រាជធានីភ្នំពេញ ៖ ដើម្បីជំរុញកិច្ចសហប្រតិបត្តិការជំនួញរវាងប្រទេសចិន និងកម្ពុជា ជួយពង្រីកទីផ្សារសហគ្រាសចិន និងកម្ពុជា ព្រមទាំងដាក់តាំងបង្ហាញផលិតផលគុណភាពល្អរបស់ប្រទេសទាំងពីរ កម្ពុជាបានធ្វើជាម្ចាស់ផ្ទះក្នុងការរៀបចំពិព័រណ៍ស្តីពី ពិព័រណ៍ចិន-អាស៊ានឆ្នាំ២០១៨ លើកដំបូងនៅកម្ពុជា…
រាជធានីភ្នំពេញ ៖ ដើម្បីជំរុញកិច្ចសហប្រតិបត្តិការជំនួញរវាងប្រទេសចិន និងកម្ពុជា ជួយពង្រីកទីផ្សារសហគ្រាសចិន និងកម្ពុជា ព្រមទាំងដាក់តាំងបង្ហាញផលិតផលគុណភាពល្អរបស់ប្រទេសទាំងពីរ កម្ពុជាបានធ្វើជាម្ចាស់ផ្ទះក្នុងការរៀបចំពិព័រណ៍ស្តីពី ពិព័រណ៍ចិន-អាស៊ានឆ្នាំ២០១៨ លើកដំបូងនៅកម្ពុជា ។
លោកឧកញ៉ា ពុង ឃាវសែ ប្រធានសមាគមខ្មែរ-ចិននៅកម្ពុជា បានថ្លែងក្នុងពិធីពិព័រណ៍កម្ពុជានៃពិព័រណ៍ចិន-អាស៊ាន នៅព្រឹកថ្ងៃទី៣០ មីនា នៅឯមជ្ឈមណ្ឌលសន្និបាត និងពិព័រណ៍កោះពេជ្រ ថា ពិព័រណ៍នេះមានស្តង់សរុបចំនួន៤៤០បានចូលរួមដាក់តាំងបង្ហាញនូវផលិតផលរបស់ខ្លួន ក្នុងនោះក្រុមហ៊ុនភាគច្រើន គឺជាក្រុមហ៊ុនថ្នាក់ជាតិរបស់ប្រទេសចិន និងជាក្រុមហ៊ុនចិនមកពីបណ្តាខេត្ត-ក្រុងជាង២០ ព្រមទាំងក្រុមហ៊ុនល្បីៗនៅកម្ពុជា ។
លោកបញ្ជាក់ថា ៖« ការតាំងពិព័រណ៍មានលក្ខណៈពិសេស សកម្មភាពពាណិជ្ជកម្មសម្បូរ បែប ។ ក្រៅពីការតាំងបង្ហាញផលិតផល និងបច្ចេកទេស សេវាកម្ម ក៏មានការរៀបចំជាសិក្ខាសាលាវិនិយោគកម្ពុជា, ការជំរុញកិច្ចសហប្រតិបត្តិការអន្តរជាតិ វេទិកាជំនួបពាណិជ្ជកម្ម និងបច្ចេកទេស ជាដើម » ។
លោកបន្តថា កម្ពុជាជាប្រទេសមានកំណើនសេដ្ឋកិច្ច មានស្ថិរភាពនយោបាយក្នុងចំណោមប្រទេសនៅក្នុងតំបន់អាស៊ីអាគ្នេយ៍ និងជាសមាជិកស្ថាបនិករបស់ធនាគារហេដ្ឋារចនាសម្ព័ន្ធអាស៊ី និងជាប្រទេសសំខាន់មួយនៅតាមបណ្តោយវិថីសូត្រនៃគំនិតផ្តួចផ្តើមខ្សែក្រវាត់ និងផ្លូវរបស់ប្រទេសចិន ហើយក៏ជាប្រទេសមួយមានគោលនយោបាយវិនិយោគបើកទូលាយជាងគេក្នុងចំណោមបណ្តាប្រទេសអាស៊ាន និងមានតម្រូវការខ្លាំងសម្រាប់ការវិនិយោគពីបរទេសផងដែរ ។
លោក ស្យុង ប៉ូ ឯកអគ្គរដ្ឋទូតចិនប្រចាំនៅកម្ពុជា បានថ្លែងថា ក្រោមការដឹកនាំរបស់ថ្នាក់ដឹកនាំនៃប្រទេសយើងទាំងពីរ ជំនឿទុកចិត្តខាងនយោបាយរវាងចិននិងកម្ពុជា បានត្រូវពង្រឹងជារៀងរាល់ថ្ងៃ យុទ្ធសាស្ត្រអភិវឌ្ឍន៍ផ្សារភ្ជាប់ជាមួយគ្នាកាន់តែឆាប់រហ័ស កិច្ចសហការលើគ្រប់វិស័យកាន់តែស៊ីជម្រៅដោយឥតឈប់ឈរ កិច្ចសហការក្នុងវិស័យសេដ្ឋកិច្ច និងពាណិជ្ជកម្មរវាងប្រទេសទាំងពីរបានទទួលការអភិវឌ្ឍយ៉ាងខ្លាំងក្លា ។ តាមស្ថិតិរបស់ភាគីចិន ទំហំពាណិជ្ជកម្មទ្វេភាគីរវាងចិន និងកម្ពុជា ក្នុងឆ្នាំ២០១៧ មានចំនួនជាង៥ពាន់លានដុល្លារអាមេរិក ។ ចំនួននេះបានសម្រេចទៅតាមគោលដៅដែលកំណត់ដោយរដ្ឋាភិបាលចិន និងរាជរដ្ឋាភិបាលកម្ពុជា ដែលបានឡើងដល់៥ពាន់៧រយ៩០លានដុល្លារអាមេរិក គឺបានកើនឡើង២១,៧% បើធៀបនឹងឆ្នាំ២០១៦ ។ រហូតមកដល់ចុងឆ្នាំ២០១៧ ប្រទេសចិនបានបណ្តាក់ទុនវិនិយោគតាមគ្រប់រូបភាពនៅក្នុងប្រទេសកម្ពុជា ដែលមានចំនួនជិត៨ពាន់លានដុល្លារ
អាមេរិក ។
បើតាមស្ថិតិរបស់ភាគីកម្ពុជាបានឱ្យដឹងថា ប្រទេសចិនជាដៃគូពាណិជ្ជកម្មធំទី១របស់កម្ពុជា ហើយក៏ជាប្រទេសដែលបានបណ្តាក់ទុនវិនិយោគច្រើនជាងគេបង្អស់របស់កម្ពុជា ជាច្រើនឆ្នាំបន្តបន្ទាប់គ្នា ។ នៅឆ្នាំ២០១៧កន្លងទៅនេះ ភ្ញៀវទេសចរចិនដែលបានមកប្រទេសកម្ពុជា បានកើនឡើងដល់ទៅ១លាន២សែន១ម៉ឺននាក់ គឺកើនឡើងជិត៤៦% បើធៀបនឹងឆ្នាំ២០១៦ ហើយចិនបានក្លាយទៅជាប្រទេសប្រភពទេសចរអន្តរជាតិច្រើនជាងគេរបស់កម្ពុជា ។
ក្រៅពីនេះ ប្រទេសយើងទាំងពីរក៏បានធ្វើកិច្ចសហប្រតិបត្តិការក្នុងវិស័យអគ្គិសនី កសិកម្ម ទេសចរណ៍ ហេដ្ឋារចនាសម្ព័ន្ធ និងការអភិវឌ្ឍតំបន់សេដ្ឋកិច្ចពិសេស ជាដើម ដែលបានរួមវិភាគទានយ៉ាងសកម្មនៅក្នុងការជំរុញឱ្យសេដ្ឋកិច្ច និងសង្គមកម្ពុជាអភិវឌ្ឍន៍ទៅមុខ និងបានចូលរួមកែលម្អកម្រិតជីវភាពរស់នៅរបស់ប្រជាពលរដ្ឋកម្ពុជាផងដែរ ។
លោកបន្តថា ឆ្នាំ២០១៨ គឺជាឆ្នាំទី១នៃការអនុវត្តយុទ្ធសាស្ត្រនៃមហាសន្និបាតលើកទី១៩ របស់បក្សកុម្មុយនិស្តចិន និងជាឆ្នាំគម្រប់ខួបទី៤០របស់ប្រទេសចិនក្នុងការបើកចំហ និងកែទម្រង់ ហើយក៏ជាខួបអនុស្សាវរីយ៍លើកទី៦០ នៃការបង្កើតទំនាក់ទំនងការទូតរវាងចិន និងកម្ពុជា ផងដែរ ។
លោកបញ្ជាក់ថា ៖« យើងខ្ញុំមានទឹកចិត្តសោមនស្សរីករាយយ៉ាងខ្លាំងដោយបានរួមជាមួយភាគីកម្ពុជា ដើម្បីបន្តពង្រឹង និងពង្រីកនូវកិច្ចសហប្រតិបត្តិការផ្ដល់ផលប្រយោជន៍ឱ្យគ្នាទៅវិញទៅមកកាន់តែស៊ីជម្រៅថែមមួយកម្រិតទៀតនៅក្នុងវិស័យពាណិជ្ជកម្ម ការវិនិយោគទុន និងទេសចរណ៍ ជាដើម ដើម្បីជំរុញឱ្យទំនាក់ទំនងសេដ្ឋកិច្ច និងពាណិជ្ជកម្មរវាងចិន និងកម្ពុជា ទទួលបាននូវការវិវឌ្ឍទៅមុខឥតឈប់ឈរ » ។
ជាមួយគ្នានោះដែរ លោកក៏បានលើកឡើងថា ឆ្នាំ២០១៨នេះ ក៏ជាខួបអនុស្សាវរីយ៍លើកទី១៥របស់ប្រទេសចិន និងអាស៊ាន ដែលបានបង្កើតទំនាក់ទំនងដៃគូយុទ្ធសាស្ត្រ និងជាខួប អនុស្សាវរីយ៍លើកទី១៥ នៃដំណើរការពិព័រណ៍ចិន-អាស៊ានផងដែរ ហើយក្នុងឆ្នាំ២០១៨នេះ កម្ពុជា ជាប្រទេសកិត្តិយសនៃពិព័រណ៍ចិន-អាស៊ាន លើកទី១៥ផងដែរ ។ ប្រទេសចិនសូមវាយតម្លៃយ៉ាងខ្ពស់ចំពោះប្រទេសកម្ពុជា ដែលបានរួមវិភាគទានដ៏សំខាន់នៅក្នុងការជំរុញឲ្យកិច្ចសហការចិន និងអាស៊ាន អភិវឌ្ឍន៍ទៅមុខ ៕
ចែករំលែកព័តមាននេះ