រាជធានីភ្នំពេញ ៖ នាវេលាព្រឹកថ្ងៃទី២៣ ខែមេសា ឆ្នាំ២០១៨ នេះ អាជ្ញាធរខណ្ឌច្បារអំពៅ បានរៀបចំពិធីក្រុងពាលី បើកដ្ឋានសាងសង់ដំបូលផ្សារថ្មីទាំងស្រុង ជូនបងប្អូនអាជីវករផ្សារច្បារអំពៅ…
រាជធានីភ្នំពេញ ៖ នាវេលាព្រឹកថ្ងៃទី២៣ ខែមេសា ឆ្នាំ២០១៨ នេះ អាជ្ញាធរខណ្ឌច្បារអំពៅ បានរៀបចំពិធីក្រុងពាលី បើកដ្ឋានសាងសង់ដំបូលផ្សារថ្មីទាំងស្រុង ជូនបងប្អូនអាជីវករផ្សារច្បារអំពៅ ក្រោយរងគ្រោះដោយសារមហន្តរាយអគ្គិភ័យឆាបឆេះបំផ្លាញអស់មួយចំហៀងផ្សារ កាលពីពាក់កណ្តាលខែមីនា កន្លងទៅ ។
អភិបាលខណ្ឌច្បារអំពៅ លោក ចេង មុនីរ៉ា ឲ្យដឹងថា ដំបូលថ្មីដែលចាប់ផ្តើមបុកគ្រឹះសាងសង់ហ៊ុំទ័ព្ធពីលើបរិវេណផ្សារច្បារអំពៅទាំងមូលនេះ គឺជាអំណោយដ៏ថ្លៃថ្លារបស់ សម្តេចអគ្គមហាសេនាបតីតេជោ ហ៊ុន សែន ដែលបានឧបត្ថម្ភស្ថាបនាជូនបងប្អូនអាជីវករផ្សារច្បារអំពៅទាំងអស់ ប្រើប្រាស់ជាប្រយោជន៍រួម ក្រោយផ្សារមួយនេះត្រូវបានមហន្តរាយអគ្គិភ័យឆាបឆេះបំផ្លាញអស់តូបលក់ដូរចំនួន៥៨៨តូប លើតូបសរុប១,៤៤៧តូប កាលពីថ្ងៃទី១៥ ខែមីនា ឆ្នាំ២០១៨ កន្លងទៅ ។
លោកអភិបាលខណ្ឌ បានបញ្ជាក់ថា ការចាប់បើកការដំណើរការសាងសង់ដំបូលជូនបងប្អូនអាជីវករនៅពេលនេះ គឺបែងចែកចេញជា២ដំណាក់កាល ដោយដំបូងឡើយត្រូវបុកគ្រឹះជាមុនសិន រួចចាប់សង់ដំបូលនៅចំណុចដែលត្រូវមហន្តរាយអគ្គិភ័យឆេះបំផ្លាញតូបបងប្អូន ដែលដំណាក់កាលដំបូងក្រុមជំនាញត្រូវចំណាយពេលសាងសង់៣ខែ ។ ក្រោយបញ្ចប់ដំណាក់កាលទី១រួច ក្រុមជំនាញនឹងបន្តទៅដំណាក់បន្ទាប់ ដែលត្រូវសាងសង់ដំបូលនៅពីលើទីតាំងតូបរបស់បងប្អូនអាជីវករដែលមិនមានការរងគ្រោះក្នុងអគ្គិភ័យកន្លងទៅ ដោយត្រូវប្រើពេលវេលា៣ខែបន្ថែមទៀត ។ សរុបជារួមរយៈពេល៦ខែទើបដំបូលផ្សារមួយនេះ ត្រូវសាងសង់រួចរាល់ស្ថាពរ១០០ភាគរយ ។
ទន្ទឹមនឹងការសាងសង់នេះ ក្នុងនាមអាជ្ញាធរខណ្ឌ លោក ចេង មុនីរ៉ា ស្នើរដល់បងប្អូនអាជីវករទាំងអស់មានការយោគយល់ខ្ពស់ជាមួយអាជ្ញាធរ និងក្រុមជំនាញដែលកំពុងសាងសាង់ផង លើបញ្ហាពេលវេលាដែលតម្រូវឲ្យបងប្អូនរងចាំយូរ ប៉ុន្តែទោះបីជាយ៉ាងណាក្រុមជំនាញ រួមជាមួយអាជ្ញាធរ នឹងពន្លឿនការសាងសង់ដំបូលខាងលើនេះ ឲ្យបានឆាប់រហ័សតាមដែលអាចធ្វើទៅបាន ដើម្បីឆាប់បានឲ្យបងប្អូនអាជីវករចូលមកលក់ដូរប្រកបរបរអាជីវកម្មរបស់ខ្លួនដូចដើមវិញផងដែរ ។
គួររំឭកថា លោក ឃួង ស្រេង អភិបាល នៃគណៈអភិបាលរាជធានីភ្នំពេញ កាលពីរសៀលថ្ងៃទី២០ ខែមីនា ឆ្នាំ២០១៨កន្លងទៅ បានឲ្យដឹងថា ដោយមើលឃើញនូវការលំបាករបស់បងប្អូនអាជីវករដែលរងគ្រោះក្នុងមហន្តរាយអគ្គិភ័យដ៏កំណាចដែលបានឆាបឆេះបំផ្លិចបំផ្លាញទ្រព្យសម្បត្តិរកស៊ីរបស់បងប្អូននោះ សម្តេចនាយករដ្ឋមន្ត្រី ហ៊ុន សែន បានជួយសាងសង់ដំបូលស័ង្កសីដ៏ធំមួយ ដោយសង់ឡើងក្នុងកម្ពស់ខ្ពស់គួរសម បង្កលក្ខណៈជាម្លប់ត្រជាក់អាចមានខ្យល់អាកាសបក់ចេញចូលទៅមកបានស្រួលសម្រាប់បងប្អូនអាជីវករអាចលក់ដូរ មិនពិបាករងកម្តៅដូចមុន ។
លោកអភិបាលរាជធានី បានបន្តថា លើសពីនេះ សម្តេចនឹងជួយស្ថាបនាជួសជុលផ្លូវចំនួន២ខ្សែនៅជាប់ផ្សារដែលរងការខូចខាត គឺផ្លូវលេខ៣៦៣ (ខាងកើត) និងផ្លូវលេខ៦២០ (ខាងជើង) ជូនបងប្អូនអាជីវករ ក៏ដូចជាសម្រាប់ពលរដ្ឋទូទៅអាចធ្វើដំណើរទៅមកបានងាយស្រួលផងដែរ ។
គួរបញ្ជាក់ថា គិតមកត្រឹមថ្ងៃទី២៣ ខែមេសា ឆ្នាំ២០១៨ នេះ បងប្អូនជាអាជីវករមួយចំនួនធំទាំងក្នុងផ្សារ និងក្រៅផ្សារ បានមកលក់ដូរដូចសព្វដងធម្មតា ហើយក៏មានបងប្អូនពលរដ្ឋចូលមកទិញទំនិញធម្មតាផងដែរ នៅឡើយតែបងប្អូនដែលរងគ្រោះក្នុងមហន្តរាយអគ្គិភ័យប៉ុណ្ណោះ ដែលមិនទាន់មានទីតាំងសម្រាប់លក់ដូរត្រឹមត្រូវដូចអាជីវករទូទៅដទៃ ។ ជុំវិញការគិតគូរពីសំណាក់ប្រមុខរាជរដ្ឋាភិបាលកម្ពុជា បងប្អូនអាជីវករក្នុងផ្សារទាំងមូល បានសម្តែងអារម្មណ៍ត្រេកអរ និងសប្បាយចិត្តចំពោះការជួយជ្រោមជ្រែងគិតគូរពីសុខទុក្ខរបស់ពួកគាត់ ។ ពួកគាត់លើកឡើងថា គាត់ពិតជាមានការសោកស្តាយណាស់ចំពោះការបាត់បង់ទ្រព្យសម្បត្តិជាទំនិញលក់ដូរ ដែលជាមុខរបរស្នូលសម្រាប់ផ្គត់ផ្គង់ជីវភាពគ្រួសារពួកគាត់បច្ចុប្បន្ន ប៉ុន្តែទោះបីជាយ៉ាងណា ទ្រព្យទាំងនោះវាបានបាត់បង់អស់ទៅហើយដែរ ដោយសារគ្រោះមហន្តរាយដែលមើលមិនឃើញ និងអាចកើតឡើងជាយថាហេតុ ។
សូមបញ្ជាក់ជាថ្មីថា ផ្សារច្បារអំពៅ ជាផ្សារដែលសាងសង់ក្នុងរយៈកាលយូរលុងណាស់មកហើយ មានទីតាំងស្ថិតនៅចំណុចត្រើយខាងកើតស្ពានព្រះមុនីវង្សចាស់ ក្នុងភូមិដើមចាន់ សង្កាត់ច្បារអំពៅទី១ ខណ្ឌច្បារអំពៅ ដែលមានផ្ទៃក្រឡាសរុប១ហិកតាកន្លះ និងមានតូបលក់ដូរសរុបចំនួន១,៤៤៧ តូបទាំងតូច និងធំ ។ តូបចំនួន៥៨៨តូប លើតូបសរុប១៤៤៧តូប នៃផ្សារច្បារអំពៅ ត្រូវបានមហន្តរាយអគ្គីភ័យ បំផ្លាញអស់ហ្មត់គ្នានសល់កាលពីវេលាម៉ោង២៣និង៣០នាទីយប់ ថ្ងៃទី១៥ ខែមីនា ឆ្នាំ២០១៨ ។ គ្រោះអគ្គីភ័យដ៏កាចសាហាវនេះ គឺឆាបឆេះអស់រយៈពេល១៦ម៉ោង ទើបអណ្តាតភ្លើងត្រូវរលត់សូន្យសុងទៅវិញ១០០ភាគរយ ដោយសមត្ថកិច្ច និងអាជ្ញាធរ ប្រើប្រាស់រថយន្តពន្លត់អគ្គិភ័យអស់សរុប២៧០គ្រឿង ។ ដោយឡែក ចំពោះមូលហេតុ នៃការឆាបឆេះក៏ពុំទាន់មានប្រភពណាមួយអះអាងបញ្ជាក់បាននៅឡើយនោះទេ ៕
ចែករំលែកព័តមាននេះ