលាម៉ោង៤ល្ងាចថ្ងៃទី២៤ មករា ខណៈនាងជិះកង់តែម្នាក់ឯងចេញពីសាលារៀនក្នុងបំណងទៅផ្ទះដែលនៅមិនឆ្ងាយប៉ុន្មានពីសាលារៀន ក៏ស្រាប់តែមានជន៤នាក់ជិះរថយន្តម៉ាកសាំយ៉ុង ពណ៌ឈាមជ្រូក មួយគ្រឿងទៅឈប់ជិតកង់របស់នាង ហើយពួកនោះបានស្រែកគំរាមមិនឱ្យនាងស្រែក ។ បន្ទាប់មក ជនពីរនាក់ក្នុងចំណោមបក្សពួកទាំង៤នាក់នោះបានចាប់ខ្ទប់មាត់នាងជាប់ និងអូសនាងឡើងលើរថយន្ត រួចហើយបើកសំដៅទៅកាន់រាជធានីភ្នំពេញ ព្រមទាំងបានយកក្រណាត់ខ្មៅចងមុខ បិទភ្នែករបស់នាងថែមទៀតផង ។
ក្មេងស្រីរងគ្រោះរៀបរាប់ទៀតថា លុះពេលមកដល់ត្រង់ចំណុចខាងលើក្រុមជនសង្ស័យបាននាំនាងទៅផ្ទះគ្មានដំបូលមួយ ដែលមានស្ថានភាពស្ងាត់ជ្រងំគួរឱ្យខ្លាចបំផុត ។ បន្ទាប់មកពួកគេបាននាំគ្នាស្រាយចំណងចេញពីមុខរបស់នាង ពេលនោះដើរទៅឈរនិយាយគ្នានៅខាងក្រៅផ្ទះ ហើយរូបនាងបានឮគេនិយាយតថ្លៃគ្នាពីរឿងលក់រូបនាង ធ្វើឱ្យនាងមានការភិតភ័យយ៉ាងខ្លាំង ប៉ុន្តែពេលនោះនាងមិនបានដឹងថាកំពុងស្ថិតនៅកន្លែងណាឡើយ ព្រោះយប់ងងឹតសូន្យសុង ។
ឆ្លៀតឱកាសដែលជនទាំងនោះភ្លេចខ្លួន ម្យ៉ាងពួកគេមិនបានចងនាងផងនោះ ទើបនាងលួចរត់ចេញពីក្នុងផ្ទះនោះ ដោយផ្លោះតាមបង្អួចចេញមកក្រៅ រួចរត់គេចខ្លួនបណ្តើរស្រែកឱ្យគេជួយបណ្តើររហូតដល់ផ្លូវលំមួយកន្លែង ក៏បានជួបនឹងស្រី្តម្នាក់កំពុងដើរ នាងក៏ស្រែកឱ្យស្ត្រីរូបនោះជួយតែម្តង ។តាមប្រភព័ត៌មានឱ្យដឹងទៀតថា ពេលនោះបង្កឱ្យមានការភ្ញាក់ផ្អើលដល់ប្រជាពលរដ្ឋដែលរស់នៅក្បែរនោះយ៉ាងខ្លាំង ហើយក្រុមជនពាលទាំងនោះបាននាំគ្នាបើករថយន្តរត់គេចខ្លួនបាត់ ។ ក្រោយមកប្រជាពលរដ្ឋបានផ្តល់ព័ត៌មានដល់ប៉ូលិសខណ្ឌដង្កោ ដើម្បីចុះធ្វើការស្រាវជ្រាវតាមចាប់ខ្លួនជនសង្ស័យ ប៉ុន្តែមិនបានរកឃើញជនទាំងនោះឡើយ ។ ប៉ូលិសបាននាំក្មេងស្រីរងគ្រោះទៅសាកសួរ និងបានហៅឱ្យក្រុមគ្រួសារមកយកនាងត្រឡប់ទៅស្រុកកំណើតវិញ ៕
ចែករំលែកព័តមាននេះ