ប្រទេសកូរ៉េទាំង២ ៖ មេដឹកនាំកូរ៉េខាងជើងលោកគីម ជុងអ៊ុន និងភរិយាកាលពីថ្ងៃទី១ មេសា បានទស្សនាការប្រគំតន្ត្រីរបស់សិល្បករកូរ៉េខាងត្បូងនៅក្រុងព្យុងយ៉ាងពុំធ្លាប់មានចាប់តាំងពីជាង១ទសវត្សមកហើយ ។ ទីភ្នាក់ងារសារព័ត៌មានកូរ៉េខាងជើង KCNA…
ប្រទេសកូរ៉េទាំង២ ៖ មេដឹកនាំកូរ៉េខាងជើងលោកគីម ជុងអ៊ុន និងភរិយាកាលពីថ្ងៃទី១ មេសា បានទស្សនាការប្រគំតន្ត្រីរបស់សិល្បករកូរ៉េខាងត្បូងនៅក្រុងព្យុងយ៉ាងពុំធ្លាប់មានចាប់តាំងពីជាង១ទសវត្សមកហើយ ។
ទីភ្នាក់ងារសារព័ត៌មានកូរ៉េខាងជើង KCNA រាយការណ៍នាថ្ងៃទី២ មេសា ថា លោកគីម ជុងអ៊ុន និងភរិយានាយប់ថ្ងៃទី១ មេសា បានទស្សនាការប្រគំតន្ត្រីដ៏កម្រមួយរបស់ក្រុមសិល្បករកូរ៉េខាងត្បូង ។ លោកគីម ជុងអ៊ុន បានទទួលយ៉ាងកក់ក្តៅចំពោះក្រុមសិល្បៈនេះ ហើយសម្តែងក្តីរីករាយ និងសរសើរក្រោយការប្រគំតន្ត្រីមានឈ្មោះថា «និទាឃរដូវមកដល់» ។
លោកគីម ជុងអ៊ុន ថ្លែងថា ខ្ញុំពិតជារំភើបខ្លាំងណាស់ពេលឃើញប្រជាជនយើងយល់ច្បាស់ពីវប្បធម៌ប្រជាប្រិយកូរ៉េខាងត្បូង ហើយលោកសូមស្វាគមន៍យ៉ាងកក់ក្តៅបំផុត ។
ការប្រគំតន្ត្រីនេះធ្វើឡើងពេលកំពុងមានភាពធូរស្រាលនៅឧបទ្វីបកូរ៉េក្រោយរយៈពេល២ឆ្នាំនៃភាពតានតឹងបំផុតដោយសារការសាកល្បងនុយក្លេអ៊ែរ និងបាលីស្ទិករបស់កូរ៉េខាងជើង ។
ក្រុមសិល្បករកូរ៉េខាងជើងមានគ្នា១២០នាក់ ក្នុងនោះរួមមានពួកតារា K-POP តំណាងដោយសិល្បករ១១ក្រុម ពួកអ្នករាំ និងពួកអ្នកបច្ចេកទេសមកដល់ក្រុងព្យុងយ៉ាងកាលពីថ្ងៃទី៣១ មីនា បានសម្តែងទស្សនីយភាពនៅមុខជនលេខមួយកូរ៉េខាងជើង និងភរិយា ប្អូនស្រីរបស់លោក ព្រមទាំងលោក KIM YONGNAM ប្រមុខរដ្ឋជាតំណែងកិតិ្តយស ។
ក្នុងរោងមហោស្រពធំ PYONGYANG EST មានសមត្ថភាពទទួលមនុស្ស១.៥០០នាក់ លោកគីម ជុងអ៊ុន និងភរិយាបានសម្តែងការស្វាគមន៍ដល់បណ្តាសិល្បករ ហើយទះដៃអបអរសាទរជាច្រើនលើកក្នុងពេលសម្តែងរយៈពេល២ម៉ោង ។
នៅមុខបណ្តាអ្នកកាសែតប្រមុខគណៈប្រតិភូកូរ៉េខាងត្បូង លោក DO JONG HWAN បានសរសើរថា លោកគីម ជុងអ៊ុន មានការរំភើបខ្លាំងចំពោះបណ្តាបទចម្រៀង និងខ្លឹមសារពេលប្រគំតន្ត្រី ។
ចំណែកក្រុមកីឡាករតៃក្វាន់ដូ កូរ៉េខាងត្បូងនាថ្ងៃទី១ មេសា នោះបានបង្ហាញក្បាច់គុណនៅមុខមនុស្ស២.៣០០នាក់ មុនពេលរកសិស្សទាំងឡាយសម្រាប់កីឡានេះ នៅកូរ៉េខាងជើងនាថ្ងៃទី២ មេសា ។
នាថ្ងៃទី៣ មេសា បណ្តាសិល្បករកូរ៉េខាងត្បូងនឹងសម្តែងរួមគ្នាជាមួយបណ្តាសិល្បករកូរ៉េខាងជើងនៅទីតាំងហាត់ប្រាណ RYOGYONG JONG JU YONG ដែលអាចទទួលទស្សនិកជនបាន១២.០០០នាក់ ។
ការប្រកួតកីឡាអូឡាំពិករដូវរងានៅកូរ៉េខាងត្បូងជាឱកាសជំរុញឱ្យមានភាពធូរស្រាលខ្លាំងយ៉ាងឆាប់រហ័សរវាងកូរ៉េខាងជើង និងកូរ៉េខាងត្បូង ។ លោកគីម ជុងអ៊ុន បានបញ្ជូនកីឡាករអត្តពលកម្មទាំងឡាយ ព្រមទាំងក្រុមនារី POM-POM GIRLS ព្រមទាំងប្អូនស្រីពៅលោកមកកាន់កូរ៉េខាងត្បូង ។ ក្រោយការប្រាស្រ័យទាក់ទងគ្នាខាងការទូតជាច្រើននាំឱ្យមានសំណើនៃការជួបគ្នាកំពូលរវាងកូរ៉េទាំង២ ព្រមទាំងសំណើជួបគ្នាកំពូលរវាងក្រុងព្យុងយ៉ាង និងក្រុងវ៉ាស៊ីនតោន ។ ការជួបគ្នាកំពូលអន្តរកូរ៉េលើកទី៣ និងប្រព្រឹត្តទៅនាថ្ងៃទី២៧ មេសា នៅភូមិប៉ានមុនហ្សូម ។ ផ្ទុយទៅវិញពុំទាន់មានកាលបរិច្ឆេទកំណត់សម្រាប់ការជួបគ្នារវាងប្រធានាធិបតីអាេមរិក លោកដូណាល់ ត្រាំ និងលោកគីម ជុងអ៊ុន នៅឡើយ ខណៈកាលពីសប្តាហ៍មុន លោកគីម ជុងអ៊ុន បានមកកាន់ក្រុងប៉េកាំងជួបជាមួយប្រធានាធិបតីចិន លោកស៊ី ជីនពីង ។
សញ្ញានៃភាពធូរស្រាលមួយទៀត គឺសមយុទ្ធយោធារួមប្រចាំឆ្នាំរបស់កូរ៉េខាងត្បូង និងសហរដ្ឋអាមេរិកដែលចាប់ផ្តើមនាថ្ងៃទី១ មេសា ដែលរាល់ឆ្នាំនាំឱ្យក្រុងព្យុងយ៉ាងក្តៅក្រហាយខ្លាំង ត្រូវបានកាត់បន្ថយពេលធ្វើត្រឹមតែ១ខែ ។ ឆ្នាំនេះសម្ព័ន្ធមិត្តទាំង២ផ្អាកដាក់ពង្រាយបណ្តាអាវុធយុទ្ធសាស្ត្រ ចំណែកលោកគីម ជុងអ៊ុន អះអាងថា លោកយល់ពីសេចក្តីត្រូវការរបស់ក្រុងសេអ៊ូល និងក្រុងវ៉ាស៊ីនតោនក្នុងការធ្វើសមយុទ្ធយោធាទាំងនេះ ៕
ចែករំលែកព័តមាននេះ