រាជធានីភ្នំពេញ ៖ ផ្សារទួលទំពូង គឺជាផ្សារធំមួយក្នុងចំណោមផ្សារធំៗជាច្រើនទៀតនៅក្នុងរាជធានីភ្នំពេញ តែអ្វីដែលសំខាន់សម្រាប់អតិថិជនទូទៅ មិនថាជនជាតិខ្មែរ ឬក៏ភ្ញៀវបរទេសឡើយ ពួកគាត់តែងតែសំដៅទៅរកទិញខោអាវរោងចក្រ ដែលមានគុណភាពខ្ពស់ និងតម្លៃថោកសមរម្យអាចទទួលយកបានយកទៅស្លៀកពាក់ផងដែរ…
រាជធានីភ្នំពេញ ៖ ផ្សារទួលទំពូង គឺជាផ្សារធំមួយក្នុងចំណោមផ្សារធំៗជាច្រើនទៀតនៅក្នុងរាជធានីភ្នំពេញ តែអ្វីដែលសំខាន់សម្រាប់អតិថិជនទូទៅ មិនថាជនជាតិខ្មែរ ឬក៏ភ្ញៀវបរទេសឡើយ ពួកគាត់តែងតែសំដៅទៅរកទិញខោអាវរោងចក្រ ដែលមានគុណភាពខ្ពស់ និងតម្លៃថោកសមរម្យអាចទទួលយកបានយកទៅស្លៀកពាក់ផងដែរ ។ ពាក់ព័ន្ធនឹងការពេញនិយមសម្រាប់ភ្ញៀវដែលទៅរកទិញខោអាវយកមកស្លៀកពាក់នេះដែរ ត្រូវបានក្រុមអាជីវករនៅទីនោះត្អូញត្អែរថា ៖« បើប្រៀបធៀបនឹងកាលពី៣ទៅ៤ឆ្នាំមុន មកដល់ពេលនេះ ការលក់របស់ពួកគាត់បានធ្លាក់ចុះយ៉ាងខ្លាំង និងស្ងាត់ភ្ញៀវរហូតដល់ជាង៥០%ឯណោះ » ។
លោក យិន សុខា អាយុ៤២ឆ្នាំ ជាអាជីវករម្នាក់បានរៀបរាប់ថា រូបគាត់បានប្រកបមុខរបរលក់ដូរខោអាវនៅក្នុងផ្សារទួលទំពូងនេះ អស់រយៈពេលជាង១០ឆ្នាំមកហើយ។ កាលពីចាប់ផ្តើមលក់ដំបូង គឺមានអតិថិជនជាជនជាតិខ្មែរ និងជនបរទេសចម្រុះជាតិសាសន៍ យ៉ាងច្រើនកុះករនាំគ្នាមករកទិញ និងលក់ដាច់យ៉ាងខ្លាំង ។ នៅក្នុងតូបរបស់គាត់មានលក់ ខោអាវគ្រប់ប្រភេទទាំងចាស់និងថ្មី ក្នុងតម្លៃចាប់ពី៣ដុល្លារ ៥ដុល្លារ និងមានតម្លៃថ្លៃជាងនេះទៅទៀតក៏មានដែរ គឺអាស្រ័យទៅលើរបស់ល្អ ឬមិនសូវល្អ ។ លុះមកដល់រយៈពេល៣ទៅ៤ឆ្នាំចុងក្រោយនេះ ការលក់ដូររបស់គាត់ហាក់បីដូចជាធ្លាក់ចុះយ៉ាងខ្លាំង និងស្ងាត់ភ្ញៀវខ្មែរ និងបរទេស រហូតដល់ជាង៥០%ឯណោះ ហើយមិនសូវដាច់ដូចពេលមុនៗឡើយ ។
លោកបន្តទៀតថា ការស្ងាត់ភ្ញៀវ និងលក់មិនសូវដាច់នេះ គឺមិនមែនមានតែតូបរបស់គាត់មួយទេ តូបផ្សេងៗជាច្រើនទៀត ក៏ដូចគ្នាដែរ និយាយរួម គឺទូទៅតែម្តង លក់មិនសូវដាច់ដូចគ្នាទាំងអស់ ។
បុរសវ័យ២២ឆ្នាំ ជាអតិថិជនម្នាក់បានប្រាប់ឱ្យដឹងថា គាត់មានទីលំនៅនៅម្តុំវត្តដំបូកខ្ពស់ ហើយរូបគាត់តែងតែឧហ្សាហ៍មករកទិញខោអាវនៅក្នុងផ្សារទួលទំពូងនេះយកទៅស្លៀកពាក់ ព្រោះវាជាខោអាវរោងចក្រ ដែលមានតម្លៃធូរថ្លៃ និងគុណភាពខ្ពស់ ។
ខោអាវទាំងនេះស្អាតៗ មិនចាញ់ខោអាវដែលគេដាក់លក់នៅតាមហាងធំៗឡើយ ហើយគាត់ក៏អាចស្លៀកពាក់វាទៅចូលរួមបានគ្រប់កម្មវិធី មិនថាកម្មវិធីការ បុណ្យ ទៅដើរលេង ឬក៏ពិធីអ្វីផ្សេងៗទៀតឡើយ គឺបានគ្រប់កម្មវិធីទាំងអស់ ។
អតិថិជនរូបនេះរៀបរាប់បន្តថា ពាក់ព័ន្ធនឹងខោអាវនៅផ្សារទួលទំពូងនេះដែរ មិនត្រឹមតែស្អាតៗ និងមានគុណភាពខ្ពស់ទេ ប៉ុន្តែមានម៉ាកយីហោ ហើយវាក៏សុទ្ធតែជាសម្លៀកបំពាក់ដែលមានគុណភាពសាច់ក្រណាត់ស្អាតៗ និងតម្លៃថោកទៀត ដោយគាត់ចំណាយប្រាក់ត្រឹមតែ២០ដុល្លារប៉ុណ្ណោះ គាត់អាចរកទិញបានខោអាវចំនួនពី១ទៅ២កំប្លេឯណោះ ។ តែសម្រាប់ខោអាវតាមហាងវិញ វាមានតម្លៃថ្លៃ បើទិញអស់លុយត្រឹមតែ២០ដុល្លារនេះ គាត់អាចទិញបានត្រឹមតែខោ១ ឬក៏អាវ១ប៉ុណ្ណោះ វាខុសពីតម្លៃខោអាវនៅក្នុងផ្សារទួលទំពូងនេះ ។
គួរបញ្ជាក់ថា ផ្សារទួលទំពូង គឺជាផ្សារលក់ខោអាវដ៏ធំមួយ និងជាគោលដៅមួយផងដែរ ដែលមានបងប្អូនប្រជាពលរដ្ឋក្នុងស្រុក និងអាណិកជនខ្មែររស់នៅក្រៅប្រទេស ក៏ដូចជាភ្ញៀវទេសចរបរទេសយ៉ាងច្រើន បាននាំគ្នាមករកទិញខោអាវយកទៅស្លៀកពាក់ និងផ្ញើទៅឲ្យក្រុមគ្រួសាររបស់ខ្លួនពាក់ផងដែរ ។ ឈ្មោះផ្សារទួលទំពូងនេះ ត្រូវបានស្គាល់តែជនជាតិខ្មែរយើងប៉ុណ្ណោះ តែសម្រាប់ជនបរទេសវិញ គេដាក់ឈ្មោះថា «រុស្ស៊ានម៉ាខិត» ហើយតែងតែមានភ្ញៀវជាជនបរទេសយ៉ាងច្រើនកុះករនាំគ្នាមករកទិញផងដែរ ៕
ចែករំលែកព័តមាននេះ