រាជធានីភ្នំពេញ ៖ តារាចម្រៀងជើងចាស់មានទឹកដមសំឡេងស្រទន់លោកនូ ស៊ឹប បានចាប់ផ្តើមប្រឡូកក្នុងវិស័យចម្រៀងប្រមាណជាង៣០ឆ្នាំមកហើយ ប៉ុន្តែបើនិយាយពីកម្រិតជីវភាពវិញមិនមានអ្វីសេសសល់ច្រើនឡើយ ក្រៅតែអំពីការរស់នៅផ្ទះជួល ក្នុងជីវភាពដ៏ខ្វះខាត ។
ក្នុងវ័យ៧១ឆ្នាំលោកនូ ស៊ឹប ស្នាក់នៅផ្ទះជួលនៅមុខមន្ទីរពេទ្យរុស្ស៊ីជាមួយនឹងក្មួយ និងចៅ២នាក់ ។ លោកស្នាក់នៅទីនោះរយៈពេលប្រមាណជាង១០ឆ្នាំមកហើយ ស្របពេលវ័យចំណាស់អាជីពលែងសូវកាក់កប ។
ម្ចាស់បទចម្រៀង «អនិច្ចាអ្នកស្រែ» លោកនូ ស៊ឹប បានរៀបរាប់កាលពីពេល ថ្មីៗកន្លងមកថា ក្នុងពេលបច្ចុប្បន្នលោកបានបាត់បង់ឱកាសក្នុងការច្រៀងជាច្រើនឆ្នាំហើយ ដោយសារតែគ្មានអ្នកហៅ បូករួមជាមួយជំងឺប្រចាំកាយ និងភាពចាស់ជរាផងនោះ ។
លោកនូ ស៊ឹប ថ្លែងទាំងទឹកមុខស្រពោនថា៖ «បើទោះបីជារូបខ្ញុំបានប្រឡូកក្នុងវិស័យសិល្បៈស្ទើរពេញមួយជីវិតក៏ពិតមែន ប៉ុន្តែរហូតមកដល់ពេលនេះគឺមិនមានអ្វីច្រើនសល់ជាប់នៅក្នុងខ្លួនឡើយ ។ តែខ្ញុំកំពុងតែផ្ញើវាសនា និងបន្តជីវិតដែលនៅសេសសល់ចុងក្រោយនេះនៅក្នុងផ្ទះជួល ក្រោមការជួយឧបត្ថម្ភពីសប្បុរសជននានាដែលបានស្គាល់ និងអាណិតអាសូរដល់រូបខ្ញុំតែប៉ុណ្ណោះ» ។
បើតាមលោកនូ ស៊ឹប លោកនៅផ្ទះជួលនេះប្រមាណជាង១០ឆ្នាំមកហើយ ដោយក្នុងមួយខែត្រូវចំណាយ៥០ដុល្លារសម្រាប់ថ្លៃជួល ជាមួយនឹងការបូករួមថ្លៃទឹកថ្លៃភ្លើង នោះគឺជិត១០០ដុល្លារក្នុងមួយខែ ។
ទាំងអួលដើមក នូ ស៊ឹប ថាសព្វថ្ងៃលោកមិនអាចដើរច្រៀងបានដូចមុនទៀតឡើយ ហើយរាល់ការចំណាយប្រចាំថ្ងៃនេះគឺលោកបានមកពីការជួយពីសប្បុរសជននានា និងប្រាក់ខែចូលនិវត្តន៍យោធាប៉ុណ្ណោះ ។
លោកនូ ស៊ឹប បានចូលប្រឡូកក្នុងវិស័យសិល្បៈចម្រៀងតាំងពីក្រោយថ្ងៃរំដោះ៧មករាមកម្ល៉េះ ដោយអំឡុងពេលនោះជាលោកជាតារាចម្រៀងល្បីឈ្មោះ ។ ភាគច្រើនលោកច្រៀងបទបដិវត្តន ៍។ អំឡុងទសវត្សឆ្នាំ៨០លោកបានចូលបម្រើការងារជាយោធា ហើយបានចូលនិវត្តន៍នៅឆ្នាំ២០០៥ ។
ពីដំបូងលោកនូ ស៊ិប មិនមានបំណងចាប់យកអាជីពជាអ្នកចម្រៀងឡើយ ពោលគឺលោកស្រឡាញ់ខាងផ្នែកពេទ្យ ប៉ុន្តែដោយសារមានការជំរុញ និងលើកទឹកចិត្ត ទើបលោកចាប់យកអាជីពសិល្បៈនេះតែម្តង ។ នៅឆ្នាំ១៩៩០លោកត្រូវអតីតចៅហ្វាយខេត្តកំពង់ធំជំរុញ និងគាំទ្រឲ្យរូបលោកមកភ្នំពេញដើម្បីបន្តអាជីពសិល្បៈចម្រៀង ដ្បិតរូបលោកមានទេពកោសល្យលើផ្នែកនេះ ។ ជាអកុសលពេលលោកមកដល់ភ្នំពេញ ចៅហ្វាយខេត្តរូបនោះបានទទួលមរណភាព ធ្វើឲ្យលោកមានភាពតែលតោល មិនមានខ្សែបណ្តាញអ្វីទៀតឡើយ គឺមានតែខិតខំប្រឹងរស់ដោយខ្លួនឯង ។
ជាភ័ព្វសំណាង លោកនូ ស៊ឹប ក៏បានប្រឡងជាប់ចំណាត់ថ្នាក់លេខ១លើផ្នែកចម្រៀងក្នុងកម្មវិធីមួយ ទើបធ្វើឲ្យលោកចាប់ឈោងបានភាពល្បីឈ្មោះជា បណ្តើរៗ រហូតមានផលិតកម្មផ្សេងៗទាក់ទងឲ្យលោកទៅច្រៀង ។ ផលិតកម្មចំនួន២ដែលលោកបានចាប់ផ្តើមច្រៀងនោះមាន ផលិតកម្មសាយណ្ហតារា និងផលិតកម្មកម្មករ ដោយលោកបានច្រៀងថត២០វ៉ុល ដែលពេលនោះលោកច្រៀងបានមួយបទ១០ដុល្លារប៉ុណ្ណោះ ។ ក្រោយមកទៀតលោកក៏មានឱកាសបានចូលច្រៀងឲ្យផលិតកម្មហង្សមាសនៅឆ្នាំ២០០០ ហើយនៅក្នុងផលិតកម្មនេះលោកក៏បានច្រៀងជាច្រើនបទផងដែរ ។
ចាប់តាំងពីលោកចាប់អាជីពចម្រៀងមកលោកនូ ស៊ឹប បានច្រៀងមិនក្រោម៣០០បទឡើយ ទាំងបទពីសម័យសង្គមចាស់ និងបទនិពន្ធថ្មី ប៉ុន្តែលោកមិនអាចចាំថាមានបទថ្មីខ្លះនោះទេ ។
លោកនូ ស៊ឹប បច្ចុប្បន្នដោយសារតែភាពចាស់ជរា ជាមួយនឹងជំងឺលើសឈាម និងសម្រាកមិនសូវលក់នោះ លោកស្ទើរតែបោះបង់អាជីពចម្រៀងទៅហើយ ព្រោះលោកមានភាពហេវហត់ អស់កម្លាំង និងភ្លេចភ្លាំងច្រើនជាមួយនឹងបទចម្រៀង ។
ទោះជាយ៉ាងណាក៏ដោយក៏នៅមានអ្នកហៅទៅច្រៀងម្តងម្កាលដែរ ដូចជាស្ថានីយទូរទស្សន៍CTN មួយឆ្នាំគេហៅម្តង។ ចំណែកការច្រៀងតាមរោងការនានានោះគឺរូបលោកមិនអាចទៅរួចទៀតទេ ព្រោះលោកមិនមានកម្លាំងគ្រប់គ្រាន់សម្រាប់ដើរឡើងឆាកដែលគេធ្វើ ខ្ពស់ៗ ខុសពីឆាកដែលលោកធ្លាប់ច្រៀងនៅតាមភោជនីយដ្ឋាននានា ។ បើទោះបីជាលោកស្ទើរតែបាត់បង់អាជីពចម្រៀងជាមួយនឹងជីវភាពលំបាកក៏ពិតមែន ប៉ុន្តែលោកក៏នៅតែទទួលបានការជួយជ្រោមជ្រែងពីផ្នែក ផ្សេងៗ និងសប្បុរសជននានាជាបន្តបន្ទាប់ ក្នុងនោះក៏មានសមាគមសិល្បករខ្មែរផងដែរ ។ ទឹកចិត្តដ៏ល្អទាំងអស់នេះលោកមិនអាចបំភ្លេចបានឡើយ ហើយលោកក៏គ្មានអ្វីតបស្នងក្រៅពីការអរគុណ ដល់សប្បុរសជននានាដែលនៅអាណិតស្រឡាញ់ និងគិតគូរពីសុខទុក្ខក្នុងនាមលោកជាអ្នកសិល្បៈដ៏ចំណាស់ម្នាក់ ។
លោកនូ ស៊ឹប មានដើមកំណើតនៅស្រុកសន្ទុក ខេត្តកំពង់ធំ បងប្អូន៤នាក់ ក្នុងនោះមានតែរូបលោកមា្នក់ប៉ុណ្ណោះចាប់អាជីពចម្រៀង ។
លោកនូ ស៊ឹប បានរៀបអាពាហ៍ពិពាហ៍នៅឆ្នាំ១៩៨៧ ប៉ុន្តែបានបែកគ្នាវិញ ដោយសាររស់នៅមិនចុះសម្រុងនឹងគ្នា ដោយមិនមានកូនឡើយ តែលោកមានកូនចិញ្ចឹម ។
តាំងពីបែកគ្នាជាមួយភរិយាមក លោកនូ ស៊ឹប មិនបានរៀបការទៀតឡើយ ដោយលោកបានប្រើជីវិតជាបុរសពោះម៉ាយចិញ្ចឹមបីបាច់ក្មួយ និងកូនចិញ្ចឹមរហូតមក ៕
ចែករំលែកព័តមាននេះ