ខេត្តស្វាយរៀង ៖ ពលរដ្ឋរស់នៅជុំវិញផ្សារវាលយន្ត ក្រុងស្វាយរៀង បាននាំគ្នារិះគន់អាជ្ញាធរមូលដ្ឋានហាក់បីដូចជាមើលរំលង និងមិនអើពើសំរាមឡើងគរដូចភ្នំថែមទាំងមានក្លិនស្អុយអាសោច ខណៈដែលដើរឆ្លងកាត់ស្ទើរពុំបាន ជាពិសេសប្រជាពលរដ្ឋដែលរស់នៅជុំវិញផ្សារវាលយន្ត ។ ការរិះគន់របស់ពលរដ្ឋនៅក្រុងស្វាយរៀងនេះបានធ្វើឡើងនៅថ្ងៃទី២០…
ខេត្តស្វាយរៀង ៖ ពលរដ្ឋរស់នៅជុំវិញផ្សារវាលយន្ត ក្រុងស្វាយរៀង បាននាំគ្នារិះគន់អាជ្ញាធរមូលដ្ឋានហាក់បីដូចជាមើលរំលង និងមិនអើពើសំរាមឡើងគរដូចភ្នំថែមទាំងមានក្លិនស្អុយអាសោច ខណៈដែលដើរឆ្លងកាត់ស្ទើរពុំបាន ជាពិសេសប្រជាពលរដ្ឋដែលរស់នៅជុំវិញផ្សារវាលយន្ត ។ ការរិះគន់របស់ពលរដ្ឋនៅក្រុងស្វាយរៀងនេះបានធ្វើឡើងនៅថ្ងៃទី២០ ខែមេសា ឆ្នាំ២០១៨ ។
ប្រជាពលរដ្ឋបានថ្លែងប្រាប់ឱ្យដឹងថា នៅតាមមុខផ្ទះរបស់ពួកគាត់សំរាមរលួយចេញទឹកទៅហើយនោះនៅតែគ្មានអ្នកមកប្រមូលទៀត ។ ហើយជាពិសេសនៅជុំវិញផ្សារវាលយន្តគេពេញនិយមយកសំរាមមកដាក់ចោលលើផ្លូវកៅស៊ូដែលអាជ្ញាធរខេត្តបានស្ថាបនាយ៉ាងល្អស្អាតក្រាលសុទ្ធកៅស៊ូបេទីមតែនាំគ្នាយកមកចោលសំរាមយ៉ាងអាណាធិបតេយ្យដោយមិនគិតពីផលប៉ះពាល់ដល់សុខភាពប្រជាពលរដ្ឋបន្តិចសោះ ។
ប្រជាពលរដ្ឋបានថ្លែងឱ្យដឹងទៀតថា ម្យ៉ាងវិញទៀតនៅខាងលិចឈៀងខាងត្បូងផ្សារគឺសំរាមឡើងគរដូចភ្នំនិងគេយកមកដាក់ចំកណ្តាលផ្លូវបែកជាបួនដូចជារង្វង់មូលទៅហើយ ។ រីឯនៅខាងជើងផ្សារខ្ពស់ជាងដំបូលឡានតូចទៅទៀតសង្ស័យអ្នកម៉ៅការផ្សារមិនបើកភ្នែកមើលទេដឹងតែប្រមូលលុយពីអាជីវករមិនខ្វល់ឈឺក្បាលហាលថ្ងៃអ្វីឡើយ ។
ប្រជាពលរដ្ឋបានសំណូមពរដល់អាជ្ញាធរមានពាក់ព័ន្ធជួយពន្លឿនឲ្យខាងក្រុមហ៊ុន ឬអ្នកម៉ៅការផ្សារវាលយន្តមកប្រមូលយកសំរាមផងព្រោះផុតចូលឆ្នាំយូរហើយ បើនៅតែមិនមកប្រមូលសំរាមទេនោះហើយបើមានភ្លៀងកក់ខែទៀតមិនដឹងថាក្លិនស្អុយ និងស្ទះលូដល់កំរិតណានោះទេ ។ ពាក់ព័ន្ធនឹងការរិះគន់នេះភ្នាក់ងារយើងមិនអាចសុំការបំភ្លឺពីអាជ្ញាធរក្រុងស្វាយរៀងបានទេនៅព្រឹកថ្ងៃទី២០ ខែមេសា ឆ្នាំ២០១៨ នេះ ៕
ចែករំលែកព័តមាននេះ