រាជធានីភ្នំពេញ ៖ រដ្ឋមន្ត្រីក្រសួងយុត្តិធម៌ លោក អង្គវង្ស វឌ្ឍនា នឹងដឹកនាំកិច្ចប្រជុំគណៈកម្មការថ្នាក់ជាតិនៅព្រឹកថ្ងៃទី០៤ ខែមេសា ឆ្នាំ២០១៨ ស្អែកនេះ នាទីស្តីការក្រសួងយុត្តិធម៌ ដើម្បីពិនិត្យ និងវាយតម្លៃបញ្ជីឈ្មោះទណ្ឌិត ស្នើសុំបន្ធូរបន្ថយទោស និងលើកលែងទោស ដើម្បីពិនិត្យសំណើសុំបន្ធូរបន្ថយទោស និងលើកលែងទោសក្នុងឱកាសបុណ្យចូលឆ្នាំថ្មីប្រពៃណីជាតិ ដែលទទួលបានពីគណៈកម្មការថ្នាក់រាជធានីខេត្ត (ពន្ធនាគារចំនួន២០) និងគណៈកម្មការក្រសួងមហាផ្ទៃ (មណ្ឌលអប់រំកែប្រែចំនួន៤) លើបញ្ជីទណ្ឌិតស្នើសុំសរុប ៣២១នាក់ (ស្ត្រី២៨នាក់) ។
នេះបើយោងតាមលោក គឹម សន្តិភាព អ្នកនាំពាក្យក្រសួងយុត្តិធម៌បានឲ្យដឹងនៅថ្ងៃទី០៣ ខែមេសានេះ យ៉ាងណាមិញបញ្ជីឈ្មោះ ទណ្ឌិត ដែលនឹងត្រូវទទួលបាននូវការបន្ធូរបន្ថយ ឬលើកលែងទោស គឺពុំមានមន្ត្រីមកពីអតីតគណបក្សសង្គ្រោះជាតិនោះទេ ព្រោះកន្លងមក សម្តេចតេជោ ហ៊ុន សែន នាយករដ្ឋមន្ត្រីកម្ពុជាបានប្រកាសមួយលើក ជា២លើកថា មិនឲ្យដាក់ឈ្មោះអ្នកទាំងនោះក្នុងបញ្ជីឡើង ព្រោះមេរបស់ពួកគេ គឺលោក សម រង្ស៊ី ដែលកំពុងរស់នៅក្រៅប្រទេសគឺ «ព្រហើនពេក» ។
សូមបញ្ជាក់ថា តាមច្បាប់ពន្ធនាគារ គឺនាយករដ្ឋមន្ត្រីមានសិទ្ធស្នើសុំទៅព្រះមហាក្សត្រឲ្យទ្រង់លើកលែងទោស ឬបន្ធូរបន្ថយទោសដល់ទណ្ឌិតណា ដែលសាលក្រមចូលជាស្ថាពរ និងបានកែប្រែខ្លួនបានល្អ ៕
ចែករំលែកព័តមាននេះ